ଆସାମ: ଦେହରେ କଲେଜ ପୋଷାକ, ଆଉ ହାତରେ ହଳ । ଆଣ୍ଠୁଏ କାଦୁଅ ଭିତରେ ଏମାନେ ଲାଗି ପଡିଛନ୍ତି ତଳି ରୋଇବାରେ । ଏହି ଭିଡିଓ ଏବେ ସୋସିଆଲ ମିଡିଆରେ ବେଶ ଚହଳ ପକାଇଛି ।
ଝିଅ, ପୁଅ ସମସ୍ତେ ମିଳିମିଶି ଶିଖୁଛନ୍ତି ଚାଷକାମ । ଆକଳନ କରୁଛନ୍ତି, ଆହାର ଯୋଗାଉଥିବା ସେହି ଅନ୍ନଦାତାଙ୍କ ପ୍ରତିଟି ଯୋଗଦାନର ମୁଲ୍ୟକୁ । ଏମାନେ ହେଉଛନ୍ତି ଆସାମ ଉଦାଲଗୁରୀ ଜିଲ୍ଲାର ଏସ୍ପାୟର ଜୁନିଅର କଲେଜର ଉଚ୍ଚ ମାଧ୍ୟମିକ ପ୍ରଥମ ଓ ଦିତୀୟ ବର୍ଷର ଛାତ୍ରଛାତ୍ରୀ । ଦେଶ ପାଇଁ ଚାଷ ଓ ଚାଷୀଙ୍କ ଅବଦାନ କେତେ ଗୁରୁତ୍ବପୂର୍ଣ୍ଣ ସେ ସମ୍ପର୍କରେ ଜଣାଇବା ସହ ପିଲାଙ୍କୁ ଅଧିକ କୁଶଳ ଓ କର୍ମନିଷ୍ଠ କରିବା ପାଇଁ ଏହି କଲେଜ ଆପଣାଇଛି ଏଭଳି ପଦକ୍ଷେପ ।କଲେଜର ପାଠ୍ୟକ୍ରମରେ ଚାଷକୁ ଏକ ବିଷୟ ଭାବେ ସାମିଲ କରାଯାଇଛି । ଏଥିପାଇଁ ଛାତ୍ରାଛାତ୍ରୀଙ୍କୁ ପ୍ରାକ୍ଟିକାଲ ଶିକ୍ଷା ବି ଦିଆଯାଏ । ନିଜେ ପିଲା ଚାଷଜମିକୁ ଯାଇ ଏହାର ବାସ୍ତବତା ଜାଣେ । ଗ୍ରାମର ନିଚ୍ଛକତା ସମ୍ପର୍କରେ ବୁଝେ । ଯେ ଆହାର ଯୋଗାଏ, ତାର ବଳିଦାନ ଓ କଷ୍ଟକୁ ଅନୁଭବ କରେ । ଏହି କଲେଜର ପଦକ୍ଷେପ ଓ ପିଲାଙ୍କ ଅଦ୍ୟମ ପ୍ରୟାସ ସାରା ଦେଶରେ ପ୍ରଂଶସା ସାଉଁଟୁଛି ।ସତରେ ଚାଷକାମ ଯାହାର କେଡେ ସୁଖ ତାହାର । ଆଉ ଏହାକୁ ପାଠ ଭାବେ ଆପଣାଇ ପ୍ରତିଟି ଚାଷୀଙ୍କୁ ପ୍ରୋତ୍ସାହିତ କରିଛି ଏହି ସ୍କୁଲ । କେବଳ ଏହି ସ୍କୁଲ ନୁହେଁ ସମଗ୍ର ଦେଶରେ ସବୁ ସ୍କୁଲରେ ଚାଷର ମହତ୍ବ ସମ୍ପର୍କରେ ଅବଗତ କରାଇବା ଦରକାର । ଯେପରି ଯୁବପୀଢି ଇଞ୍ଜିନିୟର, ଡାକ୍ତର ସହ ଚାଷୀ ହେବାକୁ ସ୍ବପ୍ନ ଦେଖିବେ ।
