ନୂଆଦିଲ୍ଲୀ: କଂଗ୍ରେସ ଅନ୍ତରୀଣ ସଭାପତି ସୋନିଆ ଗାନ୍ଧୀ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀ ମାନଙ୍କ ସହ ଆଲୋଚନା କରିଛନ୍ତି । ବୁଧବାର ମଧ୍ୟାହ୍ନରେ ଏହି ବୈଠକ ଅନୁଷ୍ଠିତ ହୋଇଛି । COVID-19 ସଙ୍କଟ କାରଣରୁ ରାଜ୍ୟ ଗୁଡିକ କୋଟି କୋଟି ଟଙ୍କା ରାଜସ୍ବ ହରାଇଥିବାରୁ ତୁରନ୍ତ ଆର୍ଥିକ ସହାୟତା ଆବଶ୍ୟକ କରୁଥିବା ଏହି ବୈଠକରେ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ କହିଛନ୍ତି ।
କୋରୋନା ଓ ଲକଡାଉନ ସ୍ଥିତି ସଂପର୍କରେ ଆଲୋଚନା ପାଇଁ ଭିଡିଓ କନଫରେନ୍ସିଂ ମାଧ୍ୟମରେ ଏହି ସଭା ଅନୁଷ୍ଠିତ ହୋଇଥିଲା । ଏହି ସଭାରେ ପୂର୍ବତନ ପ୍ରଧାନମନ୍ତ୍ରୀ ତଥା ଦଳର ବରିଷ୍ଠ ନେତା ଡ. ମନମୋହନ ସିଂ, ରାହୁଲ ଗାନ୍ଧୀଙ୍କ ସମେତ ଅନ୍ୟ ନେତାମାନେ ଉପସ୍ଥିତ ଥିଲେ । ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହେଲଟ କହିଛନ୍ତି ଯେ, ରାଜ୍ୟଗୁଡିକ ପୂର୍ବରୁ କୋଟି କୋଟି ଟଙ୍କା ହରାଇଥିବାରୁ ସ୍ବତନ୍ତ୍ର ପ୍ୟାକେଜ ଆବଶ୍ୟକ କରୁଛନ୍ତି । ସେହିପରି ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଗେଲ କେନ୍ଦ୍ରରୁ ତୁରନ୍ତ ଆର୍ଥିକ ସହାୟତା ପାଇଁ ଦାବି କରିଛନ୍ତି ।
ବାଗେଲ କହିଛନ୍ତି, ‘ ସ୍ବତନ୍ତ୍ର ପ୍ୟାକେଜ ଦିଆ ଯାଉନାହିଁ, ଦିଆ ନଗଲେ ରାଜ୍ୟ ଓ ଦେଶ କିପରି ଚାଲିବ? ଆମେ 10ହଜାର କୋଟି ଟଙ୍କାର ରାଜସ୍ବ ହରାଇଛୁ । ରାଜ୍ୟଗୁଡିକ ସ୍ବତନ୍ତ୍ର ପ୍ୟାକେଜ ପାଇଁ ବାରମ୍ବାର ପ୍ରଧାନମନ୍ତ୍ରୀଙ୍କୁ ଅନୁରୋଧ କରିଛନ୍ତି । ହେଲେ ଏପର୍ଯ୍ୟନ୍ତ ଭାରତ ସରକାରଙ୍କ ଠାରୁ କୌଣସି ପଦକ୍ଷେପ ନିଆଯାଇନାହିଁ । ’ମୁଖ୍ୟମନ୍ତ୍ରୀ ବାଗେଲ ପୁଣି କହିଛନ୍ତି, ‘ରାଜ୍ୟଗୁଡିକ ଏକ ଭୟଙ୍କର ଅର୍ଥନୈତିକ ସଙ୍କଟର ସମ୍ମୁଖୀନ ହେଉଛନ୍ତି । ସେମାନଙ୍କୁ ତୁରନ୍ତ ସହାୟତା ଯୋଗାଇ ଦିଆଯିବା ଆବଶ୍ୟକ । ଛତିଶଗଡ ହେଉଛି ଗୋଟିଏ ରାଜ୍ୟ ଯେଉଁଠାରେ 80% କ୍ଷୁଦ୍ର ଶିଳ୍ପ ପୁନଃ କାର୍ଯ୍ୟକ୍ଷମ ହୋଇଛି ଓ ପ୍ରାୟ 85ହଜାର କର୍ମଚାରୀ କାମକୁ ଫେରିଛନ୍ତି ।’