ହାଇଦ୍ରାବାଦ: କୋରୋନା ପ୍ରକୋପରେ ସାରା ବିଶ୍ବରେ ଏବେ ତାଲାବନ୍ଦୀ । ପ୍ରାୟ ସମସ୍ତ ଛୋଟ ବଡ ବ୍ୟବସାୟ ଠପ ହୋଇଥିବା ବେଳେ ଘରେ ଲକଡାଉନ ହୋଇଛି ସାଧାରଣ ଜୀବନ । ଏମିତିରେ ଘରେ ନବସି ନିଜ କାର୍ଯ୍ୟକୁ ପ୍ରାଥମିକତା ଦେଇଛନ୍ତି କିଛି ଏପରି କର୍ମଚାରୀ, ଯାହାଙ୍କ କାର୍ଯ୍ୟକୁ ନେଇ ସାଧାରଣରେ କେବେ ଚର୍ଚ୍ଚା ହୋଇନାହିଁ । ଏମାନେ ହେଉଛନ୍ତି ସାରା ବିଶ୍ବରେ ନିରବଚ୍ଛିନ୍ନ ଭାବେ 24 ଘଣ୍ଟା ସର୍ଭିସ ଯୋଗାଉଥିବା ଆଇଟି କର୍ମଚାରୀ ।
ବିଶ୍ବକୁ କୋରୋନା କବଳରୁ ବଞ୍ଚାଇବା ପାଇଁ ଡାକ୍ତରମାନଙ୍କ ଅବଦାନ ସତରେ ଅତୁଳନୀୟ ହେଲେ ଆମେ ଭୁଲିବା କଥା ନୁହେଁ କି ଏପରି ସମୟରେ ବିନା କିଛି ପ୍ରଶ୍ନରେ ନିରବଚ୍ଛିନ୍ନ ଭାବେ କାର୍ଯ୍ୟ କରି ଚାଲିଛନ୍ତି ଏହି ଆଇଟି କର୍ମଚାରୀ । କାରଣ ଏମାନେ ଯଦି କାମ ନକରିବେ ତାହେଲେ ହୁଏତ ବନ୍ଦ ହୋଇଯିବ ଦେଶ ବିଦେଶର କାରବାର । ଟିସିଏସ, ୱିପ୍ରୋ, ଇନଫୋସିସ ପରି ଆଇଟି କମ୍ପାନୀ ଏବେ ବି ଦିନରାତି କାର୍ଯ୍ୟରତ ରହି ବିଦେଶର ଅନେକ କମ୍ପାନୀମାନଙ୍କୁ ସକ୍ରିୟ ରଖିଛନ୍ତି ।
କେବଳ ବିଦେଶ ନୁହେଁ ଦେଶର ଅନେକ ବଡ ବଡ ହସ୍ପିଟାଲ ଓ କମ୍ପାନୀର ମେରୁଦଣ୍ଡ ଭଳି ମଧ୍ୟ ଏହି ଆଇଟି କମ୍ପାନୀମାନେ କାର୍ଯ୍ୟରତ । ଯଦି ଏହି କମ୍ପାନୀମାନେ କାର୍ଯ୍ୟ ବନ୍ଦ କରି ଘରେ ବସିଯିବେ ତାହେଲେ ହୁଏତ ଅନେକ ୱାର୍କ ଫ୍ରମ ହୋମ କର୍ମଚାରୀଙ୍କୁ ମିଳିପାରିବ ନାହିଁ ମାସିକ ବେତନ, ହୁଏତ ବନ୍ଦ ପଡିଯିବ ବ୍ୟାଙ୍କ ସର୍ଭିସ । କାରଣ ଆକାଉଣ୍ଟିଂ, ପେମେଣ୍ଟ, ବିଲିଂ, ହ୍ୟୁମାନ ରିସୋର୍ସ ଏବଂ ପେରୋଲ ଆଦି ଅତ୍ୟାବଶ୍ୟକୀୟ ସର୍ଭିସ ଏହି କମ୍ପାନୀମାନଙ୍କ ଦ୍ବାରା ଦେଶ ଏବଂ ବିଦେଶକୁ ଯୋଗାଇ ଦିଆଯାଉଛି ।
ଯେପରି ଡାକ୍ତରମାନେ ନିଜ ଘର ପରିବାରର ଚିନ୍ତା ନକରି ଦେଶ ସେବାରେ ଆଗେଇ ଆସିଛନ୍ତି, ଠିକ୍ ସେହିପରି ବିନା କୌଣସି ପ୍ରୋତ୍ସାହନରେ ନିଜ କାମ ଅତି ନିଷ୍ଠାର ସହ କରି ଚାଲିଛନ୍ତି ଆଇଟି କର୍ମଚାରୀ । ତେଣୁ ଯଦି କୋରୋନା ବିତ୍ପାତ ସମୟରେ ଡାକ୍ତର, ଗଣମାଧ୍ୟମ କର୍ମଚାରୀ, ସଫେଇ କର୍ମଚାରୀ ଓ ପୋଲିସମାନେ ଲୋକଙ୍କ ଆଦର ଓ ସହଯୋଗ ପାଇ ପାରୁଛନ୍ତି ସମାନ ଭାବେ ପ୍ରଚ୍ଛଦପଟ୍ଟ ନାୟକ ଭାବେ ଏହି ଆଇଟି କର୍ମଚାରୀମାନେ ମଧ୍ୟ ସହଯୋଗର ଆଶାୟୀ ଏବଂ ଏମାନଙ୍କ କାର୍ଯ୍ୟ ଶତ ପ୍ରଶଂସନୀୟ ।
