ବିଜେପି କର୍ପୋରେଟରଙ୍କ ଘରେ ଗୁଳିମାଡ, 5 ମୃତ

ମହାରାଷ୍ଟ୍ରର ଜଲଗାଓଁ ଜିଲ୍ଲାର ଭୁସୱାଲ ଅଞ୍ଚଳରେ ବିଜେପି କର୍ପୋରେଟର ରବିନ୍ଦ୍ର ଖାଟଙ୍କ ପରିବାର ଉପରେ ଅଜଣା ଦୁର୍ବୃତ୍ତ ଆକ୍ରମଣ କରିଛନ୍ତି । ଏଥିରେ ତାଙ୍କ ପରିବାରର 4 ସଦସ୍ୟଙ୍କ ମୃତ୍ୟୁ ଘଟିଛି ।

ମୁମ୍ବାଇ: ମହାରାଷ୍ଟ୍ରର ଜଲଗାଓଁ ଜିଲ୍ଲା ଅଧିନସ୍ଥ ଭୁସୱାଲ ଅଞ୍ଚଳରେ ବିଜେପି କର୍ପୋରେଟର ରବିନ୍ଦ୍ର ଖାଟଙ୍କ ପରିବାର ସଦସ୍ୟଙ୍କ ଉପରେ ହୋଇଛି ଆକ୍ରମଣ । ଗତକାଲି ରାତି ପ୍ରାୟ 10ଟା ସମୟରେ ଅଜଣା ଦୁର୍ବୃତ୍ତ ତାଙ୍କ ଘର ଲୋକଙ୍କୁ ଟାର୍ଗେଟ କରି ଗୁଳିମାଡ କରିଥିବାର ଖବର ମିଳିଛି ।

ବିଜେପି କର୍ପୋରେଟର ରବିନ୍ଦ୍ର ଖାଟ ଏଠାକାର ସମତା ନଗରରେ ନିଜ ପରିବାର ସହ ଅବସ୍ଥାନ କରନ୍ତି । ତାଙ୍କ ପରିବାର ଉପରେ ହୋଇଥିବା ଆକ୍ରମଣରେ ରବିନ୍ଦ୍ର ବାବୁରାଓ ଖାଟ, ତାଙ୍କ ଭାଇ ସୁନୀଲ ବାବୁରାଓ ଖାଟ, ପୁଅ ପ୍ରେମସାଗର ଖାଟ, ରୋହିତ ଖାଟ ଏବଂ ସୁମିତ ଗଜରେଙ୍କ ମୃତ୍ୟୁ ଘଟିଛି।

ଏହ ଘଟଣା ପରେ ତତକ୍ଷଣାତ୍ ଗୁରୁତର ରବିନ୍ଦ୍ରଙ୍କୁ ସ୍ଥାନୀୟ ମେଡିକାଲକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅନ୍ୟପଟେ ତାଙ୍କ ପତ୍ନୀ ରଜନୀ ଖାଟ ଏବଂ ପୁଅ ହିତେଶଙ୍କ ସମେତ ଆଉ ଜଣେ ବ୍ୟକ୍ତି ଏଥିରେ ଗୁରୁତର ହୋଇଛନ୍ତି। ଦୁଇ ଜଣ ଅଜଣା ବାଇକ ଆରୋହୀ ରବିନ୍ଦ୍ର ଖାଟଙ୍କ ଘରେ ଗୁଳିମାଡ କରି ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ଏନେଇ ଖବର ପାଇବା ପରେ ପୋଲିସ 3 ଅଭିଯୁକ୍ତଙ୍କୁ ଗିରଫ କରିବା ସହ ଏହାର ତଦନ୍ତ କରୁଛି।