ହାଇଦ୍ରାବାଦ: ସକାଳୁ ଉଠିବା ଠାରୁ ଶୋଇବା ପର୍ଯ୍ୟନ୍ତ କେବଳ କାମର ପ୍ରେସର ଆଉ ମାନସିକ ଚାପ । ଏହା ଆଧୁନିକ ଜୀବନଶୈଳୀର ଏକ ସାଧାରଣ କଥା ପାଲଟିଛି । ଛୋଟ ପିଲାଠାରୁ ବୃଦ୍ଧ ପର୍ଯ୍ୟନ୍ତ ସମସ୍ତେ ଏହି ଚାପର ସମ୍ମୁଖୀନ ହେଉଛନ୍ତି । ଆଉ ଏହି ଲକଡାଉନ ଚାପକୁ ଆହୁରି ଦ୍ବିଗୁଣିତ କରିଛି । ଯାହାକୁ ନେଇ ଅନେକ ଯୁବପିଢି ଭୁଲ ପଦକ୍ଷେପ ମଧ୍ୟ ନେଉଛନ୍ତି ।
ତେବେ ଏପରି ସମୟ ସମୟରେ ପରସ୍ଥିତି ସହ ଲଢିବା ପାଇଁ ଆମକୁ ନିଜକୁ ପ୍ରସ୍ତୁତ କରିବାକୁ ପଡିବ । ପ୍ରଥମେ ମନକୁ ଶାନ୍ତ କରି ସବୁ କାମ କରିବାକୁ ହେବ । ଏଥିପାଇଁ ବିଭିନ୍ନ ଉପାୟ ଅବଲମ୍ବନ କରିବା ଆବଶ୍ୟକ । ଆଉ ଖାଦ୍ୟ ଆପଣଙ୍କ ଏହି ସମସ୍ୟାକୁ ଦୂର କରିବା ପାଇଁ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିପାରିବ । ସେମିତି କିଛି ଖାଦ୍ୟ ସମ୍ପର୍କରେ ଆଜି ଆମେ ଆପଣଙ୍କୁ ଅବଗତ କରାଇବୁ ଯାହା ଖାଇବା ଦ୍ବାରା ଆପଣଙ୍କ ମସ୍ତିଷ୍କ ଥଣ୍ଡା ରହିବା ସହ ମାନସିକ ସ୍ତରରେ ଶାନ୍ତ ରହିବେ ।
ବାଦାମ
ବାଦାମ ଓମେଗା 3ର ଏକ ମୁଖ୍ୟ ଅଂଶ । ଓମେଗାର ଫ୍ୟାଟି ଏସିଡ୍ ମସ୍ତିଷ୍କ ପାଇଁ ଜରୁରୀ ହୋଇଥାଏ । କିନ୍ତୁ ଏହା ଆମ ଶରୀରରେ ଏହା ଆପେ ଆପେ ତିଆରି ହୋଇପାରିବ ନାହିଁ । ତେଣୁ ଏହାକୁ ଆମକୁ ଖାଦ୍ୟ ମାଧ୍ୟମରେ ଗ୍ରହଣ କରିବା ବାଧ୍ୟତାମୂଳକ । ଓମେଗା 3 ଯୁକ୍ତ ଖାଦ୍ୟ ଖାଇବା ଦ୍ବାରା ଉଦାସୀନତାର ଦୂର ହେବାସହ ମନ ଫୂର୍ତ୍ତି ରହିଥାଏ ।
ଅଣ୍ଡା
ଅଣ୍ଡା ଆମିନୋ ଏସିଡ୍ ଟ୍ରାଇପଟୋଫାନର ପାଇବାର ଏକ ମୁଖ୍ୟ ସ୍ରୋତ । ସେରୋଟୋନିନ୍ ଆପଣଙ୍କ ମସ୍ତିଷ୍କରେ ଏକ ନ୍ୟୁରୋଟ୍ରାନ୍ସମିଟର ଅଟେ ଯାହା ଆପଣଙ୍କୁ ଖୁସି ରଖିଥାଏ । ତେବେ ପ୍ରତିଦିନ ଅଣ୍ଡା ଖାଇବା ଦ୍ବାରା ଏହା ଆପଣଙ୍କ ମନୋବଳକୁ ବଢାଇବାରେ ସାହାଯ୍ୟ କରିଥାଏ ।