କୋରୋନା ଆକ୍ରାନ୍ତଙ୍କ ଅନ୍ତିମ ସଂସ୍କାର ପାଇଁ ଟଙ୍କା ଦାବି, ରାଗିଲେ ସମ୍ପର୍କୀୟ

କୋରୋନା ରୋଗୀଙ୍କ ଅନ୍ତିମ ସଂସ୍କାର ପାଇଁ ସମ୍ପର୍କୀୟଙ୍କୁ ଦେବାକୁ ପଡିବ 1150 ଟଙ୍କା । ଏଭଳି ଏକ ବିଜ୍ଞପ୍ତି ଜାରି କରିଛନ୍ତି ପଶ୍ଚିମବଙ୍ଗର ଡାବଗ୍ରାମ-ଫୁଲବାରି କର୍ତ୍ତୃପକ୍ଷ । ଯାହାକୁ ନେଇ ଲୋକଙ୍କ ମଧ୍ୟ ଆକ୍ରୋଶ ପ୍ରକାଶ ପାଇଛି ।

କୋଲକାତା: କୋରୋନା ରୋଗୀଙ୍କ ଅନ୍ତିମ ସଂସ୍କାର ପାଇଁ ସମ୍ପର୍କୀୟଙ୍କୁ ଦେବାକୁ ପଡିବ 1150 ଟଙ୍କା । ଏଭଳି ଏକ ବିଜ୍ଞପ୍ତି ଜାରି କରିଛି ପଶ୍ଚିମବଙ୍ଗର ଡାବଗ୍ରାମ-ଫୁଲବାରି କର୍ତ୍ତୃପକ୍ଷ । ଯାହାକୁ ନେଇ ଲୋକଙ୍କ ମଧ୍ୟ ଆକ୍ରୋଶ ପ୍ରକାଶ ପାଇଛି ।

ପଶ୍ଚିମବଙ୍ଗରେ କୋରୋନା ମାମଲା ଦ୍ରୁତ ଗତିରେ ବୃଦ୍ଧି ପାଉଥିବା ବେଳେ ଆକ୍ରାନ୍ତଙ୍କ ମୃତ୍ୟୁ ସଂଖ୍ୟା ମଧ୍ୟ ଦିନକୁ ଦିନ ବୃଦ୍ଧି ପାଉଛି । ତେବେ ଦାର୍ଜିଲିଂ ଏବଂ ଜଲପାଇଗୁଡା ଜିଲ୍ଲାରେ ଥିବା କୋଭିଡ ହସ୍ପିଟାଲର କୋରୋନା ରୋଗୀଙ୍କ ମୃତଦେହକୁ ଡାବଗ୍ରାମ-ଫୁଲବାରିରେ ଅନ୍ତିମ ସଂସ୍କାର କରାଯାଉଛି ।

ଡାବଗ୍ରାମ-ଫୁଲବାରି କର୍ତ୍ତୃପକ୍ଷ ଜାରି କରିଥିବା ବିଜ୍ଞପ୍ତି ଅନୁଯାୟୀ, କୋରୋନା ରୋଗୀଙ୍କ ମୃତଦେହ ଅନ୍ତିମ ସଂସ୍କାର ପାଇଁ ସମ୍ପର୍କୀୟଙ୍କୁ 1150 ଟଙ୍କା ଦେବାକୁ ପଡିବ । ଏହି ଟଙ୍କା ଅନ୍ତିମ ସଂସ୍କାର ପୂର୍ବରୁ ତିଆରୀ ବାଉଁଶ କୋକେଇ ପାଇଁ ନିଆଯିବ । ଯେହେତୁ କୋରୋନା ରୋଗୀଙ୍କ ଅନ୍ତିମ ସଂସ୍କାର ସମ୍ପର୍କୀୟମାନେ କରିପାରିବେ ନାହିଁ । ତେଣୁ ସମ୍ପୃକ୍ତ ଡାକ୍ତରଖାନା କର୍ତ୍ତୃପକ୍ଷ ମୃତକଙ୍କ ସମ୍ପର୍କୀୟଙ୍କ ଠାରୁ ଏହି ଟଙ୍କା ସଂଗ୍ରହ କରିବେ ।

ଏପଟେ ଏହି ବିଜ୍ଞପ୍ତିକୁ ନେଇ ମୃତକଙ୍କ ସମ୍ପର୍କୀୟଙ୍କ ମଧ୍ୟରେ ଆକ୍ରୋଶ ପ୍ରକାଶ ପାଇଛି । ସେମାନେ କହିଛନ୍ତି, କୋରୋନା ପାଇଁ ଦେଶରେ ଲାଗୁ ହୋଇଥିବା ଲକଡାଉନର ପ୍ରଭାବ ସମସ୍ତଙ୍କ ଉପରେ ପଡିଛି । ଏହି ପରିସ୍ଥିତିରେ ଅନ୍ତିମ ସଂସ୍କାରର ପାଇଁ 1150 ଟଙ୍କା ଦେବା ସମ୍ଭବ ନୁହେଁ।

ସିଲିଗୁରିର ବିଧାୟକ ତଥା ସିଲିଗୁରି ମ୍ୟୁନିସିପାଲିଟି କର୍ପୋରେସନର ଶାସକ ଦଳର ମୁଖ୍ୟ ଅଶୋକ ଭଟ୍ଟାଚାର୍ଯ୍ୟ ମଧ୍ୟ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି । ସେ କହିଛନ୍ତି, ‘ଏହା ଏକ ଅମାନବୀୟ ନିଷ୍ପତ୍ତି । ରାଜ୍ୟ ସରକାର ଏହି ନିଷ୍ପତ୍ତିକୁ ବିଚାର କରିବା ଉଚିତ୍ ।

ବ୍ୟୁରୋ ରିପୋର୍ଟ, ଇଟିଭି ଭାରତ