ହାଇଦ୍ରାବାଦ: ଭାରତରେ ଚାଲିଛି ରୋହିଙ୍ଗ୍ୟା ରେଫ୍ୟୁଜିଙ୍କ ରାଜ୍ । ଭାରତୀୟ ନାଗରିକର ପରିଚୟ ଦେଇ ସରକାରୀ ଲାଭ ଉଠାଇବା ପାଇଁ କରୁଥିଲେ ଦାବି । ଏହି ଘଟଣା ଜାଣିବା ପରେ ହାଇଦ୍ରାବାଦ ପୋଲିସ ଗିରଫ କରିଛି ମିଆଁମାରରୁ ଆସିଥିବା ଜଣେ ରୋହିଙ୍ଗ୍ୟା ଶରଣାର୍ଥୀ ମହମ୍ମଦ ଫାରୁକକୁ।
ସୂଚନା ଅନୁସାରେ ହାଇଦ୍ରାବାଦ କମିଶନରଙ୍କ ଟାସ୍କ ଫୋର୍ସ, ସାଉଥ ଜୋନ ହାଇଦ୍ରାବାଦ ଓ ମୋଗଲପୁରା ପୋଲିସ ଟିମ ଏହି ରୋହିଙ୍ଗ୍ୟା ଶରଣାର୍ଥୀକୁ ଗିରଫ କରିଛି । ମହମ୍ମଦ ଫାରୁକ ଭାରତୀୟ ନାଗରିକ ଭାବରେ ପରଚୟ ପତ୍ର ରଖିବା ସହ ବିଭିନ୍ନ ସରକାରୀ ଯୋଜନାର ଲାଭ ଉଠାଉଥିବା କହିଛି ପୋଲିସ ।
ଫାରୁକ ପାଖରେ ନକଲି ଭୋଟର କାର୍ଡ, ଆଧାର କାର୍ଡ ଏବଂ ଅନ୍ୟାନ୍ୟ ଭାରତୀୟ ପରିଚୟ ପତ୍ର ଥିଲା । ଯାହାକୁ ନେଇ ସେ ସରକାରୀ ଯୋଜନାର ଲାଭ ଉଠାଇବା ପାଇଁ ଦାବି କରୁଆସୁଥିଲା । 2009 ମସିହାରେ ଅଭିଯୁକ୍ତ ଭାରତ ଆସିଥିଲା ଫାରୁକ । ସେ ଜମ୍ମୁ-କାଶ୍ମୀରରେ ପ୍ରାୟ ତିନି ବର୍ଷ ରହିବା ପରେ 2011 ମସିହାରେ ହାଇଦ୍ରାବାଦକୁ ଆସି ବସତି ଆରମ୍ଭ କରିଥିଲା ।
"2011 ରେ, ଫାରୁକ୍ ଭାରତୀୟ ନାଗରିକ ପ୍ରମାଣ ପାଇବା ପାଇଁ ସୟଦ କ୍ୱାଡେରୁଦ୍ଦିନ ମେ ସେବା ନାମକ ଜଣେ ବ୍ୟକ୍ତିଙ୍କ ନିକଟକୁ ଯାଇଥିଲା । ସୟଦ କ୍ୱାଡେରୁଦ୍ଦିନ ଫାରୁକର ବ୍ୟକ୍ତିଗତ ବିବରଣୀ ଏବଂ ମୂଳ ଜାତୀୟତାକୁ ଦମନ କରି ଅତିରିକ୍ତ ଶୁଳ୍କ ସଂଗ୍ରହ କରି ବେଆଇନ ଭାବେ ଭାରତୀୟ ପ୍ରମାଣପତ୍ର ବ୍ୟବସ୍ଥା କରିଥିଲେ। " ଘଟଣା ସମ୍ପର୍କରେ ହୋଇଦ୍ରାବାଦ ପୋଲିସ ଜାଣିବା ପରେ ଉଭୟ ଅଭିଯୁକ୍ତଙ୍କୁ ଗିରଫ କରାଯାଇଛି । ଜବତ ସାମଗ୍ରୀକୁ ଆବଶ୍ୟକ କାର୍ଯ୍ୟାନୁଷ୍ଠାନ ପାଇଁ ମୋଗଲପୁରା ପୋଲିସ ଷ୍ଟେସନକୁ ହସ୍ତାନ୍ତର କରାଯାଇଛି ।