ନୂଆଦିଲ୍ଲୀ: କୋରୋନା ଭାଇରସ ସଂକ୍ରମଣ ହେତୁ ଲୋକପାଳ ସଦସ୍ୟ ଅବସରପ୍ରାପ୍ତ ଜଷ୍ଟିସ ଏ.କେ ତ୍ରିପାଠୀଙ୍କର ମୃତ୍ୟୁ ଘଟିଛି । ମୃତ୍ୟୁ ବେଳକୁ ତାଙ୍କୁ 62 ବର୍ଷ ହୋଇଥିଲା । ଏପ୍ରିଲ 2 ରେ ତାଙ୍କୁ ଦିଲ୍ଲୀ AIIMS ରେ ଭର୍ତ୍ତି କରାଯାଇଥିଲା ।
ଛତିଶଗଡ ହାଇକୋର୍ଟର ପୂର୍ବତନ ପ୍ରଧାନ ବିଚାରପତି ଜଷ୍ଟିସ୍ ତ୍ରିପାଠୀ AIIMS ରେ ଟ୍ରମା କେୟାର ସେଣ୍ଟରର ଆଇସିୟୁରେ ଥିଲେ । ତାଙ୍କ ଅବସ୍ଥା ଗୁରୁତର ହେବା ପରେ ତାଙ୍କୁ ଭେଣ୍ଟିଲେଟରରେ ମଧ୍ୟ ରଖାଯାଇଥିଲା । ତେବେ ଶନିବାର ରାତିରେ ତାଙ୍କର ଦେହାନ୍ତ ହୋଇଛି ।
ଜଷ୍ଟିସ୍ ତ୍ରିପାଠୀ ଦୁର୍ନୀତି ନିବାରଣ ଓମ୍ବୁଡସମ୍ୟାନ ଲୋକପାଳଙ୍କ ଚାରିଜଣ ନ୍ୟାୟିକ ସଦସ୍ୟଙ୍କ ମଧ୍ୟରୁ ଜଣେ ଥିଲେ । ସେ ଗତ ମାର୍ଚ୍ଚ 20 ରେ ଅଫିସ ଯାଇଥିଲେ। ଏହାପରେ ସେ କୋରୋନା ପଜିଟିଭ ଚିହ୍ନଟ ହୋଇଥିଲେ । ପରେ ଲୋକପାଳ ଅଫିସକୁ ସମ୍ପୂର୍ଣ୍ଣ ଭାବରେ ସାନିଟାଇଜ କରାଯାଇଥିଲା । ଏହାସହ ଦିଲ୍ଲୀର କିଡୱାଇ ନାଗରରେ ରହୁଥିବା ସମସ୍ତ ଲୋକପାଳ ସଦସ୍ୟଙ୍କର ଆପାର୍ଟମେଣ୍ଟ ମଧ୍ୟ ସାନିଟାଇଜ ହୋଇଥିଲା ।
ତେବେ ଏଠାରେ ସୂଚନା ଥାଉ ଯେ ଜଷ୍ଟିସ ଏ.କେ ତ୍ରିପାଠୀଙ୍କ ଝିଅ ଓ ରୋଷେଇଆ ମଧ୍ୟ କୋଭିଡ-19 ପଜିଟିଭ ଚିହ୍ନଟ ହୋଇଥିଲେ । ଯେଉଁମାନେ ଏବେ କୋରୋନା ମୁକ୍ତ ଅଛନ୍ତି ।
