ମୁମ୍ବାଇ: ମୁମ୍ବାଇ ବାନ୍ଦ୍ରାସ୍ଥିତ ମିଠା ଦୋକାନର ନାମ 'କରାଚି ସ୍ବିଟ୍ସ’ କୁ ନେଇ ଦିନକୁ ଦିନ ବଢୁଛି ବିବାଦ । ଏବେ ଏହାକୁ ନେଇ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଏକ ବୟାନ ଦେଇଛନ୍ତି । ସେ କହିଛନ୍ତି ଯେ, ଆମେ ଅଖଣ୍ଡ ଭାରତ ଉପରେ ବିଶ୍ବାସ ରଖୁ । ଦିନେ ନା ଦିନେ କରାଚି ଭାରତର ଅଂଶ ହେବ ।
କିଛିଦିନ ପୂର୍ବରୁ ଶିବସେନା କର୍ମୀ ନିତିନ ନନ୍ଦଗାଓଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଯେଉଁଥିରେ ସେ ଜଣେ ମିଠା ଦୋକାନୀ ମାଲିକଙ୍କୁ ଦୋକାନ ନାଁ ବଦଳାଇବାକୁ କହିଥିଲେ । ମିଠା ଦୋକାନର ନା କରାଚି ସ୍ବିଟ୍ସ ଥିବା ହେତୁ ସେ ଏହାକୁ ବଦଳାଇ ତାଙ୍କ ବାପା କିମ୍ବା ଜେଜେ ବାପାଙ୍କ ନାଁ ରେ ଦେବା ପାଇଁ କହିଥିଲେ । କରାଚି ପାକିସ୍ତାନର ଏକ ସହର ହୋଇଥିବା ଏହି ନାଁ ମୁମ୍ବାଇରେ ବ୍ୟବହାର ନ କରିବାକୁ କହିଥିବା ଦେଖିବାକୁ ମିଳିଥିଲା । ତେବେ ଏହି ଭିଡିଓ ସାମନାକୁ ଆସିବା ପରେ ବିବାଦ ଘେରକୁ ଟାଣି ହୋଇଛି ଶେବସେନା ।