ଜୟପୁର: ରାଜସ୍ଥାନର କରମାବାସ ଗାଁ ନିକଟରେ କେନ୍ଦ୍ର କୃଷି ରାଷ୍ଟ୍ରମନ୍ତ୍ରୀ କୈଳାଶ ଚୌଧୁରୀଙ୍କ କାର ଦୁର୍ଘଟଣାଗ୍ରସ୍ତ ହୋଇଛି । ମନ୍ତ୍ରୀ ସମଦଡୀରୁ ସିବାନା ଅଭିମୁଖେ ଯାଉଥିବା ବେଳେ କାରଟି ନିୟନ୍ତ୍ରଣ ହରାଇ ରାସ୍ତା କଡରେ ଥିବା ଏକ ବିଦ୍ୟୁତ ଖୁଣ୍ଟରେ ପିଟି ହୋଇଥିଲା । ଗାଡିରେ କୃଷି ରାଷ୍ଟ୍ରମନ୍ତ୍ରୀଙ୍କ ସହ ସିବାନା ବିଧାୟକ ହମିର ସିଂ ଭାୟଲ, ବାଲୋତରା ଜିଲ୍ଲା ବିଜେପି ସଂଯୋଜକ ଭବାନୀ ସିଂ ଟାପରା ଓ ଥିଲେ । ଘଟଣାରେ ଭବାନୀ ସିଂ ଓ ଡ୍ରାଇଭର ଆହତ ହୋଇଛନ୍ତି । ସେମାନଙ୍କୁ ନିକଟସ୍ଥ ସିବାନା ମେଡିକାଲରେ ଭର୍ତ୍ତି କରାଯାଇଛି ।
ସୂଚନାମୁତାବକ, ଦ୍ୱିତୀୟ ଥର ପାଇଁ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବା ପରେ ତାଙ୍କର ଦ୍ୱିତୀୟ କାର୍ଯ୍ୟକାଳର ପ୍ରଥମ ବର୍ଷ ପୁରଣ ହେବାକୁ ନେଇ ବିଜେପି ଦ୍ୱାରା ଆୟୋଜିତ ଆତ୍ମନିର୍ଭରଶୀଳ ଭାରତ କାର୍ଯ୍ୟକ୍ରମ ମଙ୍ଗଳବାର ସିବାନାରେ କେନ୍ଦ୍ର କୃଷି ରାଷ୍ଟ୍ରମନ୍ତ୍ରୀ କୈଳାଶ ଚୌଧୁରୀଙ୍କ ଦ୍ବାରା ଆରମ୍ଭ ହୋଇଥିଲା । ଯାହାର ପ୍ରଥମ କାର୍ଯ୍ୟକ୍ରମ ଆଜି ସମଦଡୀରେ ଅନୁଷ୍ଠିତ ହୋଇଥିଲା। ସେହି କାର୍ଯ୍ୟକ୍ରମକୁ ନେଇ ମନ୍ତ୍ରୀ କୈଳାଶ ଚୌଧୁରୀ ସମଦଡୀରୁ ସିବାନା ଅଭିମୁଖେ ଯାଉଥିବା ବେଳେ ଏହି ଦୁର୍ଘଟଣା ହୋଇଛି ।