ରାଞ୍ଚି: ଝାଡଖଣ୍ଡ ବିଧାନସଭା ନିର୍ବାଚନରେ ମୁଖ୍ୟମନ୍ତ୍ରୀ ରଘୁବର ଦାସ ଜାମସେଦପୁର ପୂର୍ବ ଆସନରୁ ପ୍ରତିଦ୍ବନ୍ଦିତା କରୁଛନ୍ତି । ମୁଖ୍ୟମନ୍ତ୍ରୀଙ୍କ ବିରୋଧରେ କଂଗ୍ରେସ ଏହି ଆସନରୁ ଦଳର ରାଷ୍ଟ୍ରୀୟ ମୁଖପାତ୍ର ଗୌରଭ ବଲ୍ଲଭଙ୍କୁ ପ୍ରାର୍ଥୀ କରିଛି। ଏନେଇ ଦଳ ବିଧିବଦ୍ଧ ଭାବେ ଗୌରଭଙ୍କ ନାଁ ଘୋଷଣା କରିଛି।
ଗୌରଭ ବଲ୍ଲଭ ଜାମସେଦପୁର ସ୍ଥିତ ଏକ୍ସଏଲଆରଆଇ ମ୍ୟାନେଜମେଣ୍ଟ ମହାବିଦ୍ୟାଳୟରେ ପ୍ରଫେସର ଅଛନ୍ତି । ଜଣେ ସ୍ପଷ୍ଟ ବକ୍ତା, ପ୍ରଚଣ୍ଡ ଶବ୍ଦ ଆକ୍ରମଣରେ ସିଦ୍ଧହସ୍ତ ଗୌରବ ଜାତୀୟ ସ୍ତରରେ ଦଳର ପ୍ରସଙ୍ଗକୁ ଦୃଢତାର ସହ ରଖିଥାନ୍ତି । ତାଙ୍କୁ ଦଳ ମୁଖ୍ୟମନ୍ତ୍ରୀଙ୍କ ବିରୋଧରେ ପ୍ରାର୍ଥୀ କରିବା ଏବେ ବିଜେପି ପାଇଁ ଚିନ୍ତା ବଢାଇ ଦେଇଛି। ଝାଡଖଣ୍ଡରେ ଆରଜେଡି, ଜେଏମଏମ ଓ କଂଗ୍ରେସ ମଧ୍ୟରେ ଗଠବନ୍ଧନ ହୋଇଛି । ଏହି ଗଠବନ୍ଧନରେ କଂଗ୍ରେସକୁ 31 ସିଟ ମିଳିଛି ।
ମୁଖ୍ୟମନ୍ତ୍ରୀ ରଘୁବର ଦାସ ଜାମସେଦପୁର ପୂର୍ବ ଆସନରୁ ଲଗାତାର 5ଥର ହେଲା ବିଜୟୀ ହୋଇ ଆସୁଛନ୍ତି । 2005ରେ ଏହି ଆସନରୁ ରଘୁବର ଦାସ କଂଗ୍ରେସ ପ୍ରାର୍ଥୀ ରାମ ଆସରେ ପ୍ରସାଦଙ୍କୁ ପରାସ୍ତ କରିଥିଲେ । ଏହାପରେ 2009ରେ ଝାଡଖଣ୍ଡ ବିକାଶ ମୋର୍ଚ୍ଚାର ଅଭୟ ସିଂକୁ ପରାସ୍ତ କରିଥିଲେ । 2014 ନିର୍ବାଚନରେ ପୁଣି କଂଗ୍ରେସ ପ୍ରାର୍ଥୀ ଆନନ୍ଦ ବିହାରୀଙ୍କୁ ପରାସ୍ତ କରି ହ୍ୟାଟ୍ରିକ ବିଜୟୀ ହୋଇଥିଲେ ।