ପାଟନା: ମୋକ୍ଷର ସହର ଗୟାରେ ଚାଲିଛି ପିତୃପକ୍ଷ । ପିତୃପକ୍ଷର ଆଜି ହେଉଛି ତ୍ରୟୋଦଶ ଦିବସ । ତ୍ରୟୋଦଶ ତିଥିରେ ତିନୋଟି ବେଦୀରେ ପିଣ୍ଡ ଅର୍ପଣ କରିବାର ପରମ୍ପରା ରହିଆସିଛି । ଏହି ପକ୍ଷର ତ୍ରୟୋଦଶ ତିଥିରେ ଭୀମ ଗୟା, ଗୌ ଗୟା ଏବଂ ଗଦାଲୋଲ ବେଦୀରେ ପିଣ୍ଡ ଦାନର ବିଧି ରହିଆସିଛି ।
ଭୀମ ଗୟା ବେଦୀ
ଦେଶବିଦେଶରୁ ଆସୁଥିବା ଅନେକ ଶ୍ରଦ୍ଧାଳୁ ଏଠାରେ ବିଶ୍ବାସ ଓ ପରମ୍ପରା ଅନୁଯାୟୀ ପିଣ୍ଡ ଦାନ କରିଥାନ୍ତି । ତେବେ ପରମ୍ପରା ଅନୁଯାୟୀ ଶ୍ରଦ୍ଧାଳୁମାନେ ପ୍ରଥମେ ଫଲ୍ଗୁ ନଦୀରେ ସ୍ନାନ କରି ସାରିବା ପରେ ଭୀମ ଗୟାରେ ପିଣ୍ଡ ଦାନ କରିଥାନ୍ତି । ଭୀମ ଗୟା ଏଠାରେ ଥିବା ମଙ୍ଗଳା ଗୟା ମନ୍ଦିର ରାସ୍ତାରେ ହିଁ ପଡ଼ିଥାଏ । ଗାଧୋଇ ସାରିବା ପରେ ଶ୍ରଦ୍ଧାଳୁ ଏହି ବେଦୀକୁ ଯାଇ ପିଣ୍ଡ ଅର୍ପଣ କରିଥାନ୍ତି ।
କୁହାଯାଏ ଏଠାରେ ଭୀମ ବାମପଟ ଗୋଡ଼ ମାଡ଼ି ଶ୍ରାଦ୍ଧ ଦେଇଥିଲେ । ଆଜି ମଧ୍ୟ ତାଙ୍କର ପାଦ ଚିହ୍ନ ଏଠାରେ ଦେଖିବାକୁ ମିଳେ । ଏହି ବେଦୀରେ ପିଣ୍ଡ ଦାନ କଲେ ପିତୃପୁରୁଷ ମୋକ୍ଷଲାଭ କରିଥାନ୍ତି ବୋଲି ପୌରାଣିକ ତଥ୍ୟରୁ ଜଣାପଡ଼େ ।
ଗୌ ପ୍ରଚାର ବେଦୀ
ସେହିଭଳି ଗୌ ପ୍ରଚାର ବେଦୀରେ ମଧ୍ୟ ଆଜିର ଦିନରେ ଶ୍ରଦ୍ଧାଳୁମାନେ ପିଣ୍ଡଦାନ କରିଥାନ୍ତି । କୁହାଯାଏ ଗୌ ପ୍ରଚାର ବେଦୀରେ ବ୍ରହ୍ମା ଯଜ୍ଞ କରିଥିଲେ । ଏହି ଯଜ୍ଞ ସମୟରେ ଗାଈମାନଙ୍କୁ ସେ ଯେଉଁ ପର୍ବତ ଉପରେ ରଖିଥିଲେ, ତାକୁ ଗୋଚର ବେଦୀ କୁହାଯାଉଥିଲା । ଏହି ଗୋଚର ବେଦୀରେ ଆଜି ମଧ୍ୟ ଗାଈମାନଙ୍କ ପାଦ ଚିହ୍ନ ଦେଖିବାକୁ ମିଳେ । ଏହା ସହିତ ବ୍ରହ୍ମା ପଣ୍ଡା ସମ୍ପ୍ରଦାୟର ଲୋକମାନଙ୍କୁ 50 ହଜାରରୁ ଊର୍ଦ୍ଧ୍ବ ଗାଈଙ୍କୁ ଦାନ ଦେଇଥିଲେ ।
ଏଠାରେ ପିଣ୍ଡଦାନ କଲେ ପିତୃପୁରୁଷଙ୍କ ଆତ୍ମା ବିଷ୍ଣୁଲୋକ ଗମନ କରେ । ଏହା ସହିତ ଶ୍ରଦ୍ଧାଳୁମାନେ ବ୍ରାହ୍ମଣଙ୍କୁ ଭୋଜନ କରାଇଲେ ତାହା କୋଟିଏ ବ୍ରାହ୍ମଣଙ୍କ ଭୋଜନ ସହ ସମାନ ବୋଲି ବିଶ୍ବାସ ରହିଛି ।