ଜମ୍ମୁ: ଜମ୍ମୁ କାଶ୍ମୀରର ପୁଲୱାମାରେ ଆକ୍ରମଣର ଆଉ ଏକ ଷଡଯନ୍ତ୍ର ରଚାଯାଇଛି। ପୁଲୱାମାର ଆୟାନାଗୁଣ୍ଡ ଅଞ୍ଚଳରେ ଥିବା ଏକ ସାଣ୍ଟ୍ରୋ କାରରେ ସେନା ବହୁ ପରିମାଣର ବିସ୍ଫୋରକ ଜବତ କରିଛି। ଏହି କାରରୁ ଆଇଇଡି ବିସ୍ପୋରଣ ମଧ୍ୟ ଜବତ ହୋଇଛି । ସୁରକ୍ଷା ବାହିନୀ କାରକୁ ସନ୍ଦେହଜନକ ଅବସ୍ଥାରେ ପାଇଥିଲେ ଓ ଏହାର ଅନୁସନ୍ଧାନ କରାଯିବା ପରେ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଜବତ କରାଯାଇଥିଲା।
ସୂଚନାନୁସାରେ, କାରକୁ ସେହି ସ୍ଥାନରୁ ଦୂରେଇ ରଖିବା ସମ୍ଭବ ନୁହେଁ ଓ ସେଥିପାଇଁ ସୁରକ୍ଷା ବାହିନୀ ନିୟନ୍ତ୍ରିତ ବିସ୍ଫୋରଣରେ କାରଟିକୁ ଉଡାଇ ଦେଇଥିଲେ। ଏହି କାରରେ ଏତେ ପରିମାଣର ବିସ୍ଫୋରକ ସାମଗ୍ରୀରେ ଭରପୂର ଥିଲା ଯେ ଯେତେବେଳେ ଏହାକୁ ଧ୍ବଂସ କରାଗଲା ସେତେବେଳେ ଏହାର ଚାରିପାଖରେ ଅନେକ ଘର ନଷ୍ଟ ହୋଇଗଲା ଓ ବଡ ଶବ୍ଦ ଶୁଣାଗଲା । ଏହାପୂର୍ବରୁ ଆଖପାଖ ସ୍ଥାନକୁ ଖାଲି କରାଯାଇଥିଲା ।
ବିଶ୍ବାସ କରାଯାଉଛି ଯେ ଏହି କାରଟି ପୁଲୱାମାରେ 2019 ଭଳି ଅନ୍ୟ ଏକ ଆତଙ୍କବାଦୀ ଷଡଯନ୍ତ୍ର କରିବା ପାଇଁ ବ୍ୟବହୃତ ହୋଇଥାନ୍ତା କିନ୍ତୁ ସୁରକ୍ଷା ବାହିନୀର ସଚେତନତା କାରଣରୁ ଏପରି ବଡ ବିପଦକୁ ରୋକାଯାଇ ପାରିଲା ।
