ସାଥିଙ୍କ ଗୁଳିରେ ଜୀବନ ହାରିଲେ 3 ଯବାନ

ଜଣେ ସିଆରପିଏଫ୍ ଯବାନ ନିଜର 3ଜଣ ସାଥି ଯବାନଙ୍କୁ ଗୁଳି କରିବା ସହ ନିଜେ ଗୁଳି କରି ଆତ୍ମହତ୍ୟା ଉଦ୍ୟମ କରିଛନ୍ତି । ଗୁଳିମାଡର ଶିକାର ହୋଇଥିବା 3 ଯବାନ ଦିଲ୍ଲୀର ଯୋଗେନ୍ଦ୍ର ଶର୍ମା, ରାଜସ୍ଥାନର ପୋଖର ମଲ ଓ ରେଓ୍ବାଡୀର ଉମେଦଙ୍କର ମୃତ୍ୟୁ ଘଟିଛି ।

ଶ୍ରୀନଗର: ଜମ୍ମୁ-କଶ୍ମୀରର ସ୍ଥିତ ସିଆରପିଏଫ୍ କ୍ୟାମ୍ପରେ ଅଭାବନୀୟ ଘଟଣା । ଜଣେ ସିଆରପିଏଫ୍ ଯବାନ ନିଜର 3ଜଣ ସାଥି ଯବାନଙ୍କୁ ଗୁଳି କରିବା ସହ ନିଜ ଉପରେ ମଧ୍ୟ ଗୁଳି ଚାଳନା କରି ଆତ୍ମହତ୍ୟା ଉଦ୍ୟମ କରିଛନ୍ତି। ଏଥିରେ 3ଜଣ ସହକର୍ମୀଙ୍କ ମୃତ୍ୟୁ ହୋଇଛି । ଗୁଳିଚାଳନା କରିଥିବା ଯବାନଙ୍କୁ ଗୁରୁତର ଅବସ୍ଥାରେ ଉଦ୍ଧମପୁର ସ୍ଥିତ ମିଲିଟାରୀ ଡାକ୍ତରଖାନାରେ ଭର୍ତ୍ତି କରାଯାଇଛି ।

ଯବାନ ଜଣକ ନିଜ 3ଜଣ ସାଥିଙ୍କ ସହ କୌଣସି ଘଟଣାକୁ ନେଇ ବଟାଲିୟନ କ୍ୟାମ୍ପରେ କଥାକଟି ହୋଇଥିଲେ । ଏହାପରେ ବିବାଦ ବଢିଯିବାରୁ ନିଜ ଉପରୁ ନିୟନ୍ତ୍ରଣ ହରାଇ କନେଷ୍ଟବଳ ଅଜିତ୍ ସିଂ 3 ସାଥିଙ୍କ ଉପରେ ଗୁଳିଚାଳନା କରିଥିଲେ । ଏହାପରେ ନିଜକୁ ମଧ୍ୟ ଗୁଳି କରିଥିଲେ । ଗୁଳିଚଳନାର ଶବ୍ଦ ଶୁଣି ଅନ୍ୟ ଯବାନ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଇଥିଲେ । ଗୁଳିମାଡର ଶିକାର ହୋଇଥିବା 3 ଯବାନ ଦିଲ୍ଲୀର ଯୋଗେନ୍ଦ୍ର ଶର୍ମା, ରାଜସ୍ଥାନର ପୋଖର ମଲ ଓ ରେଓ୍ବାଡୀର ଉମେଦଙ୍କର ମୃତ୍ୟୁ ଘଟିଛି ।