ଆଜି ଲାଲୁଙ୍କ ଭାଗ୍ୟପରୀକ୍ଷା: ମୁକୁଳିବେ ନା ରହିବେ, ସୁପ୍ରିମକୋର୍ଟ ନେବେ ନିଷ୍ପତ୍ତି

ଆଜି ସୁପ୍ରିମକୋର୍ଟରେ ଲାଲୁ ପ୍ରସାଦ ଯାଦବଙ୍କ ଭାଗ୍ୟପରୀକ୍ଷା । ଗୋଖାଦ୍ୟ ଦୁର୍ନୀତି ମାମଲାରେ ଲାଲୁଙ୍କ ଜାମିନ ଶୁଣାଣି କରିବେ ସର୍ବୋଚ୍ଚ ନ୍ୟାୟାଳୟ ।

ନୂଆଦିଲ୍ଲୀ: ଆଜି ପୂର୍ବତନ କେନ୍ଦ୍ରମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ଭାଗ୍ୟପରୀକ୍ଷା ହେବାକୁ ଯାଉଛି । ସୁପ୍ରିମକୋର୍ଟରେ ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁଙ୍କ ଜାମିନର ଶୁଣାଣି ହେବ । ଗୋଖାଦ୍ୟ ମାମଲାରେ ଗିରଫ ହୋଇ ଡିସେମ୍ବର 2017ରୁ ଲାଲୁ ଜେଲରେ ଅଛନ୍ତି ।

ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିବେ । ପୂର୍ବରୁ ଝାଡଖଣ୍ଡ ଉଚ୍ଚ ନ୍ୟାୟାଳୟ ଗତ ଜାନୁୟାରୀ ୧୦ ତାରିଖରେ ଲାଲୁଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ । ସ୍ବାସ୍ଥ୍ୟବସ୍ଥା ଖରାପ ଥିବା ନେଇ ଜାମିନ ଆବେଦନ କରିଥିଲେ ଲାଲୁ ।

ତେବେ ଝାଡଖଣ୍ଡ ହାଇକୋର୍ଟଙ୍କ ନିଷ୍ପତ୍ତି ବିରୋଧରେ ଲାଲୁଙ୍କ ଓକିଲ ସୁପ୍ରିମକୋର୍ଟରେ ଦ୍ୱାରସ୍ଥ ହୋଇଥିଲେ । ନିଜ ଖରାପ ସ୍ବାସ୍ଥ୍ୟ ଓ ବୟସାଧିକ କାରଣ ଦର୍ଶାଇ ଲାଲୁ ଜାମିନ ଦେବାକୁ ସର୍ବୋଚ୍ଚ ନ୍ୟାୟାଳୟରେ ଆବେଦନ କରିଛନ୍ତି । ବର୍ତ୍ତମାନ ସେ ରାଞ୍ଚିର ରାଜେନ୍ଦ୍ର ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସରେ ଚିକିତ୍ସିତ ହେଉଛନ୍ତି । ଗୋଖାଦ୍ୟ ଦୁର୍ନୀତି ମାମଲାରେ ଗତ ୨୦୧୭ ଡିସେମ୍ବର ମାସରୁ ଗିରଫ ହୋଇ ସେ ଜେଲରେ ରହୁଛନ୍ତି ।