ଅହମ୍ମଦାବାଦ: ନୂଆ ମୋଟର ନିୟମ ଆସିବା ପରଠୁ ନାକେଦମ ହେଲେଣି ଗାଡିଚାଳକ । କେତେବେଳ କେଉଁ କାରଣରୁ ଟ୍ରାଫିକ ପୋଲିସ ମୋଟା ରକମର ତଣ୍ଡ ଗଣାଇବ ସେନେଇ ସମସ୍ତଙ୍କର ମୁଣ୍ଡ ବ୍ୟଥା । ଟ୍ରାଫିକ ନିୟମରେ ହେଲମେଟକୁ ପ୍ରାଥମିକତା ଦିଆଯାଉଛି । ଏପରି କ୍ଷେତ୍ରରେ ଗୁଜୁରାଟରେ ଟ୍ରାଫିକ ପୋଲିସଙ୍କ ସାମନାରେ ଏପରି ଏକ ମାମଲା ଆସିଛି ଯାହାକୁ ନେଇ ସେ ଚିନ୍ତାରେ ପଡିଗଲେ । ସେ ବିଚାର କରିପାରୁନଥିଲେ ଚାଲାଣ କାଟିବେ ନା ନାହିଁ । କାରଣ ସେଠାରେ ହେଲମେଟ ସାଜିଲା ବାଧକ ।
ମୁଣ୍ଡକୁ ପାଉନି ହେଲମେଟ, ଦ୍ବନ୍ଦ୍ବରେ ଟ୍ରାଫିକ ପୋଲିସ
ଗୁଜୁରାଟର ଛୋଟା ଉଦେପୁର ଜିଲ୍ଲାର ବୋଡେଲୀ କସ୍ବେ ଅଞ୍ଚଳରେ ଆଶ୍ଚର୍ଯ୍ୟ ଘଟଣା । ଗାଡି ଚାଳକଙ୍କ ମୁଣ୍ଡ ବଡ ଥିବା ଯୋଗୁଁ ପିନ୍ଧିନଥିଲେ ହେଲମେଟ । ଉକ୍ତ ବ୍ୟକ୍ତିଙ୍କ ନାଁରେ ଚାଲାଣ କାଟିବେ ନା ନାହିଁ ଦ୍ବନ୍ଦରେ ପଡିଗଲା ଟ୍ରାଫିକ ପୋଲିସ ।
ପ୍ରତିକାତ୍ମକ ଫଟୋ
ଗୁଜୁରାଟର ଛୋଟା ଉଦେପୁର ଜିଲ୍ଲାର ବୋଡେଲୀ କସ୍ବେ ଅଞ୍ଚଳର ଘଟଣା । ଉକ୍ତ ଅଞ୍ଚଳର ଜାକିର ମେମନ ନାମକ ଜଣେ ବ୍ୟକ୍ତିଙ୍କୁ ବିନା ହେଲମେଟରେ ଗାଡି ଚଳାଉଥିବା ବେଳେ ଧରିଲା ପୋଲିସ । ମେମନଙ୍କ ପାଖରେ ଗାଡି ସମ୍ବନ୍ଧିତ ସମସ୍ତ କାଗଜପତ୍ର ଥିଲା । ହେଲେ ପିନ୍ଧିନଥିଲେ ହେଲମେଟ । ପୋଲିସ ତାଙ୍କୁ ଜରିମାନା ଭରିବାକୁ କହିଲେ । ମେମନ କହିଲେ ସେ କୌଣସି ହେଲମେଟ ପିନ୍ଧି ପାରନ୍ତିନି । କାରଣ ତାଙ୍କ ମୁଣ୍ଡ ହେଲମେଟ ଅପେକ୍ଷା ବଡ । ଏହା ଶୁଣି ପୋଲିସ ଦ୍ବନ୍ଦରେ ପଡିଗଲା । ଏପରି ମାମଲାରେ ଚାଲାଣ କାଟାଯିବ ନା ନାହିଁ ତାହା ଭାବିବାକୁ ଲାଗିଲା ଟ୍ରାଫିକ ପୋଲିସ ।
ସେପଟେ ମେମନଙ୍କ କହିବା କଥା ହେଲେ ସେ ଟ୍ରାଫିକ ନିୟମକୁ ଭଲଭାବେ ପାଳନ କରନ୍ତି । କିନ୍ତୁ ତାଙ୍କ ମୁଣ୍ଡ ବଡ ଥିବା ଯୋଗୁଁ କୌଣସି ଦୋକାନରେ ତାଙ୍କ ମୁଣ୍ଡ ମାପର ହେଲମେଟ ନାହିଁ । ଏ କଥା ଥାନାକୁ ଯାଇ ମଧ୍ୟ ସୂଚନା ଦେଇଛନ୍ତି । ଏନେଇ ଟ୍ରାଫିକ ପୋଲିସଙ୍କ କହିବା କଥା ହେଲା ଏହା ଏକ ବିଚିତ୍ର ସମସ୍ୟା । କିନ୍ତୁ ମେମନଙ୍କ ପାଖରେ ସମସ୍ତ କାଗଜପତ୍ର ଥିବାରୁ ତାଙ୍କ ବିରୋଧରେ ଆଉ ଚାଲାଣ କଟାଗଲା ନାହିଁ । ସୂଚନା ଥାଉକି ଗୁଜୁରାଟରେ ଜରିମାନା ରାଶି କମ କରାଯାଇଛି । ହେଲମେଟ ଓ ସିଟବେଲ୍ଟ ନପିନ୍ଧଲେ 1000 ଟଙ୍କା ଜରିମାନା ଭରିବାକୁ ପଡୁଥିଲା । ତାହା ଏବେ 500 ଟଙ୍କାକୁ ହ୍ରାସ କରାଯାଇଛି ।
Last Updated : Sep 17, 2019, 2:28 PM IST