ପାଟନା: ବିହାର ନିର୍ବାଚନ ତାରିଖ ଯେତେ ପାଖେଇ ଆସୁଛି ରାଜନୈତିକ ବୟାନ ମଧ୍ୟ ସେତେ ବଢି ବଢି ଚାଲିଛି । ଏଥର ବିହାରରେ ରାଜନୈତିକ ଦଳ ମଧ୍ୟରେ ଏପରି ଫାଟ ସୃଷ୍ଟି ହୋଇଛି ମୁଖ୍ୟ ରାଜନୈତିକ ଦଳଗୁଡିକୁ ବାରମ୍ବାର ସ୍ପଷ୍ଟିକରଣ ଦେବାକୁ ପଡୁଛି ଯେ କିଏ ସାଥିରେ ଅଛି ଆଉ କିଏ ନୁହେଁ । ଏନଡିଏ ସହ ମଧ୍ୟ ଘଟିଛି ଏପରି କିଛି ଘଟଣା ।
ନିର୍ବାଚନ ଠିକ ପୂର୍ବରୁ ଏନଡିଏର ହାତ ଛାଡିଥିବା ଏଲଜେପିକୁ ନେଇ ବାରମ୍ବାର ବିଜେପିକୁ ଦେବାକୁ ପଡୁଛି ସ୍ପଷ୍ଟୀକରଣ । ଶୁକ୍ରବାର ଏଲଜେପି ବିହାରରେ ବିଜେପିର ଶୀର୍ଷ ନେତାଙ୍କ ନାଁ ନେଇ ମତଦାତାଙ୍କୁ ଭୂଆଁ ବୁଲାଇବାକୁ ଚେଷ୍ଟା କରୁଥିବା ପୂନର୍ବାର ସ୍ପଷ୍ଟୀକରଣ ଦେଇଛି ବିଜେପି ।
କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ଏଲଜେପି ବିହାର ନିର୍ବାଚନରେ କୌଣସି ପ୍ରଭାବ ପକାଇ ପାରିବ ନାହିଁ । ଏଲଜେପି ବିହାର ନିର୍ବାଚନରେ କୌଣସି ପ୍ରଭାବ ପକାଇପାରିବ ନାହିଁ । ଏହା କେବଳ ରାଜ୍ୟରେ ଏକ ଭୋଟ କଟା ପାଟି ହୋଇ ରହିଯିବ । ତେବେ ବର୍ତ୍ତମାନ ସ୍ଥିତିରେ ବିହାରରେ କେବଳ 4ଟି ଦଳ (ବିଜେପି, ଜେଡିୟୁ, ହମ ଓ ଭିଆଇପି) ରହିଥିବା ସ୍ପଷ୍ଟ କରିଛନ୍ତି ଜାଭଡେକର ।
କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ବିହାରରେ ଚିରାଗ ପାସୱାନ ଏକ ଭିନ୍ନ ରାସ୍ତା ବାଛିଛନ୍ତି । ସେ ବିଜେପିର ବରିଷ୍ଠ ନେତାଙ୍କ ନାଁ ନେଇ ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି। ଆମର କୌଣସି ବି କିମ୍ବା ସି ଦଳ ନାହିଁ | ଏହା ସହ ଜାଭଡେକର ଦାବି କରିଛନ୍ତି ଯେ ବିହାର ନିର୍ବାଚନରେ ଏନଡିଏ ଏକ ଚତୁର୍ଥାଂଶ ସଂଖ୍ୟାଗରିଷ୍ଠତା ହାସଲ କରିବ ଏବଂ ଚିରାଗଙ୍କ ଦଳ ଭୋଟକଟା ପାଟି ଭାବରେ ଉଭା ହେବ ।
ଚିରାଗ ପାସୱାନଙ୍କ ଦଳକୁ ଟାର୍ଗେଟ କରି ପ୍ରକାଶ ଜାଭଡେକର କହିଛନ୍ତି ଯେ ଅନେକ ଏଲଜେପି ନେତା ମିଥ୍ୟା ତଥ୍ୟ ପ୍ରଚାର କରୁଛନ୍ତି । ଏହା ଅତ୍ୟନ୍ତ ଦୁର୍ଭାଗ୍ୟର ବିଷୟ। ଅନ୍ୟପକ୍ଷରେ ବିଜେପିର ରାଜ୍ୟସଭା ସାଂସଦ ଭୁପେନ୍ଦ୍ର ଯାଦବ ମଧ୍ୟ ଏଲଜେପିକୁ ଟାର୍ଗେଟ କରିଛନ୍ତି।
ଭୁପେନ୍ଦ୍ର ଯାଦବ ଶୁକ୍ରବାର ନିଜ ଟ୍ବିଟରରେ ଲେଖିଛନ୍ତି, ଚିରାଗ ପାସୱାନ ପ୍ରଧାନମନ୍ତ୍ରୀଙ୍କ ନାଁ ବ୍ୟବହାରକୁ ନେଇ ଦ୍ବନ୍ଦ ସୃଷ୍ଟି କରିବାକୁ ଚାହୁଁଛନ୍ତି। ବିହାର ନିର୍ବାଚନରେ ବିଜେପି-ଜେଡିୟୁ-ଭିଆଇପି ଏବଂ ହମକୁ ନେଇ ଏନଡିଏରେ ମେଣ୍ଟ ହୋଇଛି । ନିର୍ବାଚନରେ ଏଲଲଜେପି ଏନଡିଏର ଅଂଶ ନୁହେଁ। ଏପରିସ୍ଥିତିରେ ଜନସାଧାରଣଙ୍କୁ ଦ୍ବନ୍ଦରେ ପକାଇବା କିମ୍ବା ଭ୍ରମ ସୃଷ୍ଟି କରିବା ଉଚିତ ନୁହେଁ ବୋଲି କହିଛନ୍ତି ଭୂପେନ୍ଦ୍ର ।
ସେହିପରି ବିଜେପି ଜାତୀୟ ମୁଖପାତ୍ର ସମ୍ବିତ ପାତ୍ର ମଧ୍ୟ ଖୋଲାଖୋଲି ଭାବେ ଏଲଜେପିଙ୍କୁ ଟାର୍ଗେଟ କରିଛନ୍ତି। ସମ୍ବିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ବିଜେପିର କୌଣସି ବି, ସି କିମ୍ବା ଡି ଦଳ ନାହିଁ। ଏଲଜେପି ବିହାର ଜନତାଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛି | ବିଜେପି, ଜେଡିୟୁ, ହମ ଏବଂ ଭିଆଇପିକୁ ନେଇ ଆମର କେବଳ ଗୋଟିଏ ଦଳ ଅଛି। ଏଲଜେପି ନିଜର ଅସ୍ତିତ୍ବ ପାଇଁ ସଂଗ୍ରାମ କରୁଛି | ବିହାରରେ ଅନେକ ଛୋଟ ଦଳ ନିଜେ ନିର୍ବାଚନରେ ପ୍ରତିଦ୍ବନ୍ଦିତା କରୁଛନ୍ତି। ଏଜେପି କେବଳ ଭୋଟ କାଟିବା ଦଳ ଭଳି ଆଚରଣ କରୁଛି ବୋଲି ସମ୍ବତ କହିଛନ୍ତି ।
ଏହାପୂର୍ବରୁ ଏଲଜେପି ନେତା ଚିରାଗ ପାସୱାନଙ୍କୁ କଟାକ୍ଷ କରି ସୁଶୀଲ ମୋଦୀ କହିଛନ୍ତି ଯେ ଏହି ଲୋକମାନେ ଭୋଟ ପାଇଁ ପ୍ରତିଦ୍ବନ୍ଦିତା କରୁଛନ୍ତି । ଯେଉଁମାନେ ଗୋଟିଏ କିମ୍ବା ଦୁଇଟି ଆସନ ଜିତିବାକୁ ସକ୍ଷମ ନୁହନ୍ତି, ସେମାନେ ଆମ ସହ ସରକାର ଗଠନ କରିବେ ବୋଲି କହୁଛନ୍ତି। ବିଜେପି, ଜେଡିୟୁ, ହମ ଏବଂ ଭିଆଇପି ଏକାଠି କାମ କରୁଛୁ ବୋଲି ସେ ନିଜ ପ୍ରତିକ୍ରିୟାରେ କହିଥିଲେ ।
ବିହାର ବିଧାନସଭା ନିର୍ବାଚନରେ ବିଜେପି ଏଲଜେପିକୁ କଡା ବାର୍ତ୍ତା ଦେଇଥିଲା । ବିଜେପି ସ୍ପଷ୍ଟ ଭାବେ କହିଥିଲା ଯେ ବିହାର ନିର୍ବାଚନରେ ଯେଉଁ ଦଳଗୁଡ଼ିକ ସହିତ ମେଣ୍ଟ ଅଛି, ସେମାନେ କେବଳ ପ୍ରଧାନମନ୍ତ୍ରୀ ମୋଦି ଏବଂ ଶାହାଙ୍କ ନାମ ବ୍ୟବହାର କରିପାରିବେ । ଏନଡିଏ ମିଳିତ ସାମ୍ବାଦିକ ସମ୍ମିଳନୀ କରି ସ୍ପଷ୍ଟ କରିଥିଲା ଏନଡିଏ ମେଣ୍ଟଦଳ ବ୍ୟତିତ ଅନ୍ୟ କୌଣସି ଦଳ ନିର୍ବାଚନରେ ବିଜେପିର ନାଁ ନେବେ ନାହିଁ, କାରଣ ଉଭୟ ଦଳ ଭିନ୍ନ ଭିନ୍ନ ମାର୍ଗରେ ରହିଛନ୍ତି ।
ସିଟ ବଣ୍ଟନକୁ ନେଇ ଚିରାଗ ପାଶୱାନଙ୍କ ଏଲଜେପି (ଲୋକଜନଶକ୍ତି ପାର୍ଟୀ) ବିହାର ଏନଡିଏ ହାତ ଛାଡିଥିଲା । କିନ୍ତୁ ସେ ବାରମ୍ବାର କହୁଛନ୍ତି ବିହାରରେ ବିଜେପି ଏବଂ ଏଲଜେପି ସରକାର ଗଠନ କରିବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ବିହାର ଆଗକୁ ବଢିବ । ବିହାର ବିଜେପି ରାଜ୍ୟ ସଭାପତି ସଞ୍ଜୟ ଜୟସୱାଲ କହିଥିଲେ ଯେ ତାଙ୍କ ଦଳର କୌଣସି ବ୍ୟାନର, ପୋଷ୍ଟର କିମ୍ବା ଭାଷଣରେ ପ୍ରଧାନମନ୍ତ୍ରୀ ମୋଦି ଏବଂ ବିଜେପିର ନାମକରଣ କରାଯିବା ଉଚିତ ନୁହେଁ । ଯେତେବେଳେ କୌଣସି ଦଳ ଏନଡିଏରୁ ଅଲଗା ହୋଇଯାଏ, ପିଏମ ମୋଦିଙ୍କ ନାମକୁ କୌଣସି ପ୍ରକାରେ ବ୍ୟବହାର କରିବାକୁ ଅନୁମତି ଦିଆଯିବ ନାହିଁ । ଯଦି କେହି ଏହାକୁ ବ୍ୟବହାର କରନ୍ତି ତେବେ ନିର୍ବାଚନ ଆୟୋଗ ପାଖରେ ଅଭିଯୋଗ କରାଯିବ ବୋଲି କହିଥିଲେ ।
