ଜୟପୁର: କୋରୋନା ଯୁଦ୍ଧରେ ରିଅଲ ହିରୋ ସାଜିଥିବା ପୋଲିସକୁ ବାରମ୍ବାର ଆକ୍ରମଣ ଘଟଣା ସାମନାକୁ ଆସୁଛି । ରାଜସ୍ଥାନର ଟନ୍ସ ଜିଲ୍ଲାରେ ଲାଗିଥିବା କର୍ଫ୍ୟୁର ତଦାରଖ କରିବା ପାଇଁ ତିନି ଜଣ ପୋଲିସ ପେଟ୍ରୋଲିଂ କରୁଥିବା ସମୟରେ ଗୋଟିଏ ପରିବାର ତାଙ୍କ ଉପରକୁ ଆକ୍ରମଣ କରିଥିବା ଘଟଣା ସାମନାକୁ ଆସିଛି । ଉପମୁଖ୍ୟମନ୍ତ୍ରୀ ସଚିନ ପାଇଲଟ ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି ।
ସେ କହିଛନ୍ତି ଯେ ସଂକ୍ରମଣ ନବ୍ୟାପିବା ପାଇଁ ଲକଡାଉନ କରାଯାଇଛି । ହେଲେ ଲୋକଙ୍କୁ ସୁରକ୍ଷା ଦେବାକୁ ପୋଲିସ ନିୟୋଜିତ ହୋଇଛନ୍ତି । କିନ୍ତୁ ଏହା ଦୁର୍ଭାଗ୍ୟ ଜନକ ଯେ ସୁରକ୍ଷାକର୍ମୀଙ୍କୁ ଲୋକମାନେ ବାରମ୍ବାର ଆକ୍ରମଣ କରୁଛନ୍ତି ।
ଏହି ଘଟଣାଟି କସାଇ ମହଲ୍ଲାରେ ଘଟିଥିଲା ଏବଂ ଏହି ଘଟଣାର ଏକ ଭିଡିଓ ସୋସିଆଲ ମିଡିଆରେ ବହୁଳ ଭାବରେ ସେୟାର କରାଯାଇଥିଲା।
ଏଥିରୁ ଜଣାପଡିଛି ଯେ ଜଣେ ଲୋକ ସାହାଯ୍ୟ ପାଇଁ ଚିତ୍କାର କରୁଥିବା ବେଳେ ପୋଲିସ କର୍ମୀ ଜଣେ ବ୍ୟକ୍ତିକୁ ଘରର ଫାଟକରୁ ଟାଣି ନେଇଥିଲା । ଏହାପରେ ତାଙ୍କ ପରିବାର ସଦସ୍ୟ ସୁରକ୍ଷା କର୍ମୀଙ୍କ ଉପରେ ଆକ୍ରମଣ କରିଥିଲେ । ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି ଯେ ରସିଦ ନାମକ ଜଣେ ବ୍ୟକ୍ତି ଟୋଷ୍ଟ ପ୍ୟାକେଟ ନେଇ ତାଙ୍କ ଘରେ ପ୍ରବେଶ କରୁଥିବାବେଳେ ସିଭିଲ ଡ୍ରେସ ପିନ୍ଧିଥିବା ତିନିଜଣ ପୋଲିସ ତାଙ୍କୁ ଆକ୍ରମଣ କରିଥିଲେ।
ତେବେ ପରେ ଜଣାପଡିଛି ଯେ ରସିଦଙ୍କ ପରିବାର ଲୋକ ଭାବିଥିଲେ ଯେ ସୋସିଆଲ ମିଡିଆରେ ମୁସଲମାନଙ୍କୁ ଟାର୍ଗେଟ କରିବା ପାଇଁ ଗୁଜବ ପ୍ରଚାର ହେଉଛି । ସେଥିପାଇଁ ସେମାନେ ପୋଲିସ ଉପରକୁ ଆକ୍ରମଣ କରିଥିଲେ ।
