ବେଙ୍ଗାଲୁରୁ: ଚଳିତ ଲୋକସଭା ନିର୍ବାଚନକୁ ଆଉ ମାତ୍ର କେଇ ଘଣ୍ଟା ବାକିଥିବା ବେଳେ ପ୍ରଚାର କାର୍ଯ୍ୟକୁ ଜୋରଦାର କରିଛନ୍ତି ସମସ୍ତ ଦଳ। ଭୋଟରଙ୍କୁ ଆକୃଷ୍ଟ କରିବାକୁ କିଛି ବି କରୁଛନ୍ତି ନେତାଏ । ଏହି ଅବସରରେ କର୍ଣ୍ଣାଟକର ଜଣେ ମନ୍ତ୍ରୀଙ୍କ ନାଗିନ ଡ୍ୟାନ୍ସ ଏବେ ଚର୍ଚ୍ଚାର ବିଷୟ ପାଲଟିଛି।
କର୍ଣ୍ଣାଟକର ଗୃହ ଓ ଆବାସ ମନ୍ତ୍ରୀ ଏମଟିବି ନାଗରାଜଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଏଥିରେ ସେ ଏକ ନିର୍ବାଚନୀ ରାଲିରେ ନାଗିନ ଡ୍ୟାନ୍ସ କରୁଥିବାର ନଜର ଆସିଛନ୍ତି । ହୋସକୋଟେରେ ପ୍ରଚାର କରୁଥିବା ସମୟରେ ନାଗରାଜଙ୍କର ଏକ ଭିଡିଓ ଭାଇରାଲ ହୋଇଛି । ପ୍ରଥମେ କିଛି ଲୋକ ଏହି ଡ୍ୟାନ୍ସ ଆରମ୍ଭ କରିଥିବାବେଳେ ଅଳ୍ପ ସମୟ ପରେ ନାଗରାଜ ତାଙ୍କ ସହ ମିଶିଥିଲେ।
ରିପୋର୍ଟ ଅନୁସାରେ ମଙ୍ଗଳବାର ସନ୍ଧ୍ୟାରେ ହୋସକୋଟେର କଟିଗେନାହଲି ଗାଁରେ ନିଜ ସମର୍ଥକଙ୍କ ସହ ପହଞ୍ଚିଥିଲେ ନାଗରାଜ । ଚିକ୍କବଲପୁରାରେ ଲୋକସଭା ପ୍ରାର୍ଥୀ ହୋଇଥିବା କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ବିରପ୍ପା ମୋଇଲିଙ୍କ ପାଇଁ ସେ ସେଠାରେ ପ୍ରଚାର କରୁଥିଲେ । ତେବେ ତାଙ୍କ ରାଲିର ଆଗରେ ଏକ ମ୍ୟୁଜିକ ବ୍ୟାଣ୍ଡ୍ ଚାଲିଥିଲା । ହଠାତ୍ ଏହି ବ୍ୟାଣ୍ଡ୍ ଲୋକପ୍ରିୟ ମ୍ୟୁଜିକ ନାଗିନ ବଜାଇବା ଆରମ୍ଭ କରିଥିଲା ।
ଯେତେବେଳେ ଏହି ‘ମନ ଡୋଲା ମେରା ତନ ଡୋଲା’ ଗୀତ ବାଜିବା ଆରମ୍ଭ ହୋଇଥିଲା ସେତେବେଳେ 67 ବର୍ଷିୟ ନାଗରାଜ ଆଉ ନିଜକୁ ସମ୍ଭାଳି ପାରିନଥିଲେ । ଧିରେ ଧିରେ ସେ ରାସ୍ତା ମଝିରେ ଏହି ଗୀତରେ ନାଗିନ ଭଳି ହାତ କରି ନାଚିବା ଆରମ୍ଭ କରିଦେଇଥିଲେ । ଏହାପରେ ତାଙ୍କୁ ଯୋଗ ଦେଇଥିଲେ ତାଙ୍କ ସମର୍ଥକ ଓ କଂଗ୍ରେସ କର୍ମୀ । ଲଗାତାର 10 ମିନିଟ୍ ଯାଏଁ ସେ ନାଚିବାରେ ଲାଗିଥିଲେ । ତେବେ ସେ ଏତେ ଜୋରରେ ନାଚୁଥିଲେ ଯେ ପାଖରେ ଥିବା ଲୋକେ ତାଙ୍କ ବୟସ ଦୃଷ୍ଟିରୁ ତାଙ୍କୁ ରହିଯିବା ପାଇଁ କହୁଥିବା ଦେଖିବାକୁ ମିଳିଥିଲା ।
ତେବେ ରାଲିରେ ନାଚିବା ମନ୍ତ୍ରୀଙ୍କ ପାଇଁ କୌଣସି ନୂଆ କଥା ନୁହେଁ । ନିକଟରେ ଉତ୍ତର ପ୍ରଦେଶ ଶାହଜାନପୁରର ଜଣେ ପ୍ରାର୍ଥୀ ଜ୍ବାଇଁ ବେଶରେ ଘୋଡା ଚଢି ନାମାଙ୍କନ ଦାଖଲ କରିବାକୁ ଆସିଥିଲେ। ଏହି ଅବସରରେ ସେ ଲୋକପ୍ରିୟ ବଲିଉଡ ଗୀତରେ ନାଚୁଥିବା ଦେଖିବାକୁ ମିଳିଥିଲା । ଏହାଛଡା ଅନେକ ସମୟରେ ବିହାର ଏବଂ ଝାଡଖଣ୍ଡର ମନ୍ତ୍ରୀ ଓ ନେତାଙ୍କୁ ବିଭିନ୍ନ ଫିଲ୍ମ ଗୀତରେ ନାଚୁଥିବାର ଦେଖିବାକୁ ମିଳିଥାଏ ।
