ନୂଆଦିଲ୍ଲୀ: ବିପୁଳ ଆସନରେ ବିଜୟ ଆଡକୁ ମୁହାଁଉଛି ଆପ୍ । ପୁଣି ଥରେ ଦିଲ୍ଲୀ ଦଖଲ କରିବ ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି । ମୋଟ ୭୦ଟି ଆସନରୁ ଆପ୍ 17ଟି ବିଜୟ ଓ 43 ସିଟରେ ଆଗୁଆ ରହିଛି ଓ ବିଜେପି ମାତ୍ର 10 ଟି ଆସନରେ ଆଗୁଆ ରହିଛି । ସତ୍ତାଧାନୀ ଆପ୍କୁ ବହୁମତ ମିଳିଛି । 70 ସିଟ ମଧ୍ୟରୁ ଶାହିନବାଗ ଅଞ୍ଚଳ ଆସୁଥିବା ଓଖଲା ବିଧାନସଭା ଆସନ ଉପରେ ସମସ୍ତଙ୍କ ନଜର ରହିଛି । ବିଗତ 50 ଦିନ ହେବ ସିଏଏକୁ ବିରୋଧ କରି ଏଠାରେ ବିକ୍ଷୋଭ ପ୍ରଦର୍ଶନ ଜାରି ରହିଛି ।
ଓଖଲା ଆସନରୁ ଆପ୍ ପ୍ରାର୍ଥୀ ଅମାନତୁଲ୍ଲା ଖାନ, କଂଗ୍ରେସର ପରଭେଜ ହାଶମୀ ଓ ବିଜେପିର ବ୍ରହମ ସିଂହଙ୍କ ଠାରୁ ବିପୁଳ ଭୋଟ ବ୍ୟବଧାନରେ ବିଜୟ ଲାଭ କରିଛନ୍ତି । ଆପ୍ ପ୍ରାର୍ଥୀ ଅମାନତୁଲ୍ଲା ପୂର୍ବରୁ 2015 ନିର୍ବାଚନରେ ଏହି ସିଟ୍ରେ ନିର୍ବାଚିତ ହୋଇଥିଲେ । ଦ୍ବିତୀୟ ଥର ପାଇଁ ଓଖଲା ଦଖଲ କରିଛନ୍ତି ଅମାନତୁଲ୍ଲା ।
ବିଜୟ ପରେ ଇଟିଭି ଭାରତ ସମ୍ବାଦଦାତା ଭେଟିଥିଲେ ଅମାନତୁଲ୍ଲାଙ୍କୁ । ଦ୍ବିତୀୟ ଥର ବିଜୟ ପରେ ସେ ଓଖଲାର ଲୋକଙ୍କୁ ଧନ୍ୟବାଦ ଦେଇଛନ୍ତି । ଏହାସହ ସାମ୍ପ୍ରଦାୟିକତାର ରାଜନୀତି କରୁଥିବା ଦଳର ପରାଜୟ ହୋଇଛି ବୋଲି କହିଛନ୍ତି । କାମ ଭରସାରେ ଲୋକେ ଭୋଟ ଦେଇଛନ୍ତି, ଆଗକୁ ବିକାଶ ଧାରା ଜାରି ରହିବ ବୋଲି ସେ କହିଛନ୍ତି । ଘୃଣାର ରାଜନୀତି କରୁଥିବା ଲୋକଙ୍କୁ ଓଖଲାର ହିନ୍ଦୁ ଓ ମୁସଲମାନ ଭୋଟର ଜବାବ ଦେଇଥିବା ସେ କହିଛନ୍ତି ।