ନୂଆଦିଲ୍ଲୀ : ଆମେରିକା ଦ୍ବାରା ଏଚ-1 ବି ଭିସା ନିଲମ୍ବନ ଏବଂ କୁଏତରେ ପାରିତ ଆଇନକୁ ନେଇ ମୋଦି ସରକାରଙ୍କ ଉପରେ ବର୍ଷିଛି କଂଗ୍ରେସ । ବିଦେଶରେ ଦେଶର ନାମ ଉଚ୍ଚା କରୁଥିବା ଲୋକଙ୍କ ସାହାଯ୍ୟ ପାଇଁ ସରକାରଙ୍କ ପାଖରେ କୌଣସି ନୀତି ନଥିବା ଅଭିଯୋଗ କରିଛି ଦଳ । ଏହା ସହିତ ସରକାର ନିଜର ତଥାକଥିତ ବନ୍ଧୁ ଡୋନାଲ୍ଡ ଟ୍ରମ୍ପଙ୍କ ସହ ଆଲୋଚନା କରି ଏହି ସମସ୍ୟାର ସମାଧାନ କରିବା ଉଚିତ୍ ବୋଲି କଂଗ୍ରେସ ମୁଖପାତ୍ର ଅଭିଶେଷ ମନୁ ସିଂଘବୀ କହିଛନ୍ତି ।
ଇନଷ୍ଟିଚ୍ୟୁଟ୍ ଅଫ୍ ଇଣ୍ଟରନ୍ୟାସନାଲ୍ ଏଜୁକେସନ୍ (IIE) ଅନୁଯାୟୀ, 2018-19 ରେ ବିଭିନ୍ନ ସ୍ନାତକ ଏବଂ ସ୍ନାତକୋତ୍ତର କାର୍ଯ୍ୟକ୍ରମରେ ଆମେରିକାରେ 1 ମିଲିୟନରୁ ଅଧିକ ଆନ୍ତର୍ଜାତୀୟ ଛାତ୍ର ନାମ ଲେଖାଇଥିଲେ। ଏହା ଦେଶର ମୋଟ ଛାତ୍ର ସମ୍ପ୍ରଦାୟର ପ୍ରାୟ 5.5 ପ୍ରତିଶତ । ସେଥିମଧ୍ୟରୁ ପ୍ରାୟ ତିନି ଚତୁର୍ଥାଂଶ ଏସିଆର । 48 ପ୍ରତିଶତ ଚୀନ ନାଗରିକ ଏବଂ 26 ପ୍ରତିଶତ ଭାରତୀୟ ନାଗରିକ । IIE ଅନୁଯାୟୀ, F-1 ଭିସାଧାରୀ ଛାତ୍ରମାନେ ଏକାଡେମିକ୍ ପାଠ୍ୟକ୍ରମରେ ଅଂଶଗ୍ରହଣ କରୁଥିବାବେଳେ M-1 ଭିସାଧାରୀ ଛାତ୍ରମାନେ 'ଧନ୍ଦାମୂଳକ ପାଠ୍ୟକ୍ରମ ନେଇଥାନ୍ତି । ଆମେରିକାର ନିଷ୍ପତ୍ତି ଭାରତୀୟ ଛାତ୍ରଙ୍କୁ ଖୁବ ଆଘାତ ଦେଇଥିବା ସିଂଘବୀ କହିଛନ୍ତି ।