ପାଟନା: ବିହାରରେ ରହିଛି ମଣିଷ ହାଡ଼ର ସଂଗ୍ରହାଳୟ । କାନକୁ ବିଶ୍ବାସ ହେଉନଥିଲେ ମଧ୍ୟ ଏହା ସତ । ବିହାରର ରାଜଧାନୀ ପାଟନାରେ ରହିଛି ଏହି ସଂଗ୍ରହାଳୟ । ପାଟନାରେ ଥିବା ରାଜଧାନୀ ଆୟୁର୍ବେଦିକ କଲେଜର ଅସ୍ଥିଶଲ୍ୟ ବିଭାଗ ବା ଆନାଟୋମୀ ଡିପାର୍ଟମେଣ୍ଟରେ ରହିଛି ଏହି ସଂଗ୍ରହାଳୟ । ଏହି ସଂଗ୍ରହାଳୟରେ ମଣିଷମାନଙ୍କର ହାଡ଼କୁ ସଂଗ୍ରହ କରାଯାଇ ଏଠାରେ ସଂରକ୍ଷିତ ରଖାଯାଇଛି ।
ସାଧାରଣତଃ ମଣିଷ ଶରୀରରେ 206 ପ୍ରକାର ହାଡ଼ ରହିଥାଏ । ମାତ୍ର ସଂଗ୍ରହାଳୟରେ 206 ଖଣ୍ଡ ହାଡ଼ର ପ୍ରକାର ଭେଦ କରିବା ପରେ ଏଠାରେ ପାଖାପାଖି 1000 ଖଣ୍ଡରୁ ଅଧିକ ହାଡ଼ ଏଠାରେ ରଖାଯାଇଥିବା ଜଣାପଡ଼ିଛି । ତେବେ ଏହି ହାଡ଼କୁ ବିଭାଗର କର୍ମଚାରୀ ଏବଂ ଛାତ୍ରଛାତ୍ରୀ ସଂଗ୍ରହ କରିବାରେ ପ୍ରମୁଖ ଭୁମିକା ଗ୍ରହଣ କରିଥାନ୍ତି ।
ସେପଟେ ଏହି ସଂଗ୍ରହାଳୟରେ ଥିବା ହାଡ଼ ଗୁଡ଼ିକ ଉପରେ ଛାତ୍ରଛାତ୍ରୀ ଅନୁଧ୍ୟାନ ଓ ପରୀକ୍ଷଣ ମଧ୍ୟ କରିଥାନ୍ତି । ଏଠାରେ ଥିବା ପାଖାପାଖି 1000 ଖଣ୍ଡର ବିଭିନ୍ନ ପ୍ରକାର ହାଡ଼ ଉପରେ ଛାତ୍ରଛାତ୍ରୀ ଅନୁଧ୍ୟାନ କରୁଥିବା ବେଳେ ଶିକ୍ଷକମାନେ ସେ ସମ୍ପର୍କରେ ବୁଝାଇଥାନ୍ତି । ଏନେଇ ଅସ୍ଥିଶଲ୍ୟ ବିଭାଗର ମୁଖ୍ୟ ପ୍ରଫେସର ଏସଏସ ଗୁପ୍ତା କହିଛନ୍ତି କି, ଛାତ୍ରଛାତ୍ରୀଙ୍କ ଶିକ୍ଷାଦାନ ପାଇଁ 5 ସେଟର ଅସ୍ଥିମାନ ରଖାଯାଇଛି ।
ଏହା ବିହାରର ପ୍ରଥମ ଆୟୁର୍ବେଦ କଲେଜ, ଯେଉଁଠାରେ ଅସଲି ହାଡ଼ଗୁଡ଼ିକ ଶିକ୍ଷାଦାନ ସମୟରେ ବ୍ୟବହାର କରାଯାଇଥାଏ । ସଂରକ୍ଷିତ ଥିବା ହାଡ଼ ସାହାଯ୍ୟରେ ସେମାନେ ଶିକ୍ଷା ଗ୍ରହଣ କରୁଛନ୍ତି । ଏପରି କରିବା ଫଳରେ ତାଙ୍କୁ ଶିକ୍ଷା ଗ୍ରହଣରେ ସହଜ ହେଉଛି ବୋଲି ପ୍ରଫେସର କହିଛନ୍ତି । ଏହା ସହିତ କିଛି ନକଲି ହାଡ଼ ମଧ୍ୟ ରଖାଯାଇଛି । ଏଠାରେ ବିଭିନ୍ନ ପ୍ରକାର ହାଡ଼ର ଢାଞ୍ଚା ମଧ୍ୟ ରହିଛି । ତେବେ ବର୍ତ୍ତମାନ ସମୟରେ ନୂଆ ଆଇନ ଆସିଯିବାରୁ ହାଡ଼ ସଂଗ୍ରହରେ ବାଧା ସୃଷ୍ଟି ହୋଇଛି ବୋଲି ସେ କହିଛନ୍ତି ।
