2020ରେ ଭାଙ୍ଗିବ ଇମରାନଙ୍କ ସରକାର!

ଭାଙ୍ଗିବ କି ଇମରାନଙ୍କ ସରକାର? ଆସନ୍ତାବର୍ଷ 2020ରେ ଭାଙ୍ଗି ଯାଇପାରେ ଇମରାନ ଖାନଙ୍କ ସରକାର। ଆଗକୁ ପଢନ୍ତୁ...

ଇସଲାମାବାଦ: ଆସନ୍ତା କିଛି ଦିନ ମଧ୍ୟରେ ଭାଙ୍ଗିଯିବ ଇମରାନ ଖାନଙ୍କ ସରକାର। କାରଣ ଜନତା ତାଙ୍କ ଶାସନରେ ଅସ୍ତବ୍ୟସ୍ତ ହୋଇଗଲେଣି ବୋଲି କହିଛନ୍ତି ଜମିୟାତ୍-ଉଲେମା-ଏ-ଇସଲାମ-ଏଫ(JUI-F)ର ନେତା ମୌଲାନା ଗଫୁର ହୈଦରୀ। ପାକିସ୍ତାନ ସଂସଦର ପୂର୍ବତନ ଉପାଧ୍ୟକ୍ଷ ଦଳର ଏକ ରାଲିକୁ ସମ୍ବୋଧିତ କରିବା ସମୟରେ ଦେଶର ଅର୍ଥନୀତି ଓ ଉଦ୍ୟୋଗକୁ ନେଇ ଚିନ୍ତା ପ୍ରକାଶ କରିଥିଲେ।

ଅନେକ ଲୋକ ଚାକିରୀ ହରାଇବା ସହ ପାକିସ୍ତାନର ଅର୍ଥନୀତି ଅତି ନିମ୍ନ ସ୍ତରରେ ରହିଛି। ଆସନ୍ତା 2020ରେ ଇମରାନ ଖାନଙ୍କ ସରକାର ଭାଙ୍ଗିବା ନିଶ୍ଚିତ ବୋଲି ଆଶାବାଦୀ ଅଛନ୍ତି ମୌଲାନା ଗଫୁର। JUI-Fର ନେତାଙ୍କ କହିବା ଅନୁସାରେ, ଇମରାନ ଖାନଙ୍କ ନେତୃତ୍ବାଧିନ ପାକିସ୍ତାନ ତେହେରିକ ଇ ଇନସାଫ୍(ପିଟିଆଇ) ସରକାର ଜନତାଙ୍କ ବିନା ସମର୍ଥନରେ ଓ ସେନାର ସହାୟତା ବଳରେ ଦେଶର କ୍ଷମତାସୀନ ହୋଇଛି। ପ୍ରଧାନମନ୍ତ୍ରୀ ଇମରାନ ଖାନ୍ କହିଥିଲେ ଯେ, 2020 ଚାକିରୀର ବର୍ଷ ହେବ, ହେଲେ ବର୍ତ୍ତମାନ ଲୋକେ ଚାକିରୀ ପାଇବା ବଦଳରେ ଅଧିକାଂଶ ହରାଉଛନ୍ତି।

JUI-Fର ମୁଖ୍ୟ NABର ଚେୟାରମ୍ୟାନ ଜାଭେଦ ଇକବାଲଙ୍କୁ ଭଷ୍ଟ୍ରାଚାରରେ ଲିପ୍ତ ଥିବା ମନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛନ୍ତି। ମୌଲାନା ଗଫୁର ଏହା ମଧ୍ୟ କହିଥିଲେ କି, ପ୍ରତିରକ୍ଷା ମନ୍ତ୍ରୀ ପରବେଜ୍ ଖଟ୍ଟକ୍ ବର୍ତ୍ତମାନ ଖାଇବର-ପାଖତୁନଖ୍ବା ପ୍ରୋଜେକ୍ଟରେ ଭଷ୍ଟ୍ରାଚାର କରିଥିବା ଆରୋପ ଲାଗିଛି। ମାତ୍ର NAB କୌଣସି ପଦକ୍ଷେପ ନେବାକୁ ଅସମର୍ଥ । ଅନ୍ୟପକ୍ଷେ ପାକିସ୍ତାନ ଜନତା ଇମରାନ ସରକାରଙ୍କ ଉପରେ ଭରଷା କରିଥିଲେ। ମାତ୍ର ସେ ଏହାକୁ ଭାଙ୍ଗିଛନ୍ତି ବୋଲି ଅଭିଯୋଗ ଆଣିଛନ୍ତି JUI-F ମୁଖ୍ୟ ମୌଲାନା ଗଫୁର।