ହାଇଦ୍ରାବାଦ: ହାଇଦ୍ରାବାଦରେ କଡାକଡି ଭାବେ ପାଳନ ହେଉଛି ଲକଡାଉନ ନିୟମ । ଏହାକୁ ସହରବାସୀ କିପରି ପାଳନ କରୁଛନ୍ତି ତାହା ଦେଖିବା ପାଇଁ ତେଲେଙ୍ଗାନା ଓ ହାଇଦ୍ରାବାଦ ପୋଲିସକୁ ମିଳିଛି ଟେକ୍ନୋଲୋଜିର ସହାୟତା । ଗ୍ଲୋବାଲ ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜି ସଲ୍ୟୁସନ୍ସ କମ୍ପାନୀ ସିଏଣ୍ଟ ଏହି ଡ୍ରୋନ ଆଧାରିତ ଟେକ୍ନୋଲୋଜି ଯୋଗାଇବାରେ ସାହାଯ୍ୟ କରିଛି ।
ଏନେଇ ସାଇବରାବାଦ ପୋଲିସ ଟ୍ବିଟର ଜରିଆରେ ସୂଚନା ଦେଇଛନ୍ତି । ଏହାଦ୍ବାରା ପୋଲିସ ଲକଡାଉନ ସମ୍ପର୍କିତ ଘୋଷଣା କରିବା ସହ ଗ୍ରାଉଣ୍ଡରେ ମୁତୟନ ପୋଲିସଙ୍କୁ ଲୋକଙ୍କ ଗତିବିଧି ଉପରେ କଡା ନଜର ରଖିବାରେ ସାହାଯ୍ୟ କରୁଛି ।
ଏହି ଡ୍ରୋନରେ ସର୍ଭିଲେନ୍ସ କ୍ୟାମେରା, ଥର୍ମାଲ ଇମେଜିଂ ପେଲୋଡ୍ସ ଓ ଜନ ସମାଗମରେ ଘୋଷଣା କରିବା ପାଇଁ ସ୍କାଏ ସ୍ପିକର ଖଞ୍ଜା ଯାଇଛି । ଏଥିସହ ଏହି ଡ୍ରୋନରେ ଥିବା ଏରିଆଲ ଇନସ୍ପେକ୍ସନ କ୍ଷମତା ପୋଲିସ ଫୋର୍ସକୁ ବହୁମାତ୍ରାରେ ସାହାଯ୍ୟ କରିବା ବୋଲି ଆଶା ରହିଛି ।
ଏହି ଡ୍ରୋନ ସହାୟତା ପ୍ରତି ମୁହୂର୍ତ୍ତର ଖବର ରଖିବା ପୋଲିସ ପାଇଁ ସହଜ ହେବା ସହ ଆବଶ୍ୟକ ସ୍ଥଳେ ପୋଲିସ ଜରୁରୀ ପଦକ୍ଷେପ ନେବାରେ ମଧ୍ୟ ସମର୍ଥ ହେଉଛି । ତେବେ ଏନେଇ ଟ୍ବିଟ ଯୋଗେ ସାଇବରାବାଦ ପୋଲିସ କହିଛି କି ସିଏଣ୍ଟ ସହ ମିଶି ସ୍ଥଳଭାଗରେ ମୁତୟନ ପୋଲିସକୁ ଡ୍ରୋନ ଦ୍ବାରା ସାହାଯ୍ୟ ମିଳିବା ସହ କାମ ଆହୁରି ସହଜ ହେଉଛି । ଏହା ଅନେକ ସମ୍ବେଦନଶୀଳ ଅଞ୍ଚଳରେ ମଧ୍ୟ ନଜର ରଖିବାରେ ସାହାଯ୍ୟ କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
