ଶ୍ରୀନଗର: ଜମ୍ମୁ ଓ କାଶ୍ମୀରର ହାଣ୍ଡୱାରା ଇଲାକାରୁ ଲସ୍କର-ଏ-ତୋଏବା ଆତଙ୍କବାଦୀ ସଂଗଠନର ଦୁଇ ଜଣ ସହଯୋଗୀଙ୍କୁ ଗିରଫ କଲେ ସୁରକ୍ଷାକର୍ମୀ। ଦୁଇ ଅଭିଯୁକ୍ତଙ୍କ ନିକଟରୁ ଦୁଇଟି ଏକେ-47 ରାଇଫଲ ଓ 40 ରାଉଣ୍ଡ ଏକେ-47 ଗୁଳି ଜବତ ହୋଇଛି। ଗିରଫ ହୋଇଥିବା ଦୁଇ ଅଭିଯୁକ୍ତ କାଶ୍ମୀରର ହାୟନ ତ୍ରେହଗାମ କୁପୱାଡା ଅଞ୍ଚଳ ବାସିନ୍ଦା ବୋଲି ଜଣା ପଡ଼ିଛି। ସୁରକ୍ଷାକର୍ମୀ ହାଣ୍ଡୱାରା ନିକଟରେ ବିଭିନ୍ନ ଗାଡ଼ି ଯାଞ୍ଚ ଚଳାଇଥିଲେ। ଏହି ସମୟରେ ଲସ୍କର-ଏ-ତୋଏବା ଆତଙ୍କବାଦୀ ସଂଗଠନର ଦୁଇ ସହଯୋଗୀ ଧରା ପଡ଼ିଥିଲେ।
ଆଜି(ଶୁକ୍ରବାର) 21 ରାଷ୍ଟ୍ରୀୟ ରାଇଫଲ୍ସ, 92 ବାଟାଲିୟନ ସିଆରପିଏଫ ପକ୍ଷରୁ ହାଣ୍ଡୱାରାର ବିଭିନ୍ନ ସ୍ଥାନରେ ପଥଚାରୀ ଏବଂ ଗାଡ଼ି ଚାଳକଙ୍କୁ ଅଟକାଇ ଯାଞ୍ଚ ଚଳାଇଥିଲା। ଚିନାର ପାର୍କ ନିକଟରେ ଲିୟାକତ ଅହମ୍ମଦ ମିର ଓ ଆକିବ ରାସିଦ ମିର ନାମକ ଦୁଇ ଯୁବକ ଏକ ବାଇକ ନେଇ ଯାଉଥିଲେ। ସୁରକ୍ଷାକର୍ମୀ ସେମାନଙ୍କୁ ଅଟକାଇବାରୁ ସେମାନେ ସେଠାରୁ ଫେରାର ହେବାକୁ ଚେଷ୍ଟା କରିଥିଲେ। ତେବେ କୌଣସି ମତେ ସୁରକ୍ଷାକର୍ମୀ ସେମାନଙ୍କୁ କାବୁ କରି ନେଇଥିଲେ।
ଗିରଫ ଅଭିଯୁକ୍ତଙ୍କ ନିକଟରୁ ଦୁଇଟି ଆଧୁନିକ ଏକେ-47, 40 ରାଉଣ୍ଡ ଗୁଳି ଜବତ ହୋଇଥିଲା। ଏହି ଦୁଇଜଣ ବିଭିନ୍ନ ସ୍ଥାନକୁ ହତିଆର ପଠାଇବାକୁ ନିୟୋଜିତ ହୋଇଥିବା ନେଇ ଯାଞ୍ଚ ବେଳେ ଜଣା ପଡ଼ିଛି। ବିଶେଷ କରି ଉତ୍ତର କାଶ୍ମୀରରେ ଏହି ଦୁଇ ଆତଙ୍କୀ ସକ୍ରିୟ ରହିଥିଲେ। ଏନେଇ ସୁରକ୍ଷାକର୍ମୀ ସୂଚନା ଦେଇଛନ୍ତି।