ନୂଆଦିଲ୍ଲୀ: କୋରୋନା ମହାମାରୀ ମଧ୍ୟରେ ନିଜର ହିତାହିତ ଜ୍ଞାନ ଭୁଲିଗଲାଣି ମାନବ ଜାତି । ପ୍ରତିଦିନ ଏମିତି କିଛି ଖବର ଆସୁଛି ଯେଉଁଠି କୋରୋନା ସନ୍ଦେହରେ ବଢିଚାଲିଛି ଘୃଣା ଓ ଅମାନବିକତା । ଏବେ ଉତ୍ତରପ୍ରଦେଶ ମଥୁରାରେ ଏକ ବସରେ ଯାଉଥିବା ଜଣେ ମହିଳାଙ୍କୁ କୋରୋନା ଆକ୍ରାନ୍ତ ସନ୍ଦେହ କରି କଣ୍ଡକ୍ଟର ତାଙ୍କୁ ଚଳନ୍ତା ବସରୁ ଠେଲି ଦେଇଥିବା ଘଟଣା ଦେଖିବାକୁ ମିଳିଛି । ଏହି ଘଟଣାରେ ମହିଳାଙ୍କର ମୃତ୍ୟୁ ଘଟିଛି ।
ଦିଲ୍ଲୀର ମଣ୍ଡବାଲିରେ ରହୁଥିବା ଏହି ମହିଳା ଜଣଙ୍କ ବୟସ ମାତ୍ର 19 ବର୍ଷ । ସେ ନିଜ ପରିବାରଙ୍କ ସହ ବସରେ ଯାତ୍ରା କରୁଥିଲେ । ସୂଚନା ଅନୁଯାୟୀ, ସେ ଆପେଣ୍ଡିସରେ ପୀଡିତ ଥିଲେ ଏବଂ ସ୍ୱାସ୍ଥ୍ୟ ଖରାପ କାରଣରୁ ସେ ଦୁର୍ବଳ ହୋଇପଡିଥିଲେ। ଏହା ଦେଖି ବସ ଡ୍ରାଇଭର ଏବଂ କଣ୍ଡକ୍ଟର ତାଙ୍କୁ କୋରୋନା ସଂକ୍ରମଣ ହୋଇଥିବା ସନ୍ଦେହ କରିଥିଲେ । ଏହାପରେ ସେମାନେ ତାଙ୍କୁ ଚଳନ୍ତା ବସରୁ ଧକ୍କା ଠେଲି ଦେଇଥିଲେ ।