ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନକୁ ସ୍ବଚ୍ଛ, ଅବାଧ ଏବଂ ନିରପେକ୍ଷ କରିବା ଉଦ୍ଦେଶ୍ୟରେ ନିର୍ବାଚନ ଆୟୋଗଙ୍କ ତତ୍ତ୍ବାବଧାନରେ କଡା ନଜର ରଖାଯାଇଛି। ଏହାସହ ସମଗ୍ର ଦିଲ୍ଲୀରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି। ଶୁକ୍ରବାର କମଳା ମାର୍କେଟ ଇଲାକାରେ ଦିଲ୍ଲୀ ନିର୍ବାଚନ କମିଶନ ଦ୍ବାରା 1କୋଟି ନଗଦ ଅର୍ଥ ରାଶି ଜବତ କରିଛି। ଏକ BMW କାରରୁ 1କୋଟି ଜବତ କରିବା ସହ ଏହାର ଚାଳକ ଆଜାଦକୁ ଅଟକ ରଖାଯାଇଛି ।
ଦିଲ୍ଲୀ ବିଧାନସଭା ନିର୍ବାଚନକୁ ଧ୍ୟାନରେ ରଖି ଦିଲ୍ଲୀ ନିର୍ବାଚନ କମିଶନର ଷ୍ଟାଟିକ ସର୍ଭିଲାନ୍ସ ଟିମ ଜେବି ରୋଡ ଇଲାକାରେ ଯାଞ୍ଚ କରୁଥିଲେ। ଏହି ସମୟରେ ସାମ୍ନା ପଟରୁ ଆସୁଥିବା BMW କାର ଉପରେ ସର୍ଭିଲାନ୍ସ ଟିମର ସନ୍ଦେହ ଉପୁଜିଥିଲା। ପରବର୍ତ୍ତୀ ସମୟରେ ଗାଡିକୁ ଅଟକ ରଖି ଚାଳକକୁ ପଚରାଉଚରା କରିଥିଲା ଟିମ୍ । ପରେ ଗାଡିକୁ ଯାଞ୍ଚ କରିବା ସମୟରେ ସେଥିରୁ ବିପୁଳ ପରିମାଣର ଟଙ୍କା ଜବତ କରାଯାଇଥିଲା । ଟଙ୍କା ବିଷୟରେ ଗାଡି ଚାଳକଙ୍କ ଠାରୁ ସନ୍ତୋଷଜନକ ଉତ୍ତର ନମିଳିବା ପରେ ଟଙ୍କା ଜବତ କରି ଗାଡି ସହ ଚାଳକଙ୍କୁ ଅଟକ ରଖିଛି ଟିମ ।
ଗାଡିରୁ ଜବତ 1 କୋଟି ଟଙ୍କାକୁ ଜବତ କରି ଷ୍ଟାଟିକ ସର୍ଭିଲାନ୍ସ ଟିମ ଆୟକର ବିଭାଗକୁ ହସ୍ତାନ୍ତର କରିଛି । ଛାନଭିନ ପରେ ଏହି ଟଙ୍କା ଆଗ୍ରା ନିବାସୀ ଆଦିତ୍ୟ ଅଗ୍ରୱାଲଙ୍କ ବୋଲି ଜଣାପଡିଛି । ପରେ ଫୋନ ଯୋଗେ ଆଦିତ୍ୟଙ୍କୁ ଥାନାକୁ ଡକା ଯାଇଥିଲା। ମାତ୍ର ତାଙ୍କ ଠାରୁ ଏହି ଅର୍ଥରାଶି ନେଇ କୌଣସି ସନ୍ତୋଷଜନକ ଉତ୍ତର ମଧ୍ୟ ମିଳିନଥିଲା। ପରେ ଜବତ ଟଙ୍କାକୁ ଆୟକର ବିଭାଗ ନିଜ ଅଧିନକୁ ନେଇଛି।