ନୂଆଦିଲ୍ଲୀ:ଭାରତ ଗସ୍ତରେ ଆସିଥିବା ଅଷ୍ଟ୍ରେଲିଆ ଉପପ୍ରଧାନମନ୍ତ୍ରୀ ତଥା ପ୍ରତିରକ୍ଷା ମନ୍ତ୍ରୀ ରିଚାର୍ଡ ମାର୍ଲେସ ଆଜି ଦିଲ୍ଲୀର ସାଧାରଣ ଜୀବନ ଶୈଳୀକୁ ବେଶ ଉତ୍ସାହର ସହ ଉପଭୋଗ କରିଥିବା ଦେଖିବାକୁ ମିଳିଛି । ସେ ଓ ତାଙ୍କ ସହ ଆସିଥିବା ଅଷ୍ଟେଲୀୟ ପ୍ରତିନିଧି ମଣ୍ଡଳୀ ଆଜି ଦିଲ୍ଲୀର ସ୍ଥାନୀୟ ବଜାରରେ ବୁଲିଛନ୍ତି । କେବଳ ବୁଲି ନାହାନ୍ତି ବରଂ ସେଠାରେ ରାସ୍ତାକଡରେ ବିକ୍ରି ହେଉଥିବା ଫାଷ୍ଟଫୁଡ ଓ ଥଣ୍ଡା ପାନୀୟର ମଜା ମଧ୍ୟ ନେଇଛନ୍ତି । ସେ ଦିଲ୍ଲୀରେ ମିଳୁଥିବା ରାମ ଲଡୁ ଖାଇବା ସହ ଲେମ୍ବୁପାଣି ପିଇଥିଲେ । ୟୁପିିଆଇ ପେମେଣ୍ଟ ବ୍ୟବହାର କରି ଏଥିପାଇଁ ଟଙ୍କା ମଧ୍ୟ ଦେଇଛନ୍ତି ।
ଏହା ପରେ ସେ ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଯୁବ କ୍ରେକେଟରଙ୍କ ସହ ମଧ୍ୟ ନଜର ଆସିଥିଲେ । ସେ ସେଠାରେ ଅଭ୍ୟାସ କରୁଥିବା 14 ରୁ 18 ବର୍ଷୀୟ କ୍ରିକେଟରଙ୍କ ସହ କଥା ହୋଇଥିଲେ । ଫଟୋ ଶେସନରେ ଅଂଶଗ୍ରହଣ କରିଥିଲେ । କ୍ରୀଡାବିତ ମନୋଭାବକୁ ଉତ୍ସାହିତ କରିଥିଲେ । ଏହା ପରେ ସେ ଓ ତାଙ୍କ ସହ ଅନ୍ୟ ଅଷ୍ଟ୍ରେଲୀୟ ସହଯୋଗୀମାନେ ଦିଲ୍ଲୀ ସ୍ଥିତ ଜାତୀୟ ଯୁଦ୍ଧସ୍ମାରକୀ ପରିଦର୍ଶନ କରିବା ସହ ଭାରତୀୟ ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ । ଉପପ୍ରଧାନମନ୍ତ୍ରୀ ରିଚାର୍ଡଙ୍କ ସହ ଅଷ୍ଟ୍ରେଲିଆ ବିଦେଶ ବ୍ୟାପର ମନ୍ତ୍ରୀ ପେନି ଓ୍ବଙ୍ଗ ମଧ୍ୟ ସାମିଲ ହୋଇଥିଲେ ।
ଗତକାଲି (ରବିବାର) ଆଇସିସି କ୍ରିକେଟ ବିଶ୍ବକପ ଫାଇନାଲ ମ୍ୟାଚରେ ଅଂଶଗ୍ରହଣ କରିଥିଲେ ରିଚାର୍ଡ । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଅହମ୍ମଦାବାଦ ସ୍ଥିତ ନରେନ୍ଦ୍ର ମୋଦି ଷ୍ଟାଡିୟମରେ ମ୍ୟାଚ ଦେଖିଥିଲେ । ପରେ ଚମ୍ପିଆନ ଅଷ୍ଟ୍ରେଲିଆ ଟିମକୁ ଉଭୟ ମୋଦି ଓ ରିଚାର୍ଡ ଟ୍ରଫି ପ୍ରଦାନ କରିଥିଲେ । ଆଜି ଅଷ୍ଟ୍ରେଲିଆ ପ୍ରତିନିଧି ଟିମ ଦିଲ୍ଲୀରେ ସରକାରୀ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ଭାରତ ଅଷ୍ଟ୍ରେଲିଆ 2+2 ମନ୍ତ୍ରୀସ୍ତରୀୟ ଆଲୋଚନାରେ ଅଂଶଗ୍ରହଣ କରିଥିଲେ ।