ପାଟନା: ବିହାର ବିଧାନସଭା ନିର୍ବାଚନ ପାଇଁ ବାଜିସାରିଛି ବିଗୁଲ । ରଣାଙ୍ଗନକୁ ଓହ୍ଲାଇସାରିଛନ୍ତି ରଣନୀତିକାର । କୋରୋନା କାଳରେ ବଳ କଷୁଛନ୍ତି ନେତା । ପାଟନା ସିଂହାସନ ଦଖଲ ପାଇଁ ଚାଲିଛି ପ୍ରସ୍ତୁତି । ବିଶେଷ କରି ଏନଡିଏ ଓ ମହାମେଣ୍ଟ ମଧ୍ୟରେ ହେଉଛି କଡାଟକ୍କର ।
ତୁହାକୁ ତୁହା ବୈଠକ, ସାଧାରଣ ସଭା ଓ ସୋସିଆଲ ମିଡିଆ ଜରିଆରେ ଜନତାଙ୍କ ନିକଟତର ହେଉଛନ୍ତି ନେତା । ଏନଡିଏ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଓ ବିଜେପି ଅଧ୍ୟକ୍ଷ ଜେପି ନଡ୍ଡା ପ୍ରମୁଖ ମୈଦାନକୁ ଓହ୍ଲାଇସାରିଛନ୍ତି । ସେହିପରି ମହାମେଣ୍ଟ ପାଇଁ ଆରଜେଡି ନେତା ତେଜସ୍ବୀ ଯାଦବ ମୋର୍ଚ୍ଚା ସମ୍ଭାଳୁ ଥିବାବେଳେ ରାହୁଲ ଗାନ୍ଧୀ ବି ତାଙ୍କ ସାଥ୍ ଦେଇଛନ୍ତି ।
ନଇ ସୋଚ୍, ନୟା ବିହାର, ଯୁବା ସରକାର, ଅବକୀ ବାର, ନାରା ଦେଇ ଆରଜେଡି, ସରକାର ଗଠିବାକୁ ଅଣ୍ଟା ଭିଡିଛି । ସେପଟେ ଏନଡିଏ ନୀତିଶ କୁମାରଙ୍କ ସୁଶାସନର ହିସାବ ଦେଇ ଭୋଟ ମାଗୁଛି । ସେପଟେ ଏନଡିଏରୁ ବାହାରି ଯାଇ ଚିରାଗ ପାଶୱାନଙ୍କ ଏଲଜେପି ମଧ୍ୟ ଯୁବା କାର୍ଡ ଖେଳୁଛି । ସେହିପରି ଅନେକ ଛୋଟବଡ ଦଳ ମଧ୍ୟ ଜିତିବା ପାଇଁ ନିଜ ନିଜ ଉଦ୍ୟମରେ ଲାଗିଛନ୍ତି ।