ନୂଆଦିଲ୍ଲୀ: ମହାମାରୀ କୋରୋନା ବିରୋଧରେ ଜୋରଦାର ଲଢେଇ କରୁଛି ହିନ୍ଦୁସ୍ତାନ । ସାରାଦେଶ କୋଭିଡ-19 ବିରୋଧରେ ଏକାଠି ହୋଇ ସଂଗ୍ରାମ କରୁଥିବା ବେଳେ ଏଥିପାଇଁ ଆବଶ୍ୟକ ହେଉଛି ଅର୍ଥ । ଯେଉଁଥିପାଇଁ କେନ୍ଦ୍ର ସରକାରଙ୍କ ସମେତ ରାଜ୍ୟ ସରକାର ମାନେ ଦାନ ଆହ୍ବାନ କରିଛନ୍ତି । ଯାହା କେବଳ ଭାରତୀୟ ମାନେ ହିଁ କରିପାରିବେ ।
ସରକାରଙ୍କ ଆହ୍ବାନ ପରେ କୋଭିଡ-19 ବିରୋଧରେ ସଂଗ୍ରାମ ପାଇଁ ଅନେକ ସଂସ୍ଥା, ସ୍ବେଚ୍ଛାସେବୀ ଅନୁଷ୍ଠାନ, ବିଶିଷ୍ଟ ବ୍ୟକ୍ତି ଓ ରାଜନେତା ଜାତୀୟ ଓ ରାଜ୍ୟ ରିଲିଫ ପାଣ୍ଠିକୁ ଦାନ କରୁଛନ୍ତି । ଏଥିରେ ଆଜି( ଶନିବାର) ସାମିଲ ହୋଇଛି ଭାରତୀୟ ଜନତା ପାର୍ଟି (ବିଜେପି) । ଦଳର ଜାତୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା ଆଜି ସମସ୍ତ ଦଳୀୟ ସାଂସଦ ଓ ବିଧାୟକ ମାନେ ସେମାନଙ୍କର ଏକ ମାସର ଦରମା କୋରୋନା ମୁକାବିଲା ପାଇଁ ସରକାରଙ୍କୁ ଦାନ କରିବେ ବୋଲି ଘୋଷଣା କରିଛନ୍ତି । ଏହାବାଦ ଦଳର ସମସ୍ତ ସାଂସଦ ମାନେ ସେମାନଙ୍କର ସାଂସଦ ପାଣ୍ଠି( ଏମପି ଲାଡ)ରୁ ଏକ କୋଟି ଟଙ୍କା କୋରୋନା ମୁକାବିଲାରେ ଖର୍ଚ୍ଚ କରିବେ ।