ନୂଆଦିଲ୍ଲୀ: ମଣିପୁର ରାଜନୀତିରେ ଘଡିକେ ଘୋଡା ଛୁଟୁଛି । କେତେବେଳେ ବିଜେପି ଛାଡି ସହଯୋଗୀ ଏନପିପି ସରକାରଙ୍କୁ ଅସ୍ଥିରତା ଭିତରକୁ ଠେଲିଦେଉଛି । ତ କେତେବେଳେ ପୁଣି ସହଯୋଗର ହାତ ବଢାଉଛି । ତେବେ ଏସବୁ ଭିତରେ ଏବେ ମଣିପୁରର ଏନ ବିରେନ ସିଂ ସରକାରଙ୍କୁ ମନ୍ତ୍ରିମଣ୍ଡଳ ପୁର୍ନଃଗଠନ କରିବାକୁ ସମସ୍ୟା ଦେଖାଦେଇପାରେ ବୋଲି ଚର୍ଚ୍ଚା ହେଉଛି ।
ଏନେଇ ଆଜି ମୁଖ୍ୟମନ୍ତ୍ରୀ ଦିଲ୍ଲୀ ଆସି ବିଜେପି ଶୀର୍ଷ ନେତୃତ୍ବଙ୍କ ସହିତ ଆଲୋଚନା କରିପାରନ୍ତି ବୋଲି ସୂଚନା ମିଳିଛି । ରାଜନୈତିକ ଅସ୍ଥିରତା ପରେ ଏବେ ମନ୍ତ୍ରୀ ପଦ ପାଇଁ ଅଧିକାଂଶ ବିଧାୟକ ଦାବି କରୁଥିବାରୁ ସେନେଇ ମୁଖ୍ୟମନ୍ତ୍ରୀ ଶୀର୍ଷ ନେତୃତ୍ବଙ୍କ ସହିତ ଆଲୋଚନା ପାଇଁ ଯାଉଥିବା ମଣିପୁରରେ ଚର୍ଚ୍ଚା ଚାଲିଛି ।
ସୂଚନାଥାଉକି, କିଛିଦିନ ହେବ ମଣିପୁରରେ ରାଜନୈତିକ ଅସ୍ଥିରତା ଦେଖାଦେଇଥିଲା । 3 ବିଜେପି ବିଧାୟକ ଇସ୍ତଫା ଦେଇ କଂଗ୍ରେସରେ ଯୋଗଦେବା ତଥା ସହଯୋଗୀ ଏନପିପିର ସମୁଦାୟ 4 ବିଧାୟକ ହାତ ଛାଡି ଦେଇଥିବାରୁ ସରକାର ସଙ୍କଟରେ ଥିଲେ । ପରିସ୍ଥିତି ଏପରି ହୋଇଥିଲା ଯେ କଂଗ୍ରେସ ସେଠାରେ ଅନାସ୍ଥା ପ୍ରସ୍ତାବ ଆଣିଥିଲା ।
ଏହାକୁ ଲକ୍ଷ୍ୟ କରି ବିଜେପି ପକ୍ଷରୁ ସରକାରଙ୍କୁ ବଞ୍ଚାଇବା ପାଇଁ ଜୋରସୋରରେ ପ୍ରସ୍ତୁତି ଆରମ୍ଭ ହୋଇଥିଲା । ଏନପିପି ନେତା ତଥା ମେଘାଳୟ ମୁଖ୍ୟମନ୍ତ୍ରୀଙ୍କ ସହିତ 4 ବିଧାୟକଙ୍କୁ ଦିଲ୍ଲୀ ଡକରା ଯାଇ ଆଲୋଚନା କରାଯାଇଥିଲା । ପରେ ଏନପିପି ଗୁରୁବାର ପୁଣି ନିଜ ସମର୍ଥନ ସରକାରଙ୍କୁ ଦେଇଥିଲା ।
ତେବେ ସମର୍ଥନ ପ୍ରତ୍ୟାହାର ପୂର୍ବରୁ ଏନପିପିର 4 ବିଧାୟକ ମନ୍ତ୍ରୀ ଥିବାବେଳେ ଏବେ ପୁଣି ମନ୍ତ୍ରିମଣ୍ଡଳ ପୁର୍ନଃଗଠନବେଳେ ସେମାନଙ୍କୁ ମନ୍ତ୍ରୀ ପଦ ଦିଆଯିବ ବୋଲି କୁହାଯାଇଥିବା ସୂଚନା ମିଳିଛି । ସେହିପରି ବିଜେପିର ଅନ୍ୟତମ ସହଯୋଗୀ ଏନପିଏଫର 4 ବିଧାୟକ ଥିବାବେଳେ 2 ଜଣ ମନ୍ତ୍ରୀ ଅଛନ୍ତି । ଏନପିପି ଭଳି ସେମଧ୍ୟ ଆଉ 2 ବିଧାୟକଙ୍କୁ ମନ୍ତ୍ରୀ କରିବା ନେଇ ଚାପ ପକାଉଥିବା ଗଣମାଧ୍ୟମରେ ଚର୍ଚ୍ଚା ହେଉଛି ।
ସେପଟେ ଏସବୁ ବାଦ, କିଛି ବିଧାୟକ ମଧ୍ୟ ମନ୍ତ୍ରୀ ହେବା ପାଇଁ ଗୋଡ ଟେକି ବସିଛନ୍ତି । ଯାହା ମୁଖ୍ୟମନ୍ତ୍ରୀଙ୍କ ଚିନ୍ତାର କାରଣ ସାଜିଥିବା କୁହାଯାଉଛି । ତେବେ ମଣିପୁରରେ ମୁଖ୍ୟମନ୍ତ୍ରୀଙ୍କୁ ମିଶାଇ 12 ଜଣ ମନ୍ତ୍ରୀ ଥିଲେ । ସେଥିରେ ବିଜେପିରୁ 6, ଏନପିପିରୁ 4 ଓ ଏନପିଏଫରୁ 2 ଜଣ ରହିଥିଲେ ।
