ଚଣ୍ଡିଗଡ: ଡ୍ରଗ୍ସ କାରବାର ଅଭିଯୋଗରେ ତଦନ୍ତ ପରିସରରେ ଥିବା ବରିଷ୍ଠ ଅକାଳୀ ନେତା ତଥା ପୂର୍ବତନ ମନ୍ତ୍ରୀ ବିକ୍ରମ ସିଂ ମଜିଠିଆଙ୍କ ବିରୋଧରେ ଚାଲିଥିବା ତଦନ୍ତକୁୁ ତ୍ବରାନ୍ବିତ କରିବା ପାଇଁ ଅଣ୍ଟା ଭିଡିଛନ୍ତି ମାନ ସରକାର । ଆଜି ଘଟଣାର ତଦନ୍ତ ଜାରି ପାଇଁ ନୂଆ SIT ଟିମ ଗଠନ କରିବା ପାଇଁ ପୋଲିସ ବିଭାଗକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ । ମୁଖ୍ୟମନ୍ତ୍ରୀ ଭାବେ ଦାୟିତ୍ବ ନେବା ପରେ ମାନଙ୍କର ଏହା ହେଉଛି ପୋଲିସ ଓ ଆଇନ ଶୃଙ୍ଖଳା ସମ୍ପର୍କିତ ପ୍ରସଙ୍ଗରେ ପ୍ରଥମ ନିର୍ଦ୍ଦେଶ ।
ମିଳିଥିବା ସୂଚନା ଅନୁସାରେ, ଗଠନ ହେବାକୁ ଥିବା ନୂଆ ଏସଆଇଟି ଟିମ AIG ଗୁରୁଶରଣ ସିଂ ସାନ୍ଧୁଙ୍କ ନେତୃତ୍ୱରେ କାର୍ଯ୍ୟ ଆରମ୍ଭ କରିବାକୁ ଥିବାବେଳେ ଏଥିରେ ଅନ୍ୟ ୪ଜଣ ବରିଷ୍ଠ ପୋଲିସ ଅଧିକାରୀ ମଧ୍ୟ ସାମିଲ ରହିବେ । ଏଆଇଜି ରାହୁଲ ଏସ ଏବଂ ରଣଜିତ ସିଂଙ୍କ ବ୍ୟତୀତ ଅନ୍ୟ ଦୁଇ ଜଣ ଡିଏସପି ପ୍ୟାହାର ଦୁଇ ଅଧିକାରୀଙ୍କୁ ମଧ୍ୟ ସ୍ଥାନ ମିଳିଛି ।