ନୂଆଦିଲ୍ଲୀ: କୁକୁର ଏକ ବିଶ୍ବସ୍ଥ ପ୍ରାଣୀ । ଏକଥା ଆପଣ ଅନେକ ଥର ଶୁଣିଥିବେ । ଏହାର ଅନେକ ଉଦାହରଣ ମଧ୍ୟ ଦେଖିଥିବେ । ତେବେ ନିକଟରେ ଏମିତି ଏକ ଘଟଣା ଦେଖିବାକୁ ମିଳିଛି ବିହାରର ଭାଗଲପୁରରେ । ଏଠାରେ କୁକୁର ଦେଖାଇଛି ମାଲିକ ପ୍ରତି ଆନୁଗତ୍ୟ ।
ତେବେ 4ଟି କୁକୁର ମାଲିକ ଏବଂ ତାଙ୍କ ପରିବାରକୁ ବିଷଧର ସାପ କବଳରୁ ବଞ୍ଚାଇବାକୁ ଯାଇ ନିଜ ଜୀବନ ହରାଇଛନ୍ତି । ଗତ ମଙ୍ଗଳବାର ରାତିରେ ଘଟିଥିଲା ଏହି ଘଟଣା । ଆଉ ଏସବୁ କଏଦ ହୋଇଥିଲା ସିସିଟିଭିରେ ।
ଭାଗଲପୁରର ସାହେବଗଞ୍ଜ କୋଲନୀ ନିବାସୀ ଚିକିତ୍ସକ ଡଃ ପୁନମ ମେସେସ ନିଜ ଘରେ 4ଟି କୁକୁର ପାଳିଥିଲେ । ସେ ସେମାନଙ୍କୁ ନିଜ ପରିବାରର ସଦସ୍ୟ ଭଳି ପ୍ରତିପୋଷଣ କରୁଥିଲେ । ତେବେ ଗତ ମଙ୍ଗଳବାର ହଠାତ୍ ସମସ୍ତ କୁକୁର ଏକାସହ ଭୁକିବା ଆରମ୍ଭ କରିଥିଲେ । ଆଉ ହଠାତ୍ କିଛି ସମୟ ପରେ ସେମାନଙ୍କ ଭୁକିବା ବନ୍ଦ ହୋଇ ଯାଇଥିଲା ।
ଆଉ ଏହାପରେ ଯେବେ ଘରଲୋକ ବାହାରକୁ ଯାଇ ଦେଖିବାକୁ ପାଇଥିଲେ 4ଟି କୁକୁର ଗୋଟିଏ ବିଷଧର ସାପ ସହ ଲଢେଇ କରୁଛନ୍ତି । ସେମାନେ ସାପକୁ ରକ୍ତାକ୍ତ କରିସାରିଥିଲେ । ଏହାସହ ସେମାନେ ମୃତ୍ୟୁ ସହିତ ସଂଗ୍ରାମ ମଧ୍ୟ କରୁଥିଲେ । ଆଉ ଏହାପରେ ସାପକୁ ମାରିବାରେ ସଫଳ ହୋଇଥିଲେ ଏହି କୁକୁରମାନେ । ମାତ୍ର ଶେଷରେ ଏମାନେ ମଧ୍ୟ ନିଜ ଜୀବନ ହାରିଥିଲେ ।
ମାଲିକଙ୍କ କହିବା ଅନୁସାରେ, ଗୋଟିଏ କୋବ୍ରା ତାଙ୍କୁ ଘରକୁ ପଶିବା ପାଇଁ ଚେଷ୍ଟା କରୁଥିଲା । କିନ୍ତୁ ତାକୁ ଘରକୁ ଆସିବାକୁ ଦେଇନଥିଲେ ସେହି 4ଟି କୁକୁର । ସେମାନେ ମିଶି ସାପକୁ ମାରି ଦେଇଥିଲେ । ସାପ ବିଷ ଦ୍ବାରା ଏହି 4 କୁକୁର ମଧ୍ୟ ଜୀବନ ହାରିଥିଲେ । ଆଉ ଏସବୁ ଦୃଶ୍ୟ କଏଦ ହୋଇଥିଲା ସିସିଟିଭିରେ ।