ମୁମ୍ବାଇ: ମହାରାଷ୍ଟ୍ର ରାଜନୀତିର ମହାଭାରତ ଏବେ ଆହୁରି ରୋମାଞ୍ଚିତ ହୋଉଛି । କିଏ ସରକାର ଗଠନ ପାଇଁ ନିଶ୍ଚିତ ଥିବାବେଳେ କିଏ ବିରୋଧୀ ଦଳରେ ବସିକୁ ସ୍ଥିର କରିସାରିଛି , ପୁଣି କିଏ ନିଜ ନେତାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିଲାଣି । ଏଭଳି ହାଇଡ୍ରାମା ରାଜନୀତିରେ ଏବେ ମହାରାଷ୍ଟ୍ରବାସୀ ଅଣନିଶ୍ବାସୀ ହୋଇଗଲେଣି । ବର୍ତ୍ତମାନ ସୁଦ୍ଧା ମହାରାଷ୍ଟ୍ର ରାଜନୀତିରେ ସୃଷ୍ଟି ହୋଇଥିବା ଜଟିଳ ଗଣିତର ସମାଧାନ ସୂତ୍ର ବାହାରିନଥିବାବେଳେ ବିଜେପି-ଶିବସେନା କିନ୍ତୁ ନିଜ ନିଜ ନେତାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିଲେଣି ।
ଏଥିରେ ଶିବସେନା ଗୋଟିଏ ପାଦ ଆଗକୁ ଯାଇ ଦଳର ଭବିଷ୍ୟତ ତଥା ଠାକେର ଖାନଦାନର ଉତ୍ତରାଧିକାରୀ ଆଦିତ୍ୟ ଠାକେରଙ୍କୁ ମୁଖ୍ୟମନ୍ତ୍ରୀ ଦର୍ଶାଇ ବିଭିନ୍ନ ସ୍ଥାନରେ ପୋଷ୍ଟର ବ୍ୟାନର ଲଗାଇଛନ୍ତି । ଦଳର କର୍ପୋରେଟର ହଜି ହଲିମ ଖାନଙ୍କ ଦ୍ବାରା ଲାଗିଥିବା ଏହି ବ୍ୟାନରରେ ମରାଠୀ ଭାଷାରେ ଉଲ୍ଲେଖ ଅଛି ‘ମାଝା ଆମଦାର ମାଝା ମୁଖ୍ୟମନ୍ତ୍ରୀ’ ଅର୍ଥାତ ମୋ ବିଧାୟକ ମୋ ମୁଖ୍ୟମନ୍ତ୍ରୀ । ମୁମ୍ବାଇର ମାତାଶ୍ରୀ ଭବନ( ଠାକେର ନିବାସ) ସମ୍ମୁଖ ସମେତ ମୁମ୍ବାଇର ବହୁ ଅଞ୍ଚଳରେ ଏହି ପୋଷ୍ଟର ଲାଗିଛି । ଏହା ଯୋଜନାବଦ୍ଧ ବିଜେପି ଉପରେ ଚାପ ପାଇଁ ଉଦ୍ଦିଷ୍ଟ ନା ଦଳୀୟ ନେତାଙ୍କ ସମର୍ପଣ ଭାବ ତାହା ଏବେ ଚର୍ଚ୍ଚାର ବିଷୟ ।