ଚୀନ୍ ଓ ବିଶ୍ବ ମଧ୍ୟରେ ବେଶ କିଛି ସମୟ ଧରି ଆସ୍ଥାର ଅଭାବ ଦେଖାଦେଇଥିବା ପୃଷ୍ଠଭୂମିରେ କୋଭିଡ-୧୯ ସଙ୍କଟ ଦେଖାଦେଇଛି । ବିଭିନ୍ନ ମହାଦେଶରେ ନିଜର ପ୍ରଭାବ ବିସ୍ତାର ଓ ଅର୍ଥନୈତିକ ଦାସତ୍ବ ଜରିଆରେ ବିଶ୍ବକୁ ଅଧିକାର କରିବା ପାଇଁ ଚୀନର ଉଦ୍ୟମ ହିଁ ଆସ୍ଥା ଅଭାବର ମୁଖ୍ୟ କାରଣ । ଚୀନର ମହତ୍ବାକାଂକ୍ଷୀ ଅର୍ଥନୈତିକ ଓ ଭିତ୍ତିଭୂମି ପ୍ରକଳ୍ପ ଏବଂ ଏହାର ଆନ୍ତର୍ଜାତିକ ସହାୟତା ନୀତି ପଛରେ ଗମ୍ଭୀର ଭୂ-ରାଜନୈତିକ, ସାମରିକ ଓ ସୁରକ୍ଷା ଉଦ୍ଦେଶ୍ୟ ନିହିତ ରହିଛି ବୋଲି ଆନ୍ତର୍ଜାତିକ ସହମତି ପ୍ରକାଶ ପାଇଛି । ବିଶେଷ କରି ଚୀନ୍ର ଓାନ ବେଲ୍ଟ ଓାନ ରୋଡ୍ –ଓବିଓଆର୍ ବା ବେଲ୍ଟ ଆଣ୍ଡ୍ ରୋଡ୍-ବିଆରଆଇ ପଦକ୍ଷେପ ଓ ଏହାର ଉତ୍ପାଦ ଦ୍ବାର ପାଲଟିଥିବା ୠଣ ଯନ୍ତା ନୀତିକୁ ସନ୍ଦେହ ଦୃଷ୍ଟିରେ ଦେଖାଯାଉଛି । ଆମେରିକା ଓ ଭାରତ ଭଳି ବଡବଡ ଦେଶ ଚୀନ ସହ ସୃଷ୍ଟି ହୋଇଥିବା ବଡ ଧରଣର ନିଅଣ୍ଟିଆ ବାଣିଜ୍ୟକୁ ନେଇ ଉଦବେଗ ପ୍ରକାଶ କରିଛନ୍ତି । ଏହାଛଡା ଆନ୍ତର୍ଜାତିକ କଂପାନି ଓ ବୈଶ୍ବିକ ପ୍ରତିଷ୍ଠାନଗୁଡିକୁ ନିୟନ୍ତ୍ରଣ ପାଇଁ ଚୀନ୍ର ବଢିଚାଲିଥିବା ପ୍ରାଧାନ୍ୟକୁ ନେଇ ବି ବିଶ୍ବ ସମୁଦାୟ ଚିନ୍ତିତ । ବିବାଦୀୟ ସାଉଥ୍ ଚାଇନା ସାଗରରେ ଚୀନ୍ର ସାମରିକ ଉପସ୍ଥିତି ଜାହାଜ ଓ ବିମାନର ଅବାଧ ଚଳାଚଳ ପ୍ରତି ବିପଦ ସୃଷ୍ଟି କରିଛି । ସଂପୃକ୍ତ ଅଞ୍ଚଳ ଦେଇ ବହୁ କୋଟି ଡଲାରର ଆନ୍ତର୍ଜାତିକ ବାଣିଜ୍ୟ କାରବାର ହୋଇଥାଏ । କୋଭିଡ-୧୯ ମହାମାରୀ ଓ ଏଥିଯୋଗୁ ସୃଷ୍ଟି ହୋଇଥିବା ସଂକଟରୁ ଫାଇଦା ଉଠାଇବା ପାଇଁ ଚୀନ୍ର ଉଦ୍ୟମ ଆନ୍ତର୍ଜାତିକ ସମୁଦାୟକୁ ସତର୍କ କରିବା ସହ ଏହାର ଭାବମୂର୍ତ୍ତି ଓ ପ୍ରତିଷ୍ଠାରେ ଯେ ଆଞ୍ଚ ଆଣିବ, ତାହା ସ୍ପଷ୍ଟ ହୋଇଯାଉଛି ।
ଆମେରିକା ଓ ଅନ୍ୟ କିଛି ଦେଶର ବିଶ୍ବାସ ଯେ, କୋଭିଡ-୧୯ ଭାଇରସ ପଛରେ ଚୀନ୍ର ଷଡଯନ୍ତ୍ର ରହିଛି । ଏସବୁ ଦେଶଙ୍କ ମତରେ ଚୀନ୍ର ଉହାନ ସହରର ଏକ ଲାବ୍ରେ ସୃଷ୍ଟି କରାଯାଇଥିଲା ଭାଇରସ୍ ଓ ବିଶ୍ବକୁ ଦୁର୍ବଳ କରିବାକୁ ହିଁ ଏହାକୁ ବିସ୍ତାର କରାଗଲା । ମହାମାରୀ ନେଇ ଚୀନ୍ ଠିକ୍ ସମୟରେ ବିଶ୍ବକୁ ସତର୍କ କରିବାରେ ବିଫଳ ହୋଇଛି ବୋଲି ଆନ୍ତର୍ଜାତିକ ସହମତି ପ୍ରକାଶ ପାଇଛି । ଚୀନର ଏହି ବିଫଳତା ଯୋଗୁ ବ୍ୟାପକ ଜୀବନ ହାନି ହେବା ସହ ବିଶ୍ବ ଅର୍ଥନୀତିକୁ ଝଟକା ଲାଗିଲା ବୋଲି ମତ ପ୍ରକାଶ ପାଇଛି । କୋରୋନା ବାବଦରେ ବିଶ୍ବ ସ୍ବାସ୍ଥ୍ୟ ସଂଗଠନକୁ ମଧ୍ୟ ଚୀନ୍ ବ୍ୟବହାର କରିଥିଲା ବୋଲି ଅଭିଯୋଗ ହେଉଛି । ବିଶ୍ବ ସ୍ବାସ୍ଥ୍ୟ ସଂଗଠନର ମହାନିର୍ଦ୍ଦେଶକ ଟେଡ୍ରସ୍ ଆଧାନମ୍ ଘେବ୍ରିୟେସସ୍ ଚୀନ୍ର ସମର୍ଥନରେ ହିଁ ୨୦୧୭ରେ ନିବାର୍ଚିତ ହୋଇଥିଲେ । ସେ ମଧ୍ୟ ଚୀନର ବିଫଳତାକୁ ଘୋଡାଇଥିଲେ ବୋଲି ଅଭିଯୋଗ ହୋଇଛି । ମାରାତ୍ମକ ଭାଇରସର ବିସ୍ତାର ନେଇ ଚୀନର ପକ୍ଷକୁ ବିଶ୍ବ ସ୍ବାସ୍ଥ୍ୟ ସଂଗଠନର ମୁଖ୍ୟ ସମର୍ଥନ କରିବା ସହ ଏହାକୁ ନିୟନ୍ତ୍ରଣ ପାଇଁ ଚୀନର ଉଦ୍ୟମକୁ ପ୍ରଶଂସା ବି କରିଥିଲେ ।
ଏଣେ ସଂକଟରୁ ଫାଇଦା ନେବା ପାଇଁ ଉଦ୍ୟମ ଯୋଗୁ ଚୀନର ଭାବମୂର୍ତ୍ତି ଆହୁରି ଖରାପ ହେବାରେ ଲାଗିଲା । କିଛି ମିଡିଆ ରିପୋର୍ଟ ଅନୁସାରେ ଇଟାଲୀରେ ଯେତେବେଳେ ମହାମାରୀ ଭୟଙ୍କର ରୂପ ନେଲା, ସେତେବେଳେ ଚୀନ୍ ଇଟାଲୀକୁ ପର୍ସନାଲ୍ ପ୍ରୋଟେକସନ ଇକ୍ୟୁପମେଂଟ୍ -ପିପିଇ ବିକ୍ରି କରିଥିଲା । ହେଲେ ଅଭିଯୋଗ ହୋଇଛି ଯେ, ସେହି ପିପିଇ ସବୁ ଇଟାଲୀ ହିଁ ଚୀନ୍କୁ ପୂର୍ବରୁ ଅନୁଦାନ ଭାବେ ଦେଇଥିଲା । ଯଦି ଏହି ଅଭିଯୋଗ ସତ୍ୟ ହୋଇଥାଏ , ତାହା ହେଲେ ନିଶ୍ଚିତ ଭାବେ ଏହା ଏକ ଲଜ୍ଜାଜନକ କାମ । ଏହାଛଡା ନିମ୍ନମାନର ମେଡିକାଲ ସାମଗ୍ରୀ ବିକ୍ରି କରି ଚୀନ୍ ଆର୍ଥିକ ଫାଇଦା ପାଇବାକୁ ବି ଉଦ୍ୟମ କରିଥିବା ରିପୋର୍ଟ ପ୍ରକାଶ ପାଇଛି । ଚୀନ୍ର ୫୦ ହଜାର ତ୍ରୁଟିପୂର୍ଣ୍ଣ କୁଇକ୍ ଟେଷ୍ଟିଂକୁ କିଟ୍ ସ୍ପେନ ଫେରାଇ ଦେଇଥିବା ଜଣାପଡିଛି । ସେହିପରି ନେଦରଲାଣ୍ଡସ୍ ମଧ୍ୟ ଚୀନର ସାମଗ୍ରୀ ନିମ୍ନମାନର ଦର୍ଶାଇ ଅଗ୍ରାହ୍ୟ କରିଦେଇଛି ।
କୋରୋନା ସଂକଟ ଯୋଗୁଁ ବିଶ୍ବର ସେୟାର ବଜାରରେ ମାନ୍ଦାବସ୍ଥା ଦେଖାଦେଇଛି । ଚୀନ ଏଥିରୁ ମଧ୍ୟ ଫାଇଦା ଉଠାଇବା ପାଇଁ ଚେଷ୍ଟା କରିପାରେ ବୋଲି ଆଶଙ୍କା ସୃଷ୍ଟି ହୋଇଛି । ସେୟାର ବଜାରରେ ଅସ୍ଥିରତାର ଫାଇଦା ଉଠାଇ ଚୀନ୍ ବିଦେଶୀ ବଜାରରେ ଅଂଶଧନ କିଣି ସଂପତି ଅଧିଗ୍ରହଣ କରିପାରେ ବୋଲି କୁହାଯାଉଛି । ସୁରକ୍ଷା କାରଣରୁ ଆମେରିକା ଓ କିଛି ୟୁରୋପୀୟ ରାଷ୍ଟ୍ର ଚୀନ କମ୍ପାନୀମାନଙ୍କୁ ନିଜ ନିଜର ଟେକ୍ନୋଲୋଜି କମ୍ପାନୀ ବିକ୍ରି କରୁନାହାନ୍ତି । ମହାମାରୀ ବ୍ୟାପିବା ପରେ ଇଟାଲୀ, ସ୍ପେନ ଓ ଜର୍ମାନୀ ଭଳି ଦେଶ ଚୀନ୍ ରୁ ବିଦେଶୀ ପୁଞ୍ଜି ବିନିଯୋଗ ପ୍ରସ୍ତାବର ଭଲଭାବେ ଯାଞ୍ଚ କରିବେ ବୋଲି ଘୋଷଣା କରିଛନ୍ତି ।
କୋରୋନା ଭାଇରସ ନେଇ ଆଗୁଆ ସୂଚନା ଦେଇ ନଥିବାରୁ କ୍ଷତିପୂରଣ ଦାବିରେ ଚୀନ୍ ବିରୋଧରେ ଆମେରିକା ସମେତ ବିଭିନ୍ନ ଦେଶରେ ମାମାଲ ରୁଜୁ ହୋଇଛି । ମହାମାରୀ ବ୍ୟାପିବା ପଛରେ ଚୀନର ଭୂମିକା ଯାଞ୍ଚ କରିବାକୁ ପାଶ୍ଚାତ୍ୟ ଦେଶଗୁଡିକ ଦାବି କରୁଛନ୍ତି । ଚୀନକୁ ସମର୍ଥନ କରିଥିବା ଅଭିଯୋଗ ଆଣିବା ସହ ବିଶ୍ବ ସ୍ବାସ୍ଥ୍ୟ ସଂଗଠନକୁ ଆର୍ଥିକ ଅନୁଦାନ ହ୍ରାସ ଭଳି ପଦକ୍ଷେପ ନେଇଛି ଆମେରିକା ।