ନୂଆଦିଲ୍ଲୀ: କୋଭିଡ 19 ମୁକାବିଲା ପାଇଁ ସରକାର ସମସ୍ତ ପ୍ରକାର ପଦକ୍ଷେପ ନେଉଛନ୍ତି । ଅନଲାଇନ ଓ ଅଫଲାଇନ ଉଭୟରେ ସରକାର ଲୋକଙ୍କୁ ସମସ୍ତ ସୂଚନା ଦେଉଛନ୍ତି । କିପରି ଏହି ମହାମାରୀ କବଳରୁ ଦେଶବାସୀ ରକ୍ଷା ପାଇବେ ସେଥିପାଇଁ ସରକାର ସବୁପ୍ରକାର ଆଡଭାନ୍ସ ବ୍ୟବସ୍ଥା ଆପଣାଉଛନ୍ତି । ନିକଟରେ ସରକାର ଏକ ଅନଲାଇନ ଆପ୍ ଆରୋଗ୍ୟ ସେତୁ ଉଦଘାଟନ କରିଛନ୍ତି ।
ଆରୋଗ୍ୟ ସେତୁ ଏକ ଅନଲାଇନ ଆପ୍ ଯାହାକୁ ସରକାର ଗୁରୁବାର ଲଞ୍ଚ କରିଛନ୍ତି । ଏହା ଏକ ବହୁଭାଷୀ କୋଭିଡ 19 ଟ୍ରାକିଂ ଆପ୍ । ଏଥିରେ ଆପଣ 11ଟି ଭାଷା ପାଇପାରିବେ । କୋରୋନା ବିରୋଧୀ ଲଢେଇରେ ଏହା ସରକାରଙ୍କୁ ସାହାଯ୍ୟ କରିବ । ଆପଣ ମଧ୍ୟ ଏଥିରୁ ଅନେକ ଉପକାରୀ ତଥ୍ୟ ପାଇପାରିବେ । ସ୍ବାସ୍ଥ୍ୟ ବିଭାଗ ଦ୍ବାରା ଏହା ଏକ ଅନଲାଇନ ପଦକ୍ଷେପ ଯାହା ଦ୍ବାରା ସରକାର ସମସ୍ତ ଲୋକଙ୍କ ନିକଟରେ ପହଞ୍ଚିପାରିବେ । ଏହାସହ କୋରୋନାର ଭୟାବହତା, ପ୍ରତିଷେଧକ ବ୍ୟବସ୍ଥା ଏବଂ ମହାମାରୀ ସମ୍ବନ୍ଧରେ ଉପଯୁକ୍ତ ସୂଚନା ଏହି ଆପ୍ ଦ୍ବାରା ସମସ୍ତେ ପାଇବେ ।
ଏହି ଆପ୍ର ମୂଳ ଲକ୍ଷ୍ୟ ହେଲା କୋରୋନା ସଂକ୍ରମିତ ବ୍ୟକ୍ତିଙ୍କୁ ଠାବ କରିବା । ଆକ୍ରାନ୍ତ ବ୍ୟକ୍ତି କେତେ ମାତ୍ରାରେ କୋଭିଡ 19 ଭୂତାଣୁ ଦ୍ବାରା ପ୍ରଭାବିତ ତାହା ଏହି ଆପ୍ରୁ ଜଣାପଡିବ । ଲୋକର ଲକ୍ଷଣ ସହ ସେ କାହା ସହ ମିଶିଛନ୍ତି ତାହାର ତଥ୍ୟ ମଧ୍ୟ ଏହି ଆପ୍ ସରକାରଙ୍କୁ ଦେବ । ଆପଣଙ୍କ ଶରୀରରେ ଭୂତାଣୁର ପ୍ରଭାବ ମଧ୍ୟ ଆପ୍ ଦ୍ବାରା ଆପଣ ଜାଣିପାରିବେ । ଏହା ଅତ୍ୟାଧୁନିକ ବ୍ଲୁଟୁଥ ଓ ଜିପିଏସ ଟେକ୍ନୋଲୋଜି ଦ୍ବାରା ତିଆରି ହୋଇଛି । ଏଥିରେ ଆପଣଙ୍କ ଫୋନର ସମସ୍ତ ପ୍ରାଇଭେସି ରେକର୍ଡ ହୋଇ ରହିବ ।
ତେବେ ଏହି ଆପ୍ରେ ଆପଣଙ୍କ ପ୍ରାଇଭେସୀକୁ ପ୍ରାଥମିକତା ଦିଆଯାଇଛି । ଆପ୍ ଦ୍ବାରା ସଂଗୃହିତ ସମସ୍ତ ବ୍ୟକ୍ତିଗତ ତଥ୍ୟ ସୁରକ୍ଷିତ ରହିବା ପାଇଁ ଷ୍ଟେଟ ଅଫ ଦି ଆର୍ଟ ଟେକ୍ନୋଲୋଜି ବ୍ୟବହାର ହୋଇଛି । ଦେଶର ଟପ ବିଶେଷଜ୍ଞଙ୍କ ଦ୍ବାରା ଏହି ଆପ୍ର ବୈଧତା ଓ ସୁରକ୍ଷା ବାରମ୍ବାର ଯାଞ୍ଚ କରାଯାଇଛି । ଏହା ଆଣ୍ଡ୍ରଏଡ ୟୁଜର୍ସଙ୍କ ଫୋନ ଓ ଡାଟା ସୁରକ୍ଷିତ ରଖିବାରେ ସାହାଯ୍ୟ କରିଥାଏ । ଏହାକୁ ସରକାର ଡିଜିଟାଲ ଇଣ୍ଡିଆ ଅଧୀନରେ ତିଆରି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
