'ଏନଆରସି ଚୂଡ଼ାନ୍ତ ତାଲିକାରେ କୌଣସି ସଂଶୋଧନ ହୋଇନାହିଁ'

2018 ରେ ପ୍ରକାଶ ପାଇଥିବା ଏନଆରସି ଚୂଡ଼ାନ୍ତ ତାଲିକାରୁ ପ୍ରାୟ 40 ଲକ୍ଷ ଲୋକ ବାଦ୍‌ ପଡିଥିଲେ । ଆସନ୍ତାକାଲି ପ୍ରକାଶ ପାଇବାକୁ ଥିବା ଏହି ତାଲିକା ମଧ୍ୟ ଅସମ୍ପୂର୍ଣ୍ଣ ଥିବ ବୋଲି ଆସାମ ପବ୍ଲିକ ୱାର୍କର ଅଧ୍ୟକ୍ଷ ଅଭିଜିତ ଶର୍ମା କହିଛନ୍ତି ।

ଗୌହାଟୀ: 2018ରେ ପ୍ରକାଶ ପାଇଥିବା ଜାତୀୟ ନାଗରିକ ପଞ୍ଜିକା(ଏନଆରସି)ର ଚୂଡ଼ାନ୍ତ ତାଲିକାରୁ ପ୍ରାୟ 40 ଲକ୍ଷ ଲୋକ ବାଦ୍‌ ପଡିଥିଲେ । ଆସନ୍ତାକାଲି ପ୍ରକାଶ ପାଇବାକୁ ଥିବା ଏହି ତାଲିକା ମଧ୍ୟ ଅସମ୍ପୁର୍ଣ୍ଣ ଥିବ ଏବଂ ଅନେକ ଲୋକ ଏଥିରୁ ବଞ୍ଚିତ ହେବେ । ଏହି ତାଲିକାରେ କୌଣସି ସଂଶୋଧନ କରାଯାଇ ନାହିଁ ବୋଲି ଦାବି କରିଛନ୍ତି ଆସାମ ପବ୍ଲିକ ୱାର୍କର ଅଧ୍ୟକ୍ଷ ଅଭିଜିତ ଶର୍ମା ।

1951 ମସିହାର ଏନଆରସି ସୂଚୀକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଆଦେବନ କରିଥିବା ଆବେଦନକାରୀଙ୍କ ମଧ୍ୟରୁ ଜଣେ ହେଉଛନ୍ତି ଅଭିଜିତ ଶର୍ମା। ତେବେ ଇଟିଭି ଭାରତର ସ୍ବତନ୍ତ୍ର ସାକ୍ଷାତକାରରେ ସେ କହିଛନ୍ତି, ଆସନ୍ତାକାଲି ପ୍ରକାଶ ପାଇବାକୁ ଥିବା ଏନଆରସି ତାଲିକା ମଧ୍ୟ ଅସମ୍ପୂର୍ଣ୍ଣ ଥିବ । କାରଣ ବର୍ତ୍ତମାନ ସୁପ୍ରିମକୋର୍ଟରେ 2ଟି ମାମଲାର ଶୁଣାଣି ଚାଲିଛି । ଏହି ମାମଲାର ଶୁଣାଣି ଶେଷ ନହେବା ପର୍ଯ୍ୟନ୍ତ ତାଲିକା ଅସମ୍ପୁର୍ଣ୍ଣ ରହିବ ବୋଲି ସେ କହିଛନ୍ତି ।

ଏନଆରସିର ସଂଶୋଧନ ପ୍ରକ୍ରିୟାରେ ଅସନ୍ତୋଷ ବ୍ୟକ୍ତ କରି ଶର୍ମା କହିଛନ୍ତି, ଯେଉଁ ଲୋକଙ୍କୁ 1971 ପୂର୍ବରୁ ଭାରତରେ ଆଶ୍ରୟ ମିଳିଥିଲା, ସେମାନଙ୍କୁ ଭାରତୀୟ ଘୋଷଣା କରିବାକୁ 10 ବର୍ଷ ପୂର୍ବେ ସୁପ୍ରିମକୋର୍ଟରେ କରାଯାଇଥିବା ଆବେଦନରେ ଆମେ କହିଥିଲୁ । ବର୍ତ୍ତମାନ ମଧ୍ୟ ସେମାନଙ୍କୁ ଭାରତୀୟ ନାଗରିକର ପରିଚୟ ପ୍ରଦାନ କରାଯାଉ ବୋଲି ସେ କହିଛନ୍ତି ।

ସୂଚନାଯୋଗ୍ୟ ଯେ, 2018 ଜୁଲାଇ 30 ରେ ପ୍ରକାଶିତ ସୂଚିରେ 2.9 କୋଟି ଲୋକଙ୍କ ନାମ ସାମିଲ କରାଯାଇଥିଲା । ଏଥିପାଇଁ ପ୍ରାୟ 3.29 କୋଟି ଲୋକ ଆବେଦନ କରିଥିଲେ । ତେବେ ଏହି ସୂଚିରୁ 40 ଲକ୍ଷ ବାଦ୍‌ ପଡିଥିଲେ । ଏନେଇ ସୁପ୍ରିମକୋର୍ଟରେ ଆବେଦନ କରାଯିବା ପରେ ବର୍ତ୍ତମାନ ପୁଣିଥରେ ସେହି ସୂଚିରେ ସଂଶୋଧନ କରାଯାଇଛି । ସେମାନଙ୍କର ଭାଗ୍ୟ ଆସନ୍ତା କାଲି ନିର୍ଧାରଣ ହେବ ।