ବଜେଟ ଆଣିଦେବ ଭୋଟ, ଟଙ୍କିକିଆ ଚାଉଳକୁ ମିଳିବ 10 ଗ୍ରାମ ସୁନା

ଗୌହ୍ୱାଟି: ନିର୍ବାଚନୀ ବଜେଟ ଉପସ୍ଥାପନା କଲେ ଆସାମ ସରକାର । 2019-20 ଆର୍ଥିକ ବର୍ଷରେ ଭୋଟରଙ୍କୁ ସୁହାଇବା ଭଳି ପଦକ୍ଷେପ ନେଇଛନ୍ତି ସରକାର । ଏଣିକି ଗରିବଙ୍କୁ ମିଳିବ ଟଙ୍କିକିଆ ଚାଉଳ ଓ କନ୍ୟାଙ୍କୁ 10 ଗ୍ରାମ ସୁନା । ହିତାଧିକାରୀଙ୍କୁ ପୂର୍ବରୁ ଚାଉଳ ପିଛା 3 ଟଙ୍କା ଦେବାକୁ ପଡୁଥିବା ବେଳେ ଏବେ କିଲୋଗ୍ରାମ ପିଛା ଦେବାକୁ ପଡିବ ମାତ୍ର 1 ଟଙ୍କା ।

ତେବେ ରାଜ୍ୟର ସମସ୍ତ ବର୍ଗର କନ୍ୟାଙ୍କୁ ମିଳିବ 10 ଗ୍ରାମ ସୁନା । ସୁନାଦର 38 ହଜାରରେ ପହଞ୍ଚିଥିବା ବେଳେ ସରକାର ପରିବାରର ବୋଝ ହାଲୁକା କରିବାକୁ ନିଷ୍ପତ୍ତି ନେଇଛନ୍ତି । ସେହିପରି କଳା, ବିଜ୍ଞାନ ଓ ବାଣିଜ୍ୟ ଡିଗ୍ରୀଧାରୀଙ୍କୁ ମାଗଣାରେ ପାଠ୍ୟପୁସ୍ତକ ଯୋଗାଇ ଦିଆଯିବ । ସରକାରୀ କଲେଜ ଓ ବିଶ୍ବବିଦ୍ୟାଳୟ ଛାତ୍ରବାସରେ ରହୁଥିବା ପ୍ରତି ଛାତ୍ରଙ୍କ ଆର୍ଥିକ ସ୍ଥିତିକୁ ଦେଖି ସେମାନଙ୍କୁ 10 ମାସ ପର୍ଯ୍ୟନ୍ତ ମିଳିବ 700 ଟଙ୍କା ।

ଚା ବାଗାନର ଚାରି ଲକ୍ଷ ପରିବାରକୁ ମାଗଣାରେ ମିଳିବ ଚାଉଳ । ଅନ୍ୟପଟେ 45 ବର୍ଷ ପର୍ଯ୍ୟନ୍ତ ମହିଳାଙ୍କ ପତିଙ୍କ ନିଧନ ହେଲେ 25 ହଜାର ଟଙ୍କା ସହାୟତା ରାଶି ପ୍ରଦାନ କରିବେ ସରକାର । ତେବେ ଆସାମରେ ବିଜେପି ସରକାରଙ୍କ ଏହି ବଜେଟ ସଠିକ ରୁପେ କାର୍ଯ୍ୟକାରୀ ହେଲେ ନିଶ୍ଚିତ ରୂପେ ଭୋଟ ଆଣିଦେବ ବୋଲି ଚର୍ଚ୍ଚା ଚାଲିଛି ।