ଚଣ୍ଡିଗଡ଼: ପୁଣି ସାମ୍ନାକୁ ଆସିଲା ଆଉ ଜଣେ ଭଣ୍ଡ ବାବାଙ୍କ କଳା କାରନାମା । ଲୋକଙ୍କୁ ଶସ୍ତାରେ ସୁନା ବିକ୍ରି କରି, ବିଦେଶ ପଠାଇବା ଏବଂ ସେମାନଙ୍କ ଟଙ୍କା ଦୁଇ ଗୁଣ କରିବାର ଲୋଭ ଦେଖାଇ 100 କୋଟି ଟଙ୍କା ଠକିଥିଲେ ହରିୟାଣାର କ୍ୟାଣ୍ଡି ବାବା (ଛଦ୍ମନାମ ରାଜେଶ) ।
ଶେଷରେ ଫରିଦାବାଦରୁ ହରିୟାଣା ପୋଲିସର କ୍ରାଇମବ୍ରାଞ୍ଚ ତାଙ୍କୁ ଗିରଫ କରିଛି। ବର୍ତ୍ତମାନ ତାଙ୍କୁ ପୋଲିସ ହେପାଜତକୁ ପଠାଯାଇଛି । ପୋଲିସ କହିବା ମୁତାବକ, ରାଜେଶ 2018ରୁ ଫେରାର ଥିଲେ । ସୋମବାର ବିଳମ୍ବିତ ରାତିରେ ତାଙ୍କୁ ଫରିଦାବାଦ ସେକ୍ଟର -30ରୁ ପୋଲିସ ଗିରଫ କରିଥିଲା ।
ମଙ୍ଗଳବାର ତାଙ୍କୁ ସ୍ଥାନୀୟ କୋର୍ଟରେ ହାଜର କରାଯାଇଥିଲା, ସେଠାରେ ଏହି ଠକକୁ 10 ଦିନ ପୋଲିସ ହେପାଜତକୁ ନିଆଯାଇଥିଲା । ପୋଲିସ ସୂଚନା ମୁତାବକ, ରାଜେଶ ମୁଖ୍ୟତଃ କୁରୁକ୍ଷେତ୍ର ଶରିଫଗଡ଼ର ବାସିନ୍ଦା । ଆରମ୍ଭରେ ସେ ନିଜକୁ ବାବା ବୋଲି ଦର୍ଶାଇ ନିଜର ଭକ୍ତମାନଙ୍କୁ କ୍ୟାଣ୍ଡି ବାଣ୍ଟି ବାଣ୍ଟି ଶେଷରେ ନିଜକୁ 'କ୍ୟାଣ୍ଡି ବାବା' ନାମ ଦେଇଥିଲା ।
ଫରିଦାବାଦ ବ୍ୟତୀତ ସେ ଅନେକ ଜିଲ୍ଲାର ଲୋକଙ୍କୁ ମଧ୍ୟ ପ୍ରତାରଣା କରିଛନ୍ତି। ସମସ୍ତଙ୍କୁ ଶସ୍ତା ସୁନା ବିକ୍ରୟ କରିବା, ବିଦେଶ ପଠାଇବା ଏବଂ ଟଙ୍କାକୁ ଦ୍ୱିଗୁଣିତ କରିବା ଲୋଭ ଦେଖାଇ ସମସ୍ତଙ୍କୁ ଠକି ଚାଲିଥିଲେ । ଯେତେବେଳେ ଲୋକମାନେ ତାଙ୍କୁ ସନ୍ଦେହ କରିବା ଆରମ୍ଭ କଲେ, ସେ ଖସି ପଳାଇଲେ |
ଫରିଦାବାଦ ବ୍ୟତୀତ ରାଜ୍ୟର ଅନେକ ଜିଲ୍ଲାରେ ତାଙ୍କ ବିରୋଧରେ ପ୍ରାୟ 30 ଟି ମାମଲା ରୁଜୁ ହୋଇଛି ବୋଲି ସିଆଇଏ ଦାୟିତ୍ୱରେ ଥିବା ସୁରେନ୍ଦ୍ର ସିଂ କହିଛନ୍ତି । ଖବର ଅନୁଯାୟୀ, ଲକଡାଉନ ହେତୁ ରାଜେଶ ଫରିଦାବାଦରେ ଛଦ୍ମବେଶରେ ଲୁଚି ରହୁଥିଲେ। ତାଙ୍କ ପାଖରୁ ଏକ ପିସ୍ତଲ ମଧ୍ୟ ଉଦ୍ଧାର କରାଯାଇଛି। ସୂଚନା ଅନୁଯାୟୀ, ହରିୟାଣା ବ୍ୟତୀତ ପଞ୍ଜାବ ପୋଲିସ ମଧ୍ୟ ଏହା ପଛରେ ଥିଲା।
