ଗାନ୍ଧୀନଗର: ଖେଳ ସାଜିଲା କାଳ । ଆଡଭେଞ୍ଚର ପାର୍କରେ ଏକ ଦୋଳି ଭାଙ୍ଗି 2 ଜଣଙ୍କର ମୃତ୍ୟୁ ଘଟିଥିବାବେଳେ 29 ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ 14 ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି । ଗୁଜୁରାଟ ଅହମ୍ମଦାବାଦର କଙ୍କରିଆ ହ୍ରଦ ଅଞ୍ଚଳରେ ଥିବା ଆଡଭେଞ୍ଚର ପାର୍କରେ ଘଟିଛି ଏଭଳି ଦୁର୍ଘଟଣା ।
ରବିବାର ସନ୍ଧ୍ୟାରେ ଜୋଏରାଇଡ୍ସ ନାମକ ଏକ ଦୋଳିର ମଜା ନେଉଥିଲେ ଲୋକେ । ଏହି ସମୟରେ ହଠାତ୍ ଦୋଳିରେ ଯାନ୍ତ୍ରିକ ତୃଟି ଦେଖାଦେଇଥିଲା ଏବଂ ଦୋଳିଟି ଛିଣ୍ଡି ଯାଇଥିଲା । ଦୁର୍ଘଟଣାରେ ଆହତ ବ୍ୟକ୍ତିଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଦୋଳିର ମୁଖ୍ୟ ସାଫ୍ଟର ଏକ ପାଇପ୍ ଭାଙ୍ଗି ଯିବାରୁ ଏହା ତଳକୁ ଖସିପଡ଼ିଥିବା ଅହମ୍ମଦାବାଦ ନଗର ନିଗମର ମୁଖ୍ୟ ଅଗ୍ନିଶମ ଅଧିକାରୀ ଏମଏଫ ଦପ୍ତୁର ସୂଚନା ଦେଇଛନ୍ତି । ସେପଟେ ପାଇପ୍ କେମିତି ଭାଙ୍ଗିଲା ତାହା ଫୋରେନ୍ସିକ୍ ସାଇନ୍ସ୍ ଲାବ୍ରୋଟୋରୀର ତଦନ୍ତ କରିବ ବୋଲି ଜଣାପଡିଛି ।