କୋଲକାତା: ପଶ୍ଚିମବଙ୍ଗରେ ଶ୍ରଦ୍ଧା ଓ୍ବାକର ହତ୍ୟା ଘଟଣାର ପୁନରାବୃତ୍ତି । ସାତ ଜନ୍ମର ସାଥି ହେବାକୁ କଥା ଦେଇ ସଇତାନ ପାଲଟିଗଲା ସ୍ବାମୀ । ପରକୀୟା ପ୍ରୀତି ସନ୍ଦେହରେ ସ୍ତ୍ରୀକୁ ହତ୍ୟା କରି ଖଣ୍ଡ ଖଣ୍ଡ କରିଦେଲା ପିଶାଚ ସ୍ବାମୀ । ହତ୍ୟା ପରେ ମୃତଦେହକୁ ୨ଖଣ୍ଡ କରି ନଦୀରେ ଫୋପାଡି ଦେଲା ସ୍ବାମୀ । ପଶ୍ଚିମବଙ୍ଗର ଶିଲିଗୁରିରେ ଏଭଳି ବିଭତ୍ସ ହତ୍ୟାକାଣ୍ଡ ଘଟିଛି । ମହାନନନ୍ଦା ନଦୀରେ ସ୍ତ୍ରୀର ମୃତଦେହ ଫୋପାଡିବା ପରେ ଅଭିଯୁକ୍ତକୁ ପୋଲିସ ଗିରଫ କରିଥିବା ସୂଚନା ମିଳିଛି ।
ମୃତ ମହିଳା ଜଣଙ୍କ ହେଉଛନ୍ତି ରେଣୁକା ଖାତୁନ। ସେ ଦାର୍ଜିଲିଂ ଜିଲ୍ଲାର ଶିଲିଗୁରି ଅଞ୍ଚଳରେ ରହୁଥିଲେ । ଗତ କିଛି ଦିନ ହେବ ସେ କେଉଁ ଆଡେ ନିଖୋଜ ହୋଇଯାଇଥିଲେ । ଏନେଇ ପରିବାର ଲୋକେ ଗତ ଡିସେମ୍ବର ମାସରେ ଥାନାରେ ନିଖୋଜ ଅଭିଯୋଗ କରିଥିଲେ । ଏନେଇ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ରେଣୁକାଙ୍କ ସ୍ବାମୀଙ୍କୁ ପଚରାଉଚରା କରିଥିଲା ପୋଲିସ । ଶେଷରେ ପୋଲିସ ସାମ୍ନାରେ ସତ ମାନିଥିଲା ଅଭିଯୁକ୍ତ ମୋହଦ ଅନ୍ସ୍ରୁଲ । ସ୍ତ୍ରୀକୁ ହତ୍ୟା ପରେ ଦୁଇ ଖଣ୍ଡ କରି ନଦୀରେ ଫୋପାଡି ଦେଇଥିବା ପୋଲିସକୁ କହିଥିଲା । ଏହାପରେ ପୋଲିସ ଅଭିଯୁକ୍ତକୁ ଗିରଫ କରି ରେଣୁକାଙ୍କ ମୃତଦେହ ଖଣ୍ଡକୁ ଖୋଜୁଛି ।