ପାଣାଜୀ: ପୂର୍ବତନ ପ୍ରତିରକ୍ଷା ମନ୍ତ୍ରୀ ତଥା ଗୋଆ ମୁଖ୍ୟମନ୍ତ୍ରୀ ମନୋହର ପାରିକରଙ୍କ ରବିବାର ପରଲୋକ ହୋଇଛି । ସାରା ଦେଶ ଏହି ଦୁଃଖଦ ଖବରରେ ମର୍ମାହତ ଥିବାବେଳେ ଆଜି ତାଙ୍କ ଶେଷକୃତ୍ୟ ସମ୍ପନ୍ନ ହେବ । ତେବେ ଏହା ପୂର୍ବରୁ ଶେଷ ଦର୍ଶନ ପାଇଁ ତାଙ୍କ ପାର୍ଥିବ ଶରୀରକୁ ଗୋଆ ବିଜେପି ଅଫିସକୁ ଅଣାଯାଇଛି । ଆଜି ସକାଳେ ପାଣାଜୀ ସ୍ଥିତ ବିଜେପି ଅଫିସରେ ସାଧାରଣ ଜନତାଙ୍କ ପାଇଁ ପାରିକରଙ୍କ ମର ଶରୀରକୁ ରଖାଯାଇଛି ।
୬୩ ବର୍ଷ ବୟସରେ କର୍କଟ ରୋଗରେ ପୀଡିତ ଥିବା ପାରିକରଙ୍କର ଅବସ୍ଥା ଶନିବାର ରାତିରୁ ସଙ୍କଟାପନ୍ନ ହୋଇଥିଲା । ସେ ସନ୍ଧ୍ୟାରୁ ଲାଇଫ ସପୋର୍ଟିଂ ସିଷ୍ଟମରେ ଥିଲେ । ହେଲେ ଡାକ୍ତରଙ୍କର ସମସ୍ତ ଉଦ୍ୟମ ସତ୍ତ୍ବେ ରବିବାର ସନ୍ଧ୍ୟା ୬ଟା ୪୦ ମିନିଟରେ ସେ ଶେଷ ନିଶ୍ବାସ ତ୍ୟାଗ କରିଥିଲେ । ଏହି ଘଟଣାରେ ରାଷ୍ଟ୍ରପତି ରାମନାଥ କୋବିନ୍ଦ ପ୍ରଥମେ ଟ୍ୱିଟ କରି ଦୁଃଖଦ ଖବର ଜଣାଇଥିଲେ । ପରେ ଅନ୍ୟ ନେତୃବୃନ୍ଦ ପାରିକରଙ୍କୁ ଦେଖା କରିବାକୁ ସେ ଚିକିତ୍ସାଧିନ ହସ୍ପିଟାଲରେ ପହଞ୍ଚିଥିଲେ ।