ଭୋପାଳ: ମଧ୍ୟ ପ୍ରଦେଶରେ ପଶ୍ଚିମବଙ୍ଗ ଏପିସୋଡର ରିପିଟ। କଲିକତା ହାଇଡ୍ରାମା ମନରୁ ନ ଭିଳୁନୁ ଭୋପାଳରେ ପୁଣି ହାଇଡ୍ରାମା। ନିର୍ବାଚନୀ ମାହୋଲରେ ପୁଣି ରାଜ୍ୟ ପୋଲିସ ଏବଂ କେନ୍ଦ୍ରୀୟ ସୁରକ୍ଷା ଏଜେନ୍ସି ମୁହାଁମୁହିଁ ହେବା ଦେଶରେ ବିସ୍ଫୋରକ ପରିସ୍ଥିତି ସୃଷ୍ଟି କରିଛି । ରବିବାର ଭୋପାଳରେ ରାଜ୍ୟ ପୋଲିସ ଓ କେନ୍ଦ୍ରୀୟ ସୁରକ୍ଷା ବଳ ମୁହାଁମୁହିଁ ହୋଇଛନ୍ତି। ଆୟକର ବିଭାଗର ଚଢାଉ ବେଳେ ସିଆରପିଏଫ୍ ଟିମ୍ ଏବଂ ମଧ୍ୟପ୍ରଦେଶ ପୋଲିସ ମଧ୍ୟରେ କଳହ ସୃଷ୍ଟି ହୋଇଛି । କମଳନାଥ ସରକାରଙ୍କ ପୋଲିସ ପ୍ଲାଟିନମ ପ୍ଲାଜାରେ ପହଞ୍ଚି ସିଆରପିଏଫ ଟିମ୍ ସହ ବଚସା କରିଥିବା ସୂଚନା ମିଳିଛି । ଏହାସହ ଭୋପାଳ ଓ ଇନ୍ଦୋରରେ ଆୟକର ବିଭାଗ ଅଧିକାରୀଙ୍କ ଦ୍ବାରା ଚାଲୁଥିବା ଚଢାଉ ବେଳେ ରାଜ୍ୟ ପୋଲିସ ଉକ୍ତ ସ୍ଥାନ ଗୁଡିକରେ ପ୍ରବେଶ କରିବାକୁ ପ୍ରୟାସ କରିଛି । ଏଥିସହିତ ଏହି ଘଟଣା ପରେ ପ୍ଲାଟିନମ ପ୍ଲାଜାରେ ଆଉ ଗୋଟିଏ ସିଆରପିଏଫ୍ ଯବାନଙ୍କ ଭର୍ତ୍ତି ବସ୍ ପହଞ୍ଚିଛି ।
ଭୋପାଳର ପ୍ଲାଟିନମ ପ୍ଲାଜାର ଷଷ୍ଠ ମହଲାରେ ଓଏସିଡି ପ୍ରବୀଣ କକ୍କଡଙ୍କ ସମ୍ପର୍କୀୟ ପ୍ରତୀକ ଯୋଶୀ ଓ ଅଶ୍ବିନୀ ଶର୍ମା ରହନ୍ତି । ଯେଉଁଠି ସିଆରପିଏଫ ଯବାନଙ୍କ ସହାୟତାରେ ଆୟକର ବିଭାଗ ଅଧିକାରୀ ଚଢାଉ କରିଥିଲେ। ଚଢାଉ ଜାରି ରହିଥିବା ବେଳେ ଏମପି ପୋଲିସ ପ୍ଲାଟିନମ ପ୍ଲାଜାକୁ ଘେରି ନେଇଥିଲା। ଏହାସହ ପୋଲିସ ଓ ସିଆରପିଏଫ ମଧ୍ୟରେ ବଚସା ହେବାର ଦେଖାଯାଇଥିଲା।