ମୁମ୍ବାଇ : କୋରୋନା ସହ ଲଢେଇ ବେଳେ ଅନେକ ପୋଲିସ କର୍ମୀଙ୍କର ମୃତ୍ୟୁ ଘଟିଛି । ତଥାପି ବିନା ଦ୍ବିଧାରେ ନିଜ ଜୀବନକୁ ବାଜି ଲଗାଇ ଲୋକଙ୍କ ସେବାରେ ଲାଗିପଡିଛନ୍ତି ସେମାନେ । ତେବେ ମହାରାଷ୍ଟ୍ରର ଜଣେ ପୋଲିସ କର୍ମୀ କୋରୋନାରେ ଆକ୍ରାନ୍ତ ହେବାପରେ ମଧ୍ୟ ଲୋକଙ୍କ ପାଇଁ କାର୍ଯ୍ୟ କରୁଥିବା ଦେଖିବାକୁ ମିଳିଛି । ମୁଲୁଣ୍ଡର ଜଣେ ପୋଲିସ କର୍ମୀ କୋଭିଡ ହସ୍ପିଟାଲରେ କୋରୋନା ରୋଗୀଙ୍କ ପାଇଁ ବଂଶୀ ବଜାଉଥିବା ଦେଖିବାକୁ ମିଳିଛି । ଏହା ଦ୍ବାରା ସେମାନଙ୍କର ମାନସିକ ଚାପ ହ୍ରାସ ହେବ ବୋଲି ସେ କହୁଛନ୍ତି ।
ବିଶ୍ବବ୍ୟାପୀ ଆତଙ୍କ ରଚିଥିବା କୋରୋନା ଭାଇରସ ଶରୀର ସହ ମସ୍ତିଷ୍କରେ ମଧ୍ୟ କ୍ଷତି ପହଞ୍ଚାଉଛି। କୋରୋନାରେ ଆକ୍ରାନ୍ତ ହେବାପରେ ଅନେକ ରୋଗୀ ମାନସିକ ଚାପର ଶିକାର ହେଉଛନ୍ତି । ତେବେ ରୋଗୀଙ୍କ ମଧ୍ୟରେ ଏହି ମାନସିକ ଚାପକୁ ହ୍ରାସ କରିବା ପାଇଁ ମୁଲୁଣ୍ଡ ପୋଲିସ ଷ୍ଟେସନ ଅଧିକାରୀ ଏସ ଦେଶମୁଖ ବଂଶୀ ବଜାଉଛନ୍ତି । ତେବେ ତାଙ୍କର ଏହି ବଂଶୀ ଶବ୍ଦ ହସ୍ପିଟାଲର ରୋଗୀଙ୍କ ସମେତ ହସ୍ପିଟାଲର କର୍ମଚାରୀମାନଙ୍କୁ ମଧ୍ୟ ସାମାନ୍ୟ ଆଶ୍ବସ୍ଥି ମିଳୁଛି ।