ନୂଆଦିଲ୍ଲୀ: ଲକଡାଉନ କାରଣରୁ ଫଶି ରହିଥିବା ଶ୍ରମିକ ମାନେ ବର୍ତ୍ତମାନ ନିଜ ରାଜ୍ୟକୁ ଓ ଘରକୁ ଲୁଚି ପଳେଇବାକୁ ଲାଗିଛନ୍ତି । ତେବେ ଏପର୍ଯ୍ୟନ୍ତ ରାସ୍ତାରେ, ରେଳ ଟ୍ରାକରେ ଶ୍ରମିକ ମାନେ ଯାଉଥିବାର ଦେଖିବାକୁ ମିଳିଥିବାବେଳେ, ବର୍ତ୍ତମାନ ଦେଶର ଶ୍ରମିକମାନେ ନିଜ ଜୀବନକୁ ବିପଦରେ ପକାଇ ନଦୀ ଭିତର ଦେଇ ପଳାଇବାକୁ ବାଧ୍ୟ ହେଉଛନ୍ତି । ଶତାଧିକ ଶ୍ରମିକ ଯମୁନା ନଦୀ ପାର ହୋଇ ହରିୟାଣାର ଯମୁନାନଗର ଗାଁ ଏବଂ ୟୁପିର ବାଗପତ ଗାଁରୁ ନିଜ ଘରକୁ ଯାଉଥିବା ଦେଖିବାକୁ ମିଳିଛି ।
ନିରାଶପ୍ରାୟ, ଅସହାୟତା, ଭୋକିଲା ଏବଂ ଘରକୁ ଫେରିବା ଇଚ୍ଛା କଣ ତାହା ଏହି ଶ୍ରମିକଙ୍କ ପରିସ୍ଥିତିରୁ ଜଣାପଡୁଛି । ହରିୟାଣାର ଯମୁନାନଗରରେ ଶହ ଶହ ଶ୍ରମିକ ନିଜ ଜିନିଷ ମୁଣ୍ଡରେ ରଖି ଯମୁନା ନଦୀ ଦେଇ ପଳାଇବାକୁ ବାଧ୍ୟ ହେଉଛନ୍ତି । ଏହି ଶ୍ରମିକମାନଙ୍କ ସହିତ ମହିଳା ଏବଂ ଶିଶୁ ମଧ୍ୟ ଅଛନ୍ତି । କେତେକ ଶ୍ରମିକ ସାଇକେଲକୁ ନେଇ ଯମୁନା ନଦୀ ପାର ହୋଇ ଯାଉଛନ୍ତି। ନଦୀ ପାର ହେଉଥିବାବେଳେ ଶ୍ରମିକମାନଙ୍କର ମଧ୍ୟ ଜୀବନ ଯାଇପାରେ, କିନ୍ତୁ ଏହାକୁ ଖାତିର ନକରି ସେମାନେ ନିଜ ଜୀବନକୁ ବିପଦରେ ପକେଇ ପାର ହେଉଛନ୍ତି ।