ନୂଆଦିଲ୍ଲୀ: ଆରପାରିରେ ଅରୁଣ ଜେଟଲୀ । ମୋଦିି ସରକାରରେ ଅର୍ଥ ଏବଂ ପ୍ରତିରକ୍ଷା ମନ୍ତ୍ରଣାଳୟର ଦାୟିତ୍ବ ସମ୍ଭାଳିଥିବା ଜେଟଲୀଙ୍କ ଆଜି ଦେହାନ୍ତ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ 66 ବର୍ଷ ହୋଇଥିଲା, ଦୀର୍ଘ ଦିନ ଧରି ସେ ଦିଲ୍ଲୀସ୍ଥିତ ଏମ୍ସରେ ଚିକିତ୍ସିତ ହେଉଥିଲେ । ଚଳିତ ବର୍ଷ ଅଗଷ୍ଟ ମାସରେ ଦଳର ଦୁଇ ତୁଙ୍ଗ ନେତା ଅରୁଣ ଜେଟଲୀ ଏବଂ ସୁଷମା ସ୍ୱରାଜଙ୍କୁ ହରାଇଛି ଭାରତୀୟ ଜନତା ପାର୍ଟି (ବିଜେପି) ।
ସେପଟେ ନିଜ ଦଳର ଜଣେ ଟାଣୁଆ ନେତାଙ୍କୁ ହରାଇ ବିଜେପି ଶିବିରରେ ଶୋକର ଛାୟା ଖେଳିଯାଇଛି । ତାଙ୍କୁ ହରାଇବା ବ୍ୟକ୍ତିଗତ ଜୀବନରେ ଏକ ଅପୂରଣୀୟ କ୍ଷତିପୂରଣ ବୋଲି ଟ୍ବିଟ କରି ଜଣାଇଛନ୍ତି ଗୃହମନ୍ତ୍ରୀ ଅମିତ ଶାହା । ଏଥିସହିତ ସେ ଆହୁରି ମଧ୍ୟ କହିଛନ୍ତି, ଜେଟଲୀ କେବଳ ଯେ ଦଳୀୟ ନେତା ନଥିଲେ ବରଂ ସେ ତାଙ୍କ ପରିବାରର ଜଣେ ସଦସ୍ୟ ଥିଲେ । ଯାହାଙ୍କ ଠାରୁ ସେ ସବୁବେଳେ ସହଯୋଗ ଓ ମାର୍ଗଦର୍ଶନ ପାଇଛନ୍ତି ବୋଲି କହିଛନ୍ତି ଅମିତ ଶାହା ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ଜେଟଲୀଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି । ବୃତ୍ତିରେ ସେ ଜଣେ କୁଶଳୀ ଓକିଲ ସାଙ୍ଗକୁ ଅଭିଜ୍ଞ ନେତା ଥିଲେ । ଆଉ ମୁଁ ମୋର ଜଣେ ବନ୍ଧୁଙ୍କୁ ହରାଇଛି ବୋଲି କହିଛନ୍ତି ରାଜନାଥ। ଅରୁଣ ଜେଟଲୀ ବିଭିନ୍ନ କ୍ଷେତ୍ରରେ ଦେଶର ସେବା କରିବା ସହ ସେ ପାର୍ଟିର ସଙ୍ଗଠନର ଏକ ଆସେଟ ଥିଲେ । ଏଥିସହ ଦେଶର ଅର୍ଥନୀତିରେ ତାଙ୍କର ଯୋଗଦାନ ସବୁଦିନ ପାଇଁ ଚିରସ୍ମରଣୀୟ ରହିବ ବୋଲି ପ୍ରତିରକ୍ଷା ମନ୍ତ୍ରୀ କହିଛନ୍ତି ।