ଅମରାବତୀ: ଭୟାବହ ଅଗ୍ନିକାଣ୍ଡ। ଆନ୍ଧ୍ରପ୍ରଦେଶ ଭାଇଜାଗ ଜିଲ୍ଲାର ଏକ କେମିକାଲ କମ୍ପାନୀରେ ଏହି ଅଗ୍ନିକାଣ୍ଡ ଘଟିଛି। ଏଥିରେ ଜଣଙ୍କର ମୃତ୍ୟୁ ଘଟିଛି । ନିଆଁ ପ୍ରଖରତା ଅତ୍ୟଧିକ ଥିବାରୁ ନିକଟରେ ରହୁଥିବା ଲୋକମାନେ ଏହାର ପ୍ରଚଣ୍ଡ ବିସ୍ଫୋରଣ ଶୁଣିଥିଲେ ଏବଂ ଅନେକ ଲୋକ ଆହତ ହୋଇଛନ୍ତି। ଅଗ୍ନିକାଣ୍ଡରେ ଗୁରୁତର ଲୋକଙ୍କୁ ଗାଜୁବାକା ଡାକ୍ତରଖାନାରେ ଭର୍ତ୍ତି କରାଯାଇଛି। ଏହା ବ୍ୟତୀତ ଲୋକଙ୍କୁ ଉଦ୍ଧାର କାର୍ଯ୍ୟ ମଧ୍ୟ ଚାଲିଛି।
ଅଗ୍ନିଶମ ବାହିନୀ ବ୍ୟତୀତ ପୋଲିସ ଘଟଣାସ୍ଥଳରେ ପହଞ୍ଚି ବିଳମ୍ବ ନକରି ଆହତମାନଙ୍କୁ ଡାକ୍ତରଖାନାକୁ ପଠାଇବା ପାଇଁ କାର୍ଯ୍ୟ ଚାଲିଛି। ନିଆଁକୁ ଆୟତ୍ତ କରିବା ପାଇଁ ଅଗ୍ନିଶମ ବିଭାଗର 12ଟି ଗାଡି ଘଟଣାସ୍ଥଳରେ ପହଞ୍ଚିଛି। ବିସ୍ଫୋରଣ ଓ ନିଆଁ ଦେଖିବା ପରେ ସ୍ଥାନୀୟ ଲୋକମାନେ ଘରୁ ବାହାରି ଆସିଥିଲେ।
ତେବେ ସୂଚନା ଅନୁସାରେ, ଘଟଣା ସମୟରେ ୟୁନିଟ୍ ଭିତରେ କେବଳ 4 ଜଣ ଉପସ୍ଥିତ ଥିଲେ । ସେଥିମଧ୍ୟରୁ ଜଣଙ୍କର ଅବସ୍ଥା ସଂକଟାପନ୍ନ ଥିବାବେଳେ 3 ଜଣ ଆହତ ହୋଇଥିଲେ । ଗୁରୁତର ଜଣଙ୍କର ମୃତ୍ୟୁ ଘଟିଥିବା ଜଣାପଡିଛି । ଅନ୍ୟପଟେ ଅଗ୍ନିଶମ ବାହିନୀ ନିଆଁ ଲିଭା କାର୍ଯ୍ୟରେ ନିୟୋଜିତ ଅଛନ୍ତି।
ପ୍ରଶାସନିକ ଅଧିକାରୀମାନେ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି। ସ୍ଥାନୀୟ ଇନ୍ସପେକ୍ଟର, ଏସିପି ଏବଂ ଡିସିପି ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବାକୁ ଚେଷ୍ଟା କରୁଛନ୍ତି।
ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି । କିଛି ମାସ ପୂର୍ବେ ଏଲଜି ପଲିମର ପ୍ଲାଣ୍ଟରେ ଗ୍ୟାସ ଲିକ୍ ହୋଇଥିବାବେଳେ ଏବେ ଏଘଟଣା ସମସ୍ତଙ୍କୁ ଅଜଣା ଭୟ ଭିତରକୁ ଠେଲି ଦେଇଛି ।
ତେବେ ଅଗ୍ନିକାଣ୍ଡର କାରଣ ଜଣାପଡିନଥିବାବେଳେ ଏହା ସୋମବାର ରାତି 10.35ରେ ଘଟିଥିବା କୁହାଯାଉଛି । କାରଣ ଠିକ୍ ଏହି ସମୟରେ ହିଁ ସ୍ଥାନୀୟ ଲୋକ କିଛି ବଡଧରଣର ଶବ୍ଦ ଶୁଣିଥିଲେ । ଯାହା ସେମାନଙ୍କୁ ଆତଙ୍କିତ କରିଥିଲା ।
ଅନ୍ୟପଟେ ପ୍ରଥମେ ମେ 7 ତାରିଖରେ ଏଲଜି ପଲିମର ପ୍ଲାଣ୍ଟରେ ଗ୍ୟାସ ଲିକ୍ ପରେ ଜୁନ୍ 29 ତାରିଖରେ ସାଇନର ଲାଇଫ୍ ସାଇନ୍ସ ପ୍ରାଇଭେଟ୍ ଲିମିଟେଡରେ ଗ୍ୟାସ୍ ଲିକ୍ ଓ ଏବେ ଏହି ଅଗ୍ନିକାଣ୍ଡ ସମସ୍ତଙ୍କୁ ଆତଙ୍କିତ କରିଛି ।
ସୂଚନା ଅନୁସାରେ, ଜୁନ୍ 29 ଗ୍ୟାସ ଲିକ୍ ଘଟଣାରେ 2 ଜଣଙ୍କର ମୃତ୍ୟୁ ଘଟିଥିଲା । ଯେତେବେଳେକି ମେ 7 ଏଲଜି ପଲିମର ପ୍ଲାଣ୍ଟ ଗ୍ୟାସ ଲିକ୍ରେ 15 ଜଣଙ୍କ ମୃତ୍ୟୁ ଘଟିବା ସହ 500ରୁ ଅଧିକ ଲୋକ ଅସୁସ୍ଥ ହୋଇଥିଲେ ।
ଆସନ୍ତୁ ନଜର ପକାଇବା 2020ର କିଛି ବଡ କାରଖାନା ଦୁର୍ଘଟଣା ଉପରେ...