ନୂଆଦିଲ୍ଲୀ: ଲଦାଖର ଡେମଚୌକ ଅଞ୍ଚଳରେ ଗିରଫ ହୋଇଥିବା ଚୀନ ସୈନିକକୁ ସ୍ବଦେଶକୁ ହସ୍ତାନ୍ତର କଲା ଭାରତୀୟ ସେନା । କିଛି ଔପଚାରିକ କାଗଜପତ୍ର କାର୍ଯ୍ୟ ସଂପୂର୍ଣ୍ଣ ପରେ ମଙ୍ଗଳବାର ରାତିରେ ଚୁସୁଲ ଠାରେ ସୈନିକକୁ ପିପୁଲ୍ସ ଲିବେରେସନ ଆର୍ମିକୁ ହସ୍ତାନ୍ତର କରାଯାଇଛି ।
ସୂଚନା ଅନୁଯାୟୀ, ଯବାନ ଜଣକ ସୋମବାର ଦିନ ଭାରତୀୟ ସୀମାକୁ ପ୍ରବେଶ କରିଥିଲା । ପୂର୍ବ ଲଦାଖର ଡେମଚୌକ ସେକ୍ଟରରୁ ଉକ୍ତ ସୈନିକକୁ ଗିରଫ କରିଥିଲା ଭାରତୀୟ ସେନା । ତା' ନିକଟରୁ ସିଭିଲ ଓ ମିଲିଟାରି ଦସ୍ତାବିଜ ଜବତ ହୋଇଥିଲା । ଗିରଫ ସୈନିକକୁ ସୀମାରେ ପ୍ରବେଶର କାରଣ ସମ୍ପର୍କରେ ମଧ୍ୟ ପଚରାଉଚରା କରାଯାଇଥିଲା । ତେବେ ସେ ଅଜଣାତରେ ସୀମାରେ ପ୍ରବେଶ କରିଥିବା ଜଣାପଡ଼ିଛି । ଏହାପରେ ତାକୁ ମୁକ୍ତ କରାଯାଇ ସ୍ବଦେଶକୁ ପଠାଯାଇଛି ।