ପାଟନା: ସମସ୍ତ କଳ୍ପନା ଜଳ୍ପନାରେ ଅନ୍ତ। ଗୁପ୍ତେଶ୍ବର ପାଣ୍ଡେଙ୍କ ସ୍ବେଚ୍ଛକୃତ ଅବସର ଗ୍ରହଣ କରିବା ପରେ ଲାଗିରହିଥିବା ସସପେନ୍ସରେ ପଡିଯାଇଛି ପୂର୍ଣ୍ଣଚ୍ଛେଦ। କାରଣ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଜେଡିୟୁରେ ସାମିଲ ହେବେ ପାଣ୍ଡେ। ଆଜି ସନ୍ଧ୍ୟାରେ ପାର୍ଟିରେ ଯୋଗଦେବାର କାର୍ଯ୍ୟକ୍ରମ ରହିଥିବା ସୂଚନା ମିଳିଛି। ଭାରତର ନିର୍ବାଚନ ଆୟୋଗ ଆସନ୍ତା ବିହାର ବିଧାନସଭା ନିର୍ବାଚନ 2020 ତାରିଖ ଘୋଷଣା କରିବାର କିଛି ଦିନ ପରେ ଏହା ସାମ୍ନାକୁ ଆସିଛି। ବର୍ତ୍ତମାନ ବିହାରର ପୂର୍ବତନ ଡିଜିପି ଗୁପ୍ତେଶ୍ୱର ପାଣ୍ଡେ ପାଟନାରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବାସଭବନରେ ପହଁଞ୍ଚିଛନ୍ତି।
ତେବେ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ବିହାର ପୋଲିସର ତଦନ୍ତରେ ତାଙ୍କ ଭୂମିକା ପାଇଁ ଚର୍ଚ୍ଚାକୁ ଆସିଥିବା ଗୁପ୍ତେଶ୍ବର ପାଣ୍ଡେଙ୍କ ଚଳିତବର୍ଷ ବିହାର ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ନେଇ ଚର୍ଚ୍ଚା ଜୋର ଧରିଥିଲା। ତେବେ ଏହାକୁ ନେଇ କୌଣସି ସ୍ପଷ୍ଟ ସୂଚନା ମିଳନଥିଲା। ବର୍ତ୍ତମାନ ସବୁ କିଛି ଦ୍ବନ୍ଦ ଦୂର ହୋଇଥିବା ବେଳେ ରାଜନୀତି ମୈଦାନରେ ପାଦ ଥାପିବେ ବିହାରର ପୂର୍ବତନ ଡିଜି।