ଲକ୍ଷ୍ନୌ: ଯୋଗୀ ଆଦିତ୍ୟନାଥଙ୍କୁ ଚିଠି ଲେଖିଲେ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରା । ଚିଠି ଲେଖି ସେ ଅଭିଯୋଗ କରିଛନ୍ତି ଯେ, ୟୁପିରେ କୋରୋନା ମାମଲା ଦିନକୁ ଦିନ ବଢୁଥିବାବେଳେ ମୁଖ୍ୟମନ୍ତ୍ରୀ ନ୍ୟୁଜ ଏବଂ ବିଜ୍ଞାପନକୁ ପରିଚାଳନା କରିବାରେ ବ୍ୟସ୍ତ ଅଛନ୍ତି ।
ୟୁପିରେ କୋରୋନା ମାମଲା ଦ୍ରୁତ ଗତିରେ ବୃଦ୍ଧି ପାଉଛି । ଏନେଇ ବହୁ ସମସ୍ୟା ମଧ୍ୟ ଉପୁଜୁଛି । ଏଠାରେ ବେଡ ଅଭାବ ରହିଛି । ମେଡିକାଲରେ ରୋଗୀଙ୍କର ଲମ୍ବା ଲାଇନ ଲାଗି ରହୁଛି । କୋରୋନା ମୃତ୍ୟୁ ମାମଲା ଦିନକୁ ଦିନ ବୃଦ୍ଧି ପାଉଛି । କାନପୁର, ଲକ୍ଷ୍ନୌ, ଗୋରଖପୁର ଏବଂ ବାରାଣାସୀ ରିପୋର୍ଟ ମଧ୍ୟ ଭଲନାହିଁ । ଏଣୁ ମୁଁ ମୁଖ୍ୟମନ୍ତ୍ରୀଙ୍କୁ କିଛି ଭଲ ପରାମର୍ଶ ଦେଇଛି । ୟୁପି ସରକାର ଜିଦଖୋର ମନୋଭାବ ଛାଡି ସ୍ବଚ୍ଛ ଏବଂ ପବ୍ଲିକ ଓରିଏଣ୍ଟଟେଡ ବ୍ୟବହାର ଆପଣାନ୍ତୁ ବୋଲି ପ୍ରିୟଙ୍କା ଟ୍ବିଟ ଜରିଆରେ କହିଛନ୍ତି ।
ତେବେ ସେ ଲେଖିଥିବା ଦୁଇ ପୃଷ୍ଠା ଚିଠିରେ ଉଲ୍ଲେଖ କରିଛନ୍ତି ଯେ, ରାଜ୍ଯରେ କୋରୋନା ପରୀକ୍ଷଣ କମ ହେଉଛି । ଗତ ଶୁକ୍ରବାର ରାଜ୍ୟରେ 2500 ନୂଆ କୋରୋନା ମାମଲା ସାମ୍ନାକୁ ଆସିଥିଲା । ବର୍ତ୍ତମାନ ଗାଁ ସମେତ ବଡ ସହରର ମଧ୍ୟ କୋରୋନା କାୟାରେ ରହିଛି । ଏଥିରୁ ସ୍ପଷ୍ଟ ହେଉଛି ଯେ, ଆପଣଙ୍କ ସରକାର ‘ନୋ ଟେଷ୍ଟ ନୋ କୋରୋନାର’ ନୀତି ଆପଣାଇଛନ୍ତି । ବର୍ତ୍ତମାନ ସ୍ଥିତି ଗମ୍ଭୀର ରୂପ ଧାରଣ କଲାଣି । କିନ୍ତୁ ଏବେ ସୁଦ୍ଧା ସ୍ବଚ୍ଛ ଭାବରେ କୋରୋନା ପରୀକ୍ଷାରେ ବୃଦ୍ଧି ଘଟିନାହିଁ । ତେବେ ଯେପର୍ଯ୍ୟନ୍ତ ପରୀକ୍ଷଣ ବୃଦ୍ଧି ହୋଇନାହିଁ, ସେ ପର୍ଯ୍ୟନ୍ତ ଆମ ଲଢେଇ ଅଧୁରା ରହିବ । ଯାହା ଆମକୁ ଏକ ବିପଦ ମୁହଁ ଆଡକୁ ଟାଣି ନେବ ।
ତେବେ ବର୍ତ୍ତମାନ ସ୍ଥିତି ଗୁରୁତର ରୂପ ଧାରଣ କରିଛି । ଏଣୁ ମୁଁ ଆପଣଙ୍କୁ ଅନୁରୋଧ କରୁଛି ଏହି ଯୁଦ୍ଧ ନ୍ୟୁଜ ଏବଂ ବିଜ୍ଞାପନ ପରିଚାଳନା ଦ୍ବାରା ଲଢିହେବ ନାହିଁ ବୋଲି ପ୍ରିୟଙ୍କା ଚିଠିରେ ଲେଖିଛନ୍ତି । ସେ ଆହୁରି ମଧ୍ୟ ଲେଖିଛନ୍ତି ଯେ, ମୁଁ ଜାଣିଛି ଆପଣ ମୋ ପରାମର୍ଶକୁ ରାଜନୈତିକ ଦୃଷ୍ଟିକୋଣରୁ ଦେଖିବେ, ଯେପରି ରାସ୍ତାରେ ଚାଲି ଯାଉଥିବା ପ୍ରବାସୀ ଶ୍ରମିକଙ୍କୁ ବସ୍ ଯୋଗାଇ ଦିଆଯାଉଥିବା ସମୟରେ ଏହା କରାଯାଇଥିଲା।
